Mahabharata · Chapter 7.77

tāṃ niśāṃ duḥkhaśokārtau niḥśvasantāvivoragau /
nidrāṃ naivopalebhāte vāsudevadhanañjayau //

naranārāyaṇau kruddhau jñātvā devāḥ savāsavāḥ /
vyathitāścintayāmāsuḥ kiṃsvidetadbhaviṣyati //

vavuśca dāruṇā vātā rūkṣā ghorābhiśaṃsinaḥ /
sakabandhastathā'ditye parighaḥ samadṛśyata //

śuṣkāśanyaśca niṣpetuḥ sanirghātāḥ savidyutaḥ /
cacāla cāpi pṛthivī saśailavanakānanā //

cukṣubhuśca mahārāja sāgārā makarālayāḥ /
pratisrotaḥpravṛttāśca tathā gantuṃ samudragāḥ //

rathāśvanaranāgānāṃ pravṛttamadharottaram /
kravyādānāṃ pramodārthaṃ yamarāṣṭravivṛddhaye //

vāhanāni śakṛnmūtre mumucū ruruduśca ha /
tāndṛṣṭvā dāruṇānsarvānutpātām̐llomaharṣaṇān //

sarve te vyathitāḥ sainyāstvadīyā bharatarṣabhā /
śrutvā mahābalasyogrāṃ pratijñāṃ savyasācinaḥ //

atha kṛṣṇaṃ mahābāhurabravītpākaśāsaniḥ /
āśvāsaya subhadrāṃ tvaṃ bhaginīṃ snuṣayā saha //

snuṣāṃ cāsyā vayasyāśca viśokāḥ kuru mādhava /
sāmnā satyena yuktena vacasā'śvāsaya prabho //

tato'rjunagṛhaṃ gatvā vāsudevaḥ sudurmanāḥ /
bhaginīṃ putraśokārtāmāśvāsayata duḥkhitām //
vāsudeva uvāca /

mā śokaṃ kuru vārṣṇeyi kumāraṃ prati sasnuṣā /
sarveṣāṃ prāṇināṃ bhīru niṣṭhaiṣā kālanirmitā //

kule jātasya vīrasya kṣatriyasya viśeṣataḥ /
sadṛśaṃ maraṇaṃ hyetattava putrasya mā śucaḥ //

diṣṭyā mahāratho dhīraḥ pitustulyaparākramaḥ /
kṣātreṇa vidhinā prāpto vīrābhilaṣitāṃ gatim //

jitvā subahuśaḥ śatrūnpreṣayitvā ca mṛtyave /
gataḥ puṇyakṛtāṃ lokānsarvakāmaduho'kṣayān //

tapasā brahmacaryeṇa śrutena prajñayāpi ca /
santo yāṃ gatimicchanti tāṃ prāptastava putrakaḥ //

vīrasūrvīrapatnī tvaṃ vīrajā vīrabāndhavā /
mā śucastanayaṃ bhadre gataḥsa paramāṃ gatim //

svādhyāyayuktaṃ brāhmamī yācitāraṃ svādhyāyayuktaṃ brāhmaṇī yācitāraṃ
gaurboḍhāraṃ kṣipragantāramaśvā / dāsaṃ śūdrā karmakāraṃ tu vaiśyā śūraṃ sūte tvadvidhā rājaputrī //

prāpsyate cāpyasau pāpaḥ saindhavo bālaghātakaḥ /
adharmasyāsya tu phalaṃ sasuhṛdgaṇabāndhavaḥ //

vyuṣṭāyāṃ tu varārohe rajanyāṃ pāpakarmakṛt /
na hi mokṣyati pārthātsa praviṣṭo'pyamarāvatīm //

śvaḥ śiraḥ pādamūlaṃ te saindhavasyāhṛtaṃ dhruvam /
paddhyāṃ pramathitāsi tvaṃ viśokā bhava mā rudaḥ //

kṣatradharmaṃ puraskṛtya gataḥ śūraḥ satāṃ gatim /
vayaṃ ca prāpnuyāmeha ye cānye śastrajīvinaḥ //

vyūḍhorasko mahābāhuranivartī ripuvrajāt /
gatastava varārohe putraḥ svargaṃ jvaraṃ jahi //

anuyātaśca pitaraṃ mātṛpakṣaṃ ca vīryavān /
sahasraśo ripūnhatvā hataḥ śūro mahārathaḥ //

āśvāsaya snuṣāṃ rājñi mā śucaḥ kṣatriye bhṛśam /
śvaḥ priyaṃ sumahacchrutvā viśokā bhava nandini //

yatpārthena pratijñātaṃ tattathā na tadanyathā /
cikīrṣitaṃ hi te bharturna bhavejjātu niṣphalam //

yadi ca manujapannagāḥ piśācā rajanicacārāḥ patagāḥ surāsurāśca /
raṇagatamabhiyānti sindhurājaṃ na sa bhavitā saha tairapi prabhāte //