મહાભારત · અધ્યાય 7.77

તાં નિશાં દુઃખશોકાર્તૌ નિઃશ્વસન્તાવિવોરગૌ ।
નિદ્રાં નૈવોપલેભાતે વાસુદેવધનઞ્જયૌ ॥

નરનારાયણૌ ક્રુદ્ધૌ જ્ઞાત્વા દેવાઃ સવાસવાઃ ।
વ્યથિતાશ્ચિન્તયામાસુઃ કિંસ્વિદેતદ્ભવિષ્યતિ ॥

વવુશ્ચ દારુણા વાતા રૂક્ષા ઘોરાભિશંસિનઃ ।
સકબન્ધસ્તથાઽદિત્યે પરિઘઃ સમદૃશ્યત ॥

શુષ્કાશન્યશ્ચ નિષ્પેતુઃ સનિર્ઘાતાઃ સવિદ્યુતઃ ।
ચચાલ ચાપિ પૃથિવી સશૈલવનકાનના ॥

ચુક્ષુભુશ્ચ મહારાજ સાગારા મકરાલયાઃ ।
પ્રતિસ્રોતઃપ્રવૃત્તાશ્ચ તથા ગન્તું સમુદ્રગાઃ ॥

રથાશ્વનરનાગાનાં પ્રવૃત્તમધરોત્તરમ્ ।
ક્રવ્યાદાનાં પ્રમોદાર્થં યમરાષ્ટ્રવિવૃદ્ધયે ॥

વાહનાનિ શકૃન્મૂત્રે મુમુચૂ રુરુદુશ્ચ હ ।
તાન્દૃષ્ટ્વા દારુણાન્સર્વાનુત્પાતાઁલ્લોમહર્ષણાન્ ॥

સર્વે તે વ્યથિતાઃ સૈન્યાસ્ત્વદીયા ભરતર્ષભા ।
શ્રુત્વા મહાબલસ્યોગ્રાં પ્રતિજ્ઞાં સવ્યસાચિનઃ ॥

અથ કૃષ્ણં મહાબાહુરબ્રવીત્પાકશાસનિઃ ।
આશ્વાસય સુભદ્રાં ત્વં ભગિનીં સ્નુષયા સહ ॥

સ્નુષાં ચાસ્યા વયસ્યાશ્ચ વિશોકાઃ કુરુ માધવ ।
સામ્ના સત્યેન યુક્તેન વચસાઽશ્વાસય પ્રભો ॥

તતોઽર્જુનગૃહં ગત્વા વાસુદેવઃ સુદુર્મનાઃ ।
ભગિનીં પુત્રશોકાર્તામાશ્વાસયત દુઃખિતામ્ ॥
વાસુદેવ ઉવાચ ।

મા શોકં કુરુ વાર્ષ્ણેયિ કુમારં પ્રતિ સસ્નુષા ।
સર્વેષાં પ્રાણિનાં ભીરુ નિષ્ઠૈષા કાલનિર્મિતા ॥

કુલે જાતસ્ય વીરસ્ય ક્ષત્રિયસ્ય વિશેષતઃ ।
સદૃશં મરણં હ્યેતત્તવ પુત્રસ્ય મા શુચઃ ॥

દિષ્ટ્યા મહારથો ધીરઃ પિતુસ્તુલ્યપરાક્રમઃ ।
ક્ષાત્રેણ વિધિના પ્રાપ્તો વીરાભિલષિતાં ગતિમ્ ॥

જિત્વા સુબહુશઃ શત્રૂન્પ્રેષયિત્વા ચ મૃત્યવે ।
ગતઃ પુણ્યકૃતાં લોકાન્સર્વકામદુહોઽક્ષયાન્ ॥

તપસા બ્રહ્મચર્યેણ શ્રુતેન પ્રજ્ઞયાપિ ચ ।
સન્તો યાં ગતિમિચ્છન્તિ તાં પ્રાપ્તસ્તવ પુત્રકઃ ॥

વીરસૂર્વીરપત્ની ત્વં વીરજા વીરબાન્ધવા ।
મા શુચસ્તનયં ભદ્રે ગતઃસ પરમાં ગતિમ્ ॥

સ્વાધ્યાયયુક્તં બ્રાહ્મમી યાચિતારં સ્વાધ્યાયયુક્તં બ્રાહ્મણી યાચિતારં
ગૌર્બોઢારં ક્ષિપ્રગન્તારમશ્વા । દાસં શૂદ્રા કર્મકારં તુ વૈશ્યા શૂરં સૂતે ત્વદ્વિધા રાજપુત્રી ॥

પ્રાપ્સ્યતે ચાપ્યસૌ પાપઃ સૈન્ધવો બાલઘાતકઃ ।
અધર્મસ્યાસ્ય તુ ફલં સસુહૃદ્ગણબાન્ધવઃ ॥

વ્યુષ્ટાયાં તુ વરારોહે રજન્યાં પાપકર્મકૃત્ ।
ન હિ મોક્ષ્યતિ પાર્થાત્સ પ્રવિષ્ટોઽપ્યમરાવતીમ્ ॥

શ્વઃ શિરઃ પાદમૂલં તે સૈન્ધવસ્યાહૃતં ધ્રુવમ્ ।
પદ્ધ્યાં પ્રમથિતાસિ ત્વં વિશોકા ભવ મા રુદઃ ॥

ક્ષત્રધર્મં પુરસ્કૃત્ય ગતઃ શૂરઃ સતાં ગતિમ્ ।
વયં ચ પ્રાપ્નુયામેહ યે ચાન્યે શસ્ત્રજીવિનઃ ॥

વ્યૂઢોરસ્કો મહાબાહુરનિવર્તી રિપુવ્રજાત્ ।
ગતસ્તવ વરારોહે પુત્રઃ સ્વર્ગં જ્વરં જહિ ॥

અનુયાતશ્ચ પિતરં માતૃપક્ષં ચ વીર્યવાન્ ।
સહસ્રશો રિપૂન્હત્વા હતઃ શૂરો મહારથઃ ॥

આશ્વાસય સ્નુષાં રાજ્ઞિ મા શુચઃ ક્ષત્રિયે ભૃશમ્ ।
શ્વઃ પ્રિયં સુમહચ્છ્રુત્વા વિશોકા ભવ નન્દિનિ ॥

યત્પાર્થેન પ્રતિજ્ઞાતં તત્તથા ન તદન્યથા ।
ચિકીર્ષિતં હિ તે ભર્તુર્ન ભવેજ્જાતુ નિષ્ફલમ્ ॥

યદિ ચ મનુજપન્નગાઃ પિશાચા રજનિચચારાઃ પતગાઃ સુરાસુરાશ્ચ ।
રણગતમભિયાન્તિ સિન્ધુરાજં ન સ ભવિતા સહ તૈરપિ પ્રભાતે ॥