Mahabharata · Chapter 7.76

ṣaḍrathāndhārtarāṣṭrasya manyase yānbalādhikān /
teṣāṃ vīryaṃ mamārdhena na tulyamiti me matiḥ //

astramastreṇa sarveṣāmeteṣāṃ madhusūdana /
mayā drakṣyasi nirbhinnaṃ jayadrathavadhaiṣiṇā //

droṇasya miṣataścāhaṃ sagaṇasya vipaścitaḥ /
mūrdhānaṃ sindhurājasya pātayiṣyāmi bhūtale //

yadi sādhyāśca rudrāśca vasavaśca sahāśvinaḥ /
marutaśca sahendreṇa viśvedevāḥ saheśvarāḥ //

pitaraḥ sahagandharvāḥ suparṇāḥ sāgarādrayaḥ /
dyaurviyatpṛthivī ceyaṃ diśaśca sadigīśvarāḥ //

grāmyāraṇyāni bhūtāni sthāvarāṇi carāṇi ca /
trātāraḥ sindhurājasya bhavanti madhusūdana //

tathāpi bāṇairnihataṃ śvo draṣṭāsi raṇe mayā /
satyena ca śape kṛṣṇa tathaivāyudhamālabhe //

yasya goptā maheṣvāso droṇaḥ pāpasya durmateḥ /
tameva prathamaṃ droṇamabhiyāsyāmi keśava //

tasminyuddhamidaṃ baddhaṃ manyate sa suyodhanaḥ /
tasmāttasyaiva senāgraṃ bhittvā yāsyāmi saindhavam //

draṣṭāsi śvo maheṣvāsānnārācaistigmatejitaiḥ /
śṛṅgāṇīva girervajrairdāryamāṇānmayā yudhi //

naranāgāśvadehebhyo visraviṣyati śoṇitam /
pataddhyaḥ patitebhyaśca vibhinnebhyaḥ śitaiḥ śaraiḥ //

gāṇḍīvapreṣitā bāṇā mano'nilasamā jave /
nṛnāgāśvānvidehāsūnkartāraśca sahasraśaḥ //

śakrādbhīṣmātkṛpāddroṇāddevādrudrācca yanmayā /
upāttamastraṃ ghoraṃ taddaṣṭāro'tra narā yudhi //

brāhmeṇāstreṇa cāstrāṇi hanyamānāni saṃyuge /
mayā draṣṭā'si sarveṣāṃ saindhavasyābhirakṣiṇām //

śaravegasamutkṛttai rājñāṃ keśava mūrdhabhiḥ /
āstīryamāṇāṃ pṛthivīṃ draṣṭā'si śvo mayā yudhi //

kravyādāṃstarpayiṣyāmi drāvayiṣyāmi śātravān /
suhṛdo nandayiṣyāmi pramathiṣyāmi saindhavam //

bahvāgaskṛtkusambandhī pāpadeśasamudbhavaḥ /
mayā saindhavako rājā hataḥ svāñśocayiṣyati //

sarve kṣīrānnabhoktāraḥ pāpācārā raṇājire /
mayā sarājakā bāṇairhatā naśyanti saindhavāḥ //

tathā prabhāte kartā'smi yathā kṛṣṇa suyodhanaḥ /
nānyaṃ dhanurdharaṃ loke maṃsyate matsamaṃ yudhi //

gāṇḍīvaṃ ca dhanurdivyaṃ yoddhāraṃ ca dhanañjam /
yantāraṃ ca hṛṣīkeśaṃ ko'tivarteta saṃyuge //

tava prasādādbhagavankinnāvāptaṃ raṇe mama /
aviṣahyaṃ hṛṣīkeśa kiṃ jānanmāṃ vigarhase //

yathā lakṣma sthiraṃ candre samudre ca yathā jalam /
evametāṃ pratijñāṃ me satyāṃ viddhi janārdana //

māvamaṃsthā mamāstrāṇi māvamaṃsthāśca gāṇḍivam /
māvamaṃsthā balaṃ bāhvormāvamaṃsthā dhanañjayam //

gāṇḍīvaṃ ca dhanurdivyaṃ yoddhā cāhaṃ nararṣabha /
tvaṃ ca yantā hṛṣīkeśa kinnu syādajitaṃ mayā //

yathābhiyāya saṅgramaṃ na jito vai jayāmi ca /
tena satyena saṅgrāme hataṃ viddhi jayadratham //

tvaṃ ca mādhava sarvaṃ tattathā pratividhāsyasi /
yathā ripūṇāṃ miṣatāṃ pramathiṣyāmi saindhavam //

dhruvaṃ vai brāhmaṇe satyaṃ dhruvā sādhuṣu sannatiḥ /
śrīrdhruvā'pi ca dakṣeṣu dhruvo nārāyaṇe jayaḥ //
sañjaya uvāca /

evamuktvā hṛṣīkeśaṃ svayamātmānamātmanā /
sandideśārjuno nardanvāsaviḥ keśavaṃ prabhum //

yathā prabhātāṃ rajanīṃ kalpitaḥ syādrathottamaḥ /
tathā kāryaṃ tvayā kṛṣṇa pratijñā syādyathā dhruvā //