Mahabharata · Chapter 7.82

tayoḥ saṃvadatoreva kṛṣṇadārukayostathā /
sā'tyagādrajanī rājannatha rājā sma bodhyate //

paṭhanti pāṇidhvanikā māgadhāḥ stavagāyakāḥ /
vaitālikāśca sūtāśca tuṣṭuvuḥ puruṣarṣabham //

nartakāścāpyanṛtyanta jagurgītāni gāyakāḥ /
kuruvaṃśastavārthāni madhuraṃ raktakaṇṭhinaḥ //

mṛdaṅgā jharjharā bheryaḥ paṇavānakagomukhāḥ /
āḍambarāśca śaṅkhāśca dundubhyaśca mahāsvanāḥ //

evametāni sarvāṇi tathānyānyapi bhārata /
vādayanti sma saṃhṛṣṭāḥ kuśalāḥ sādhuśikṣitāḥ //

sa meghasamanirghoṣo mahāñśabdo'spṛśaddivam /
pārthivapravaraṃ suptaṃ yudhiṣṭhiramabodhayat //

pratibuddhaḥ sukhaṃ supto mahārhe śayanottame /
utthāyāvaśyakāryārthaṃ yayau snānagṛhaṃ nṛpaḥ //

tataḥ śuklāmbarāḥ snātāstaruṇāḥ śatamaṣṭa ca /
snāpakāḥ kāñcanaiḥ kumbhaiḥ pūrṇaiḥ samupatasthire //

bhadrāsane sūpaviṣṭaḥ paridhāyāmbaraṃ laghu /
sasnau candanasaṃyuktaiḥ pānīyairabhimantritaiḥ //

utsāditaḥ kaṣāyeṇa balavadbhiḥ suśikṣitaiḥ /
āplutaḥ sādhivāsena jalena sasugandhinā //

rājahaṃsanibhaṃ prāpya uṣṇīṣaṃ śithilārpitam /
jalakṣayanimittaṃ vai veṣṭayāmāsa mūrdhani //

hariṇā candanenāṅgamupalipya mahābhujaḥ /
sragvī cākliṣṭavasanaḥ prāṅmukhaḥ prāñjaliḥ sthitaḥ //

kṛtvendriyāṇāmaikāgryaṃ manasaśca mahāmanāḥ / jajāpa japyaṃ kaunteyaḥ satāṃ mārgamanuṣṭhitaḥ /
tatrāgniśaraṇaṃ dīptaṃ praviveśa vinītavat //

samidbhiḥ sa pavitrābhiragnimāhutibhistathā /
mantrapūtābhirarcitvā niścakrāma gṛhāttataḥ //

dvitīyāṃ puruṣavyāghraḥ kakṣyāṃ nirgamya pārthivaḥ /
tato vedavido vṛddhānapaśyadbrāhmaṇarṣabhān //

dāntānvedavratasnātānsnātānavabhṛtheṣu ca /
sahasrānucarānsaurānsahasraṃ cāṣṭa cāparān //

akṣataiḥ sumanobhiśca vācayitvā mahābhujaḥ /
tāndvijānmadhusarpirbhyāṃ phalaiḥ śreṣṭhaiḥ sumaṅgalaiḥ //

prādātkāñcanamekaikaṃ niṣkaṃ viprāya pāṇḍavaḥ /
alaṅkṛtaṃ cāśvaśataṃ vāsāṃsīṣṭāśca dakṣiṇāḥ //

tathā gāḥ kapilā dogdhrīḥ savatsāḥ pāṇḍunandanaḥ /
hemaśṛṅgā raupyakhurā dattvā tebhyaḥ pradakṣiṇam //

svastikānvardhamānāṃśca nandyāvartāṃśca kāñcanān /
mālyaṃ ca jalakumbhāṃśca jvalitaṃ ca hutāśanam //

pūrṇānyakṣatapātrāṇi rucakaṃ rocanāstathā /
svalaṅkṛtāḥ śubhāḥ kanyā dadhisarpirmadhūdakam //

maṅgalyānpakṣiṇaścaiva yaccānyadapi pūjitam /
dṛṣṭvā spṛṣṭvā ca kaunteyo bāhyāṃ kakṣyāṃ tato'gamat //

tatastasyāṃ nahābāhostiṣṭhataḥ paricārakāḥ /
sauvarṇaṃ sarvatobhadraṃ muktāvaidūryamaṇḍitam //

parārdhyāstaraṇāstīrṇaṃ sottaracchadamṛddhimat /
viśvakarmakṛtaṃ divyamupajahrurvarāsanam //

tatra tasyopaviṣṭasya bhūṣaṇāni mahātmanaḥ /
upājahrurmahārhāṇi prepyāḥ śubhrāṇi sarvaśaḥ //

yuktābharaṇaveṣasya kaunteyasya mahātmanaḥ /
rūpamāsīnmahārāja dviṣatāṃ śokavardhanam //

cāmaraiścandraraśmyābhairhemadaṇḍaiḥ suśobhanaiḥ /
dodhūyamānaiḥ śuśubhe vidyudbhiriva toyadaḥ //

saṃstūyamānaḥ sūtraiśca vandyamānaśca vandibhiḥ /
upagīyamāno gandharvairāste sma kurunandanaḥ //

tato muhūrtamāsīcca vandināṃ ninado mahān /
rathānāṃ nemighoṣaśca khuraghoṣaśca vājinām //

hādena gajaghaṇṭānāṃ śaṅkhānāṃ ninadena ca /
narāṇāṃ padaśabdaiśca kampatīva sma medinī //

tataḥ śuddhāntamāsādya jānubhyāṃ bhūtale sthitaḥ /
śirasā vandanīyaṃ tamabhivādya janeśvaram //

kuṇḍalī baddhanistriṃśaḥ sannaddhakavaco yuvā /
abhipraṇamya śirasā dvāstho dharmātmajāya vai //

nyavedayaddhṛṣīkeśamupayāntaṃ mahātmane /
so'bravītpuruṣavyāghraḥ svāgatenaiva mādhavaḥ //

praveśyatāṃ samīpaṃ me kimarthaṃ pravilambase / āsanaṃ ca madhughnāya dīyatāṃ paramārcitam /
tataḥ praveśya vārṣṇeyamupaveśya varāsane //

satkṛtya satkṛtastena paryapṛcchadyudhiṣṭhiraḥ //