Mahabharata · Chapter 7.84

tathā tu vadatāṃ teṣāṃ prādurāsīddhanañjayaḥ /
didṛkṣurbharataśreṣṭhaṃ rājānaṃ sasuhṛdgaṇam //

taṃ praviṣṭaṃ śubhāṃ kakṣyāmabhivandyāgrataḥ syitam /
tamutthāyārjunaṃ premṇā sasvaje pāṇḍavarṣabhaḥ //

mūrdhni cainamupāghrāya pariṣvajya ca bāhunā /
āśiṣaḥ paramāḥ procya smayamāno'bhyabhāṣata //

vyaktamarjuna saṅgrāme dhruvaste vijayo mahān /
tādṛgrūpā ca te cchāyā prasannaśca janārdanaḥ //
sañjaya uvāca /

tamabravīttato jiṣṇurmahadāścaryamuttamam /
dṛṣṭavānasmi bhadraṃ te keśavasya prasādajam //

tatastatkathayāmāsa yathādṛṣṭaṃ dhanañjayaḥ /
āśvāsanārthaṃ suhṛdāṃ tryambakeṇa samāgamam //

tataḥ śirobhiravaniṃ spṛṣṭvā sarve ca vismitāḥ /
namaskṛtya vṛṣāṅkāya sādhusādhvityathābruvan //

anujñātāstataḥ sarve suhṛdo dharmasūnunā /
tvaramāṇāḥ susannaddhā hṛṣṭā yuddhāya niryayuḥ //

abhivādya tu rājānaṃ yuyudhānācyutārjunāḥ /
hṛṣṭā viniryayuste vai yudhiṣṭhiraniveśanāt //

rathenaikena durdharṣau yuyudhānajanārdanau /
jagmatuḥ sahitau vīrāvarjunasya niveśanam //

tatra gatvā hṛṣīkeśaḥ kalpayāmāsa śāstravit /
rathaṃ rathavarasyājau vānararṣabhalakṣaṇam //

sa meghasamanirghoṣastaptakāñcanasaprabhaḥ /
babhau rathavaraḥ klṛptaḥ śiśurdivasakṛdyathā //

tataḥ puruṣaśārdūlaḥ sajjaṃ sarvaṃ nyavedayat /
rathaṃ puruṣasiṃhasya sadhvajaṃ supatākinam //

sa tu lokavaraḥ puṃsāṃ kirīṭī hemavarmabhṛt /
cāpabāṇadharo vāhaṃ pradakṣiṇamavartata //

tapovidyāvayovṛddhaiḥ kriyāvadbhirjitendriyaiḥ /
stūyamāno jayāśīrbhirāruroha mahāratham //

jaitraiḥ sāṅgrāmikairmantraiḥ pūrvameva rathottamam /
abhimantritamarciṣmānudayaṃ bhāskaro yathā //

sa rathe rathināṃ śreṣṭhaḥ kāñcane kāñcanāvṛtaḥ / vibabhau vimalo'rciṣmānmerāviva divākaraḥ /

anvāruruhatuḥ pārthaṃ yuyudhānajanārdanau /
śaryāteryajñamāyāntaṃ yathendraṃ devamaśvinau //

atha jagrāha govindo raśmīnraśmividāṃvaraḥ /
mātalirvāsavasyeva vṛtraṃ hantuṃ prayāsyataḥ //

sa tābhyāṃ sahitaḥ pārtho rathapravaramāsthitaḥ /
sahito budhaśukrābhyāṃ tamo nighnanyathā śaśī //

saindhavasya vadhaprepsuḥ prayātaḥ śatrupūgahā /
sahāmbupatimitrābhyāṃ yathendrastārakāmaye //

tato vāditranirghoṣairmāṅgalyaiśca stavaiḥ śubhaiḥ /
prayāntamarjunaṃ vīraṃ māgadhāścaiva tuṣṭuvuḥ //

sajayāśīḥ sapuṇyāhaḥ sūtamāgadhaniḥsvanaḥ /
yukto vāditraghoṣeṇa teṣāṃ ratikaro'bhavat //

tamanupravaṇo vāyuḥ puṇyagandhavahaḥ śubhaḥ /
vavau saṃharṣayanpārthaṃ dviṣataścāpi śoṣayan //

tatastasminkṣaṇe rājanvividhāni śubhāni ca /
prādurāsannimittāni vijayāya bahūni ca //

pāṇḍavānāṃ tvadīyānāṃ viparītāni māriṣa / dṛṣṭvā'rjuno nimittāni vijayāya pradakṣiṇam /
yuyudhānaṃ maheṣvāsamidaṃ vacanamabravīt //

yuyudhānādya yuddhe me dṛśyate vijayo dhruvaḥ /
yathāhīmāni liṅgāni dṛśyante śinipuṅgava //

so'haṃ tatra gamiṣyāmi yatra saindhavako nṛpaḥ /
yiyāsuryamalokāya mama vīryaṃ pratīkṣate //

yathā paramakaṃ kṛtyaṃ saindhavasya vadho mama /
tathaiva sumahatkṛtyaṃ dharmarājasya rakṣaṇam //

sa tvamadya mahābāho rājānaṃ paripālaya /
yathaiva hi mayā guptastvayā gupto bhavettathā //

na paśyāmi ca taṃ loke yastvāṃ yuddhe parājayet /
vāsudevasamaṃ yuddhe svayamapyamareśvaraḥ //

tvayi cāhaṃ parāśvastaḥ pradyumne vā mahārathe /
śaknuyāṃ saindhavaṃ hantumanapekṣo nararṣabha //

mayyapekṣā na kartavyā goptā'yaṃ mama keśavaḥ /
rājña eva parā guptiḥ kāryā sarvātmanā tvayā //

na hi yatra mahābāhurvāsudevo vyavasthitaḥ /
kiñcidvyāpadyate tatra yatrāhamapi ca dhruvam //

evamuktastu pārthena sātyakiḥ paravīrahā /
tathetyuktvā'gamattatra yatra rājā yudhiṣṭhiraḥ //