Mahabharata · Chapter 7.79

tato'rjunasya bhavanaṃ praviśyāpratimaṃ vibhuḥ / spṛṣṭvāmbhaḥ puṇḍarīkākṣaḥ sthaṇḍile śubhalakṣaṇe /
santastāra śubhāṃ śayyāṃ darbhairvaidūryasannibhaiḥ //

tato mālyena vidhivallājairgandhaiḥ sumaṅgalaiḥ /
alañcakāra tāṃ śayyāṃ parivāryāyudhottamaiḥ //

tataḥ spṛṣṭodakaṃ pārthaṃ vinītaparicārakam /
naityakaṃ darśayāñcakre naiśaṃ traiyambakaṃ balim //

tataḥ prītamanāḥ pārtho gandhamālyaiśca mādhavam /
alaṅkṛtyopahāraṃ taṃ naiśaṃ tasmai nyavedayat //

sādhusādhviti govindaḥ phalgunaṃ pratyabhāṣata //

supyatāṃ pārtha bhadraṃ te kalyāṇāya vrajāmyaham /
sthāpayitvā tato dvāsthāngoptṝṃścāttāyudhānnarān //

dārukānugataḥ śrīmānviveśa śibiraṃ svakam /
śiśye ca śayane śubhre bahukṛtya vicintayan //

pārthāya sarvaṃ bhagavāñśokaduḥkhāpahaṃ vidhim /
vyadadhātpuṇḍarīkākṣastejodyutivivardhanam //

yogamāsthāya yuktātmā sarveṣāmīśvareśvaraḥ /
śreyaskāmaḥ pṛthuyaśā viṣṇurjiṣṇupriyaṅkaraḥ //

na pāṇḍavānāṃ śibire kaścitsuṣvāpa tāṃ niśām /
prajāgaraḥ sarvajanaṃ hyāviveśa viśāmpate //

putraśokābhitaptena pratijñāto mahātmanā /
śvaḥ sindhurājasya vadhaḥ kāryo gāṇḍīvadhanvanā //

tatkathaṃ nu mahābāhurvāsaviḥ paravīrahā /
pratijñāṃ saphalāṃ kuryāditi te samacintayan //

kaṣṭaṃ hīdaṃ vyavasitaṃ pāṇḍavena mahātmanā /
putraśokābhibhūtena pratijñā mahatī kṛtā //

bhrātaraścāpi vikrāntā bahulāni balāni ca /
dhṛtarāṣṭrasya putreṇa sarvataḥ sanniveśitāḥ //

sa hatvā saindhavaṃ saṅkhye punaretu jayī sukhī /
hatvā ripugaṇaṃ sarvaṃ pārayitvā mahāvratam //

yadyasti sukṛtaṃ kiñcidasmākaṃ hantu saindhavam /
jitvā sarvānripūnpārthastrātu no'smānmahābhayāt //

evamāśaṃsamānāste kecittasthurupaśrutim /
śrutvā ceṣṭaṃ sumanaso vyaktamāśaṃsire jayam //

bhavitā nu kathaṃ kṛtyamidamityabruvañjanāḥ /
śvo'hatvā sindhurājaṃ vai dhūmaketuṃ pravekṣyati //

na śakyamanṛtāṃ kartuṃ pratijñāṃ vijayena hi /
mahaddhi sāhasaṃ pārthaḥ kṛtavācchokamohitaḥ //

dharmaputraḥ kathaṃ rājā bhaviṣyati mṛte'rjune /
tasminhi vijayaḥ kṛtsnaḥ pāṇḍavena samāhitaḥ //

yadi no'sti kṛtaṃ kiñcidyadi dattaṃ hutaṃ yadi /
phalena tasya sarvasya savyasācī jayatvarīn //
sañjaya uvāca /

evaṃ kathayatāṃ teṣāṃ jayamāśaṃsatāṃ prabho /
kṛcchreṇa mahatā rājanrajanī vyatyavartata //

tasyā rajanyā madhye tu pratibuddho janārdanaḥ /
smṛtvā pratijñāṃ pārthasya dārukaṃ pratyabhāṣata //

arjunena pratijñātamārtena hatabandhunā /
jayadrathaṃ vadhiṣyāmi śvobhūta iti dāruka //

tattu duryodhanaḥ śrutvā mantribhirmantrayiṣyati /
yathā jayadrathaṃ pārtho na hanyāditi saṃyuge //

akṣauhiṇyo hi tāḥ sarvā rakṣiṣyanti jayadratham /
droṇaśca sahaputreṇa sarvāstravidhipāragaḥ //

eko vīraḥ sahasrākṣo daityadānavadarpahā /
so'pi taṃ notsahetājau hantuṃ droṇena rakṣitam //

so'haṃ śvastatkariṣyāmi yathā kuntīsuto'rjunaḥ /
aprāpte'staṃ dinakare haniṣyati jayadratham //

na hi dārā na mitrāṇi jñātayo na ca bāndhavāḥ /
kaścidanyaḥ priyataraḥ kuntīputrānmamārjunāt //

anarjunamimaṃ lokaṃ muhūrtamapi dāruka /
udīkṣituṃ na śakto'haṃ bhavitā na ca tattathā //

ahaṃ vijitya tānsarvānsahasā sahayadvipān /
arjunārthe haniṣyāmi sakarṇānsasuyodhanān //

śvo nirīkṣantu me vīryaṃ trayo lokā mahāhave /
dhanañjayārthe samare parākrāntasya dāruka //

śvo narendrasahasrāṇi rājaputraśatāni ca /
sāśvadviparathānyājau vidraviṣyāmi dāruka //

śvastāṃ cakrapramathitāṃ drakṣyase nṛpavāhinīm /
mayā kruddhena samare pāṇḍavārthe nipātitām //

śvaḥ sadevāḥ sagandharvāḥ piśācoragarākṣasāḥ /
jñāsyanti lokāḥ sarve māṃ suhṛdaṃ savyasācinaḥ //

yastaṃ dveṣṭi sa māṃ dveṣṭi yastaṃ cānu sa māmanu /
iti saṅkalpyatāṃ buddhyā śarīrārdhaṃ mamārjunaḥ //

yathā tvaṃ me prabhātāyāmasyāṃ niśi rathottamam /
kalpayitvā yathāśāstramādāya vraja saṃyataḥ //

gadāṃ kaumodakīṃ divyāṃ śaktiṃ cakraṃ dhanuḥ śarān /
āropya vai rathe sūta sarvopakaraṇāni ca //

sthānaṃ ca kalpayitvā'tha rathopasthe dhvajasya me /
vainateyasya vīrasya samare rathaśobhinaḥ //

chatraṃ jāmbūnadairjālairarkajvalanasaprabhaiḥ //
viśvakarmakṛtairdivyairaśvānapi vibhūṣaya //

balāhakaṃ meghapuṣpaṃ śaibyaṃ sugrīvameva ca /
yuktvā vājivarāṃstatra kavacī tiṣṭha dāruka //

pāñcajanyasya nirghoṣaṃ parjanyaninadopamam /
śrutvā ca bhairavaṃ nādamupeyāstvaṃ javena mām //

ekāhnā'hamamarṣaṃ ca sarvaduḥkhāni caiva ha /
bhrātuḥ paitṛṣvaseyasya vyapaneṣyāmi dāruka //

sarvopāyairyatiṣyāmi yathā bībhatsurāhave /
paśyatāṃ dhārtarāṣṭrāṇāṃ haniṣyati jayadratham //

yasyayasya ca bībhatsurvadhe yatnaṃ kariṣyati /
āśaṃse'haṃ raṇe tantaṃ tatratatra haniṣyati //
dāruka uvāca /

jaya eva dhruvastasya kuta eva parājayaḥ /
yasya tvaṃ puruṣavyāghra sārathyamupajagmivān //

evaṃ caitatkariṣyāmi yathā māmanubhāṣase /
suprabhātāmimāṃ rātriṃ jayāya vijayasya hi //