Mahabharata · Chapter 7.80

dhārtarāṣṭrasya taṃ mantraṃ smaranneva dhanañjayaḥ /
pratijñāmātmano rakṣanmumohācintyavikramaḥ //

taṃ tu śokena santaptaṃ svapne kapivaradhvajam /
āsasāda mahātejā dhyāyantaṃ garuḍadhvajaḥ //

pratyutthānaṃ ca kṛṣṇasya sarvāvasthāsu phalgunaḥ /
na lopayati dharmātmā bhaktyā premṇā ca sarvadā //

pratyutthāya ca govindaṃ svaṃ tasmai cāsanaṃ dadau /
na cāsane svayaṃ buddhiṃ bībhatsurvyadadhāttadā //

tataḥ kṛṣṇo mahātejā jānam̐llokasya niścayam /
kuntīputramidaṃ vākyamāsīnaḥ sthitamabravīt //

mā viṣāde manaḥ pārtha kṛthāḥ kālo hi durjayaḥ /
kālaḥ sarvāṇi bhūtāni niyacchati bhavābhave //

kimarthaṃ ca viṣādaste tadbrūhi dvipadāṃ vara /
na śocyaṃ viduṣāṃ śreṣṭha śokaḥ kāryavināśanaḥ //

yattu kāryaṃ bhavetkāryaṃ karmaṇā tatsamācara /
hīnaceṣṭasya yaḥ śokaḥ sa hi śatrurdhanañjaya //

śocannandayate śatrūnkarśayatyapi bāndhavān /
kṣīyate ca narastasmānna tvaṃ śocitumarhasi //
sañjaya uvāca /

ityukto vāsudevena bībhatsuraparājitaḥ /
ābabhāṣe tadā vidvānidaṃ vacanamarthavat //

mayā pratijñā mahatī jayadrathavadhe kṛtā /
śvo'smi hantā durātmānaṃ putraghnamiti keśava //

matpratijñāvighātārthaṃ dhārtarāṣṭraiḥ kilācyuta /
pṛṣṭhataḥ saindhavaḥ kāryaḥ sarvairgupto mahārathaiḥ //

daśa caikā ca tāḥ kṛṣṇa akṣauhiṇyaḥ sudurjayāḥ /
hatāvaśeṣāstatremā hanta mādhava saṅkhyayā //

tābhiḥ parivṛtaḥ saṅkhye sarvaiścaiva mahārathaiḥ /
kathaṃ śakyeta sandraṣṭuṃ durātmā kṛṣṇa saindhavaḥ //

pratijñāpāraṇaṃ cāpi na bhaviṣyati keśava /
pratijñāyāṃ ca hīnāyāṃ kathaṃ jīvati madvidhaḥ //

duḥkhāpāyasya me vīra vikāṅkṣā parivartate /
drutaṃ ca yāti savitā tata etadbravīmyaham //
sañjaya uvāca /

śokasthānaṃ tu tacchrutvā pārthasya dvijaketanaḥ /
saṃspṛśyāmbhastataḥ kṛṣṇaḥ prāṅmukhaḥ samavasthitaḥ //

idaṃ vākyaṃ mahātejā babhāṣe puṣkarekṣaṇaḥ /
hitārthaṃ pāṇḍuputrasya saindhavasya vadhe kṛtī //
śrībhagavānuvāca /

pārtha pāśupataṃ nāma paramāstraṃ sanātanam /
yena sarvānmṛdhe detyāñjaghne devo maheśvaraḥ //

yadi tadviditaṃ te'dya śvo hantā'si jayadratham /
atha jñātaṃ prapadyasya manasā vṛṣabhadhvajam //

taṃ devaṃ manasā dhyātvā joṣamāssva dhanañjaya /
tatastasya prasādāttvaṃ bhaktyā prāpsyasi tanmahat //
sañjaya uvāca /

tataḥ kṛṣṇavacaḥ śrutvā saṃspṛśyāmbho dhanañjayaḥ /
bhūmāvāsīna ekāgro jagāma manasā bhavam //

tataḥ praṇihito brāhme muhūrte śubhalakṣaṇe /
ātmānamarjuno'paśyadgane sahakeśavam //

puṇyaṃ himavataḥ pādaṃ maṇimantaṃ ca parvatam /
jyotirbhiśca samākīrṇaṃ siddhacāraṇasevitam //

vāyuvegagatiḥ pārthaḥ khaṃ bheje sahakeśavaḥ /
keśavena gṛhītaḥ sa dakṣiṇe vibhunā bhuje //

prekṣamāṇo bahūnbhāvāñjagāmādbhutadarśanān /
udīcyāṃ diśi dharmātmā sopaśyacchvetaparvatam //

kuberasya virāhe ca nalinīṃ padmabhūṣitām /
saricchreṣṭhāṃ ca tāṃ gaṅgāṃ vīkṣamāṇo bahūdakām //

sadā puṣpaphalairvṛkṣairupetāṃ sphaṭikopalām /
siṃhavyāghrasamākīrṇāṃ nānāmṛgasamākulām //

puṇyāśramavatīṃ ramyāṃ manojñāṇḍajasevitām /
mandarasya pradeśāṃśca kinnarodgītanāditān //

hemarūpyamayaiḥ śṛṅgairnānauṣadhividīpitān / tathā mandāravṛkṣaiśca puṣpitairupaśobhitān /

snigdhāñjanacayākāraṃ samprāptaḥ kālaparvatam /
brahmatuṅgaṃ nadīścānyāstathā janapadānapi //

sa tuṅgaṃ śataśṛṅgaṃ ca śaryātivanameva ca /
puṇyamaśvaśirasthānaṃ sthānamātharvaṇasya ca //

vṛṣadaṃśaṃ ca śailendraṃ mahāmandarameva ca /
apsarobhiḥ samākīrṇaṃ kinnaraiścopaśobhitam //

tasmiñśaile vrajanpārthaḥ sakṛṣṇaḥ samavaikṣata /
śubhaiḥ prasravaṇairjuṣṭāṃ hemadhātuvibhūṣitām //

candraraśmiprakāśāṅgīṃ pṛthivīṃ puramālinīm /
samudrāṃścādbhutākārānapaśyadbahulākarān //

viyaddyāṃ pṛthivīṃ caiva tathā viṣṇupadaṃ vrajan /
vismitaḥ saha kṛṣṇena kṣipto bāṇa ivābhyagāt //

grahanakṣatrasomānāṃ sūryāgnyośca samatviṣam /
apaśyata tadā pārtho jvalantamiva parvatam //

samāsādya tu taṃ śailaṃ śailāgre samavasthitam / taponityaṃ mahātmānamapaśyadvṝṣabhadhvajam /

sahasramiva sūryāṇāṃ dīpyamānaṃ svatejasā /
śūlinaṃ jaṭilaṃ gauraṃ valkalājinavāsasam //

nayanānāṃ sahasraiśca vicitrāṅgaṃ mahaujasam /
pārvatyā sahitaṃ devaṃ bhūtasaṅghaiśca bhāsvaraiḥ //

gītavāditrasannādairhāsyalāsyasamanvitam /
vaglitāsphoṭitotkruṣṭaiḥ puṇyairgandhaiśca sevitam //

stūyamānaṃ stavairdivyairṛṣibhirbrahmavādibhiḥ /
goptāraṃ sarvabhūtānāmīśānaṃ varadaṃ śivam //

vāsudevastu taṃ dṛṣṭvā jagāma śirasā kṣitim /
pārthena saha dharmātmā gṛṇanbrahma sanātanam //

lokādiṃ viśvakarmāṇamajamīśānamavyayam /
manasaḥ paramaṃ yoniṃ khaṃ vāyuṃ jyotiṣāṃ nidhim //

sraṣṭāraṃ vāridhārāṇāṃ bhuvaśca prakṛtiṃ parām /
devadānavayakṣāṇāṃ mānavānāṃ ca śāsakam //

yogānāṃ ca paraṃ dhāma dṛṣṭaṃ brahmavidāṃ nidhim /
cāracarasya sraṣṭāraṃ pratihartārameva ca //

kālakopaṃ mahātmānaṃ śakrasūryaguṇodayam /
vavandatustadā kṛṣṇau vāṅmanobuddhikarmabhiḥ //

yaṃ prapadyanti vidvāṃsaḥ sūkṣmādhyātmapadaiṣiṇaḥ /
tamajaṃ kāramātmānaṃ jagmatuḥ śaraṇaṃ bhavam //

arjunaścāpi taṃ devaṃ bhūyo bhūyo'pyavandata /
jñātvā taṃ sarvabhūtādiṃ bhūtabhavyabhavodbhavam //

śaraṇyaṃ śaraṇaṃ devamīśānaṃ parameśvaram /
jagāma jagatāṃ nāthamarjunaḥ sajanārdanaḥ //

tatastāvāgatau dṛṣṭvā naranārāyaṇāvubhau /
suprasannamanāḥ śarvaḥ provāca prahasanniva //

svāgataṃ vāṃ naraśceṣṭhāvuttiṣṭhetāṃ gataklamau /
kiñca vāmīpsitaṃ vīrau manasaḥ kṣipramucyatām //

yena kāryeṇa samprāptau yuvāṃ tatsādhayāmi kim /
vriyatāmātmanaḥ śreyastatsarvaṃ pradadāni vām //
sañjaya uvāca /

tatastadvacanaṃ śrutvā pratyutthāya kṛtāñjalī / vāsudevārjunau śarvaṃ tuṣṭuvāte mahāmatī /
bhaktyāstavena divyena mahātmānāvaninditau //
kṛṣṇārjunāvūcatuḥ /

namo bhavāya śarvāya rudrāya varadāya ca /
paśūnāṃ pataye nityamugrāya ca kapardine //

mahādevāya bhīmāya tryambakāya ca śāntaye /
īśānāya makhaghnāya namo'stvandhakaghātine //

kumāragurave tubhyaṃ nīlagrīvāya vedhase /
pinākine haviṣyāya satyāya vibhave sadā //

vilohitāya dhrūmrāya vyādhāyānaparājite /
nityaṃ nīlaśikhaṇḍāya śūline divyacakṣuṣe //

hotre potre trinetrāya vyādhāya vasuretase /
acintyāyāmbikābhartre sarvadevastutāya ca //

vṛṣadhvajāya muṇḍāya jaṭine brahmacāriṇe /
tapyamānāya salile brahmaṇyāyājitāya ca //

viśvātmane viśvasṛje viśvamāvṛtya tiṣṭhate /
namonamaste sevyāya bhūtānāṃ prabhave sadā //

brahmavaktrāya sarvāya śankarāya śivāya ca /
namostu vācaspataye prajānāṃ pataye namaḥ //

abhigamyāya kāmyāya stutyāyāryāya sarvadā / namo'stu devadevāya mahābhūtadharāya ca /
namo viśvasya pataye pattīnāṃ pataye namaḥ //

namo viśvasya pataye mahatāṃ pataye namaḥ /
namaḥ sahasraśirase sahasrabhujamṛtyave //
sahasranetrapādāya namo'saṅkhyeyakarmaṇe /

namo hiraṇyavarṇāya hiraṇyakavacāya ca /
bhaktānukampine nityaṃ sidhyatāṃ no varaḥ prabho //
sañjaya uvāca /

evaṃ stutvā mahādevaṃ vāsudevaḥ sahārjunaḥ /
prasādayāmāsa bhavaṃ tadā hyastropalabdhaye //