Mahabharata · Chapter 7.74

śrutvā tu taṃ mahāśabdaṃ pāṇḍūnāṃ putragṛddhinām /
cāraiḥ praveditastrastaḥ samutthāya jayadrathaḥ //

śokasammūḍhahṛdayo duḥkhenābhyāhato bhṛśam / majjamāna ivāgādhe vipule śokasāgare /
jagāma samitiṃ rājñāṃ saindhavo vimṛśanbahu //

sa teṣāṃ naradevānāṃ sakāśe paryadevayat /
abhimanyupiturbhītaḥ savrīḍo vākyamabravīt //

yo'sau pāṇḍoḥ kila kṣetre jātaḥ śakreṇa kāminā /
sa ninīṣati durbuddhirmāṃ kilaikaṃ yamakṣayam //

svasti vo'stu gamiṣyāmi svagṛhaṃ jīvitepsayā /

athavāstrapratibalāstrāta māṃ kṣatriyarṣabhāḥ /
pārthena prārthitaṃ vīrāste sandatta mamābhayam //

droṇaduryodhanakṛpāḥ karṇamadreśabāhlikāḥ /
duḥśāsanādayaḥ śaktāstrātumapyantakārditam //

kimaṅga punarekena phalgunena jighāṃsatā /
na trāsyanti bhavanto māṃ samastāḥ patayaḥ kṣiteḥ //

pratijñāṃ pāṇḍaveyānāṃ śrutvā mama mahadbhayam /
sīdanti mama gātrāṇi mumūrṣoriva pārthivāḥ //

vadho nūnaṃ pratijñāto mama gāṇḍīvadhanvanā /
tathāhi hṛṣṭāḥ krośanti śokakāle'pi pāṇḍavāḥ //

tanna devā na gandharvā nāsuroragarākṣasāḥ /
utsahante'nyathā kartuṃ kuta eva narādhipāḥ //

tasmānmāmanujānīta bhadraṃ vo'stu nararṣabhāḥ /
adarśanaṃ gamiṣyāmi na māṃ drakṣyanti pāṇḍavāḥ //
sañjaya uvāca /

evaṃ vilapamānaṃ taṃ bhayādvyākulacetasam /
ātmakāryagarīyastvādrājā duryodhano'bravīt //

na bhetavyaṃ naravyāghra ko hi tvāṃ puruṣarṣabha /
madhye kṣatriyavīrāṇāṃ tiṣṭhantaṃ prārthayedyudhi //

eteṣāṃ naradevānāṃ mattamātaṅgagāminām /
saṅghātamupayātānāmapi vibhyetpurandaraḥ //

ahaṃ vaikartanaḥ karṇaścitraseno viviṃśatiḥ /
bhūriśravāḥ śalaḥ śalyo vṛṣaseno durāsadaḥ //

purumitro jayo bhojaḥ kāmbhojaśca sudakṣiṇaḥ /
satyavrato mahābāhurvikarṇo durmukhaśca ha //

duḥśāsanaḥ subāhuśca kāliṅgaścāpyudāyudhaḥ /
vindānuvindāvāvantyau droṇo drauṇiśca saubalaḥ //

māyāvī balavāñchūro rākṣasaścāpyalambusaḥ / ete cānye ca bahavo nānājanapadeśvarāḥ /
sasainyāstvābhigopsyanti vyetu te mānaso jvaraḥ //

tvaṃ cāpi rathināṃ śreṣṭhaḥ svayaṃ śūro'mitadyute /
sa kathaṃ pāṇḍaveyebhyo bhayaṃ paśyasi vaindhava //

akṣauhiṇyo mahāvīrya madīyāstava rakṣaṇe /
yattā yotsyanti mābhaistvaṃ saindhava vyetu te bhayam //
sañjaya uvāca /

evamāśvāsito rājanputreṇa tava saindhavaḥ /
duryodhanena sahito droṇaṃ rātrāvupāgamat //

upasaṅgṛhya caraṇau droṇāya sa viśāmpatiḥ /
upopaviśya praṇataḥ paryapṛcchadidaṃ vacaḥ //

nimitte dūrapātitve laghutve dṛḍhavedhane /
mama bravītu bhagavānviśeṣaṃ phalgunasya ca //

vidyāviśeṣamicchāmi jñātumācārya tattvataḥ /
arjunasyātmanaścaiva yāthātathyaṃ pracakṣva me //
droṇa uvāca /

samamācāryakaṃ tāta tava caivārjunasya ca /
yogādduḥkhoṣitatvācca tasmāttvatto'dhiko'rjunaḥ //

na tu te yudhi santrāsaḥ kāryaḥ pārthātkathañcana /
ahaṃ hi rakṣitā tāta bhayāttvāṃ nātra saṃśayaḥ //

na hi madbāhuguptasya prabhavantyamarā api /
vyūhayiṣyāmi taṃ vyūhaṃ yaṃ pārtho na tariṣyati //

tasmādyudhyasva mābhaistvaṃ svadharmamanupālaya /
pitṛpaitāmahaṃ mārgamanuyāhi mahāratha //

adhītā vidhivadvedā agnayaḥ suhutāstvayā /
iṣṭaṃ ca bahubhiryajñairna te mṛtyurbhayaṅkaraḥ //

durlabhaṃ mānuṣairmandairmahābhāgyamavāpya tu /
bhujavīryārjitām̐llokāndivyānprāpsyasyanuttamān //

kuravaḥ pāṇḍavāścaiva vṛṣṇayo'nye ca mānavāḥ /
ahaṃ ca sahaputreṇa adhruvā iti cintyatām //

paryāyeṇa vayaṃ sarve kālena balinā hatāḥ /
paralokaṃ gamiṣyāmaḥ svaiḥsvaiḥ karmabhiranvitāḥ //

tapastaptvā tu yām̐llokānprāpnuvanti tapasvinaḥ /
kṣatradharmāśritāḥ vīrāḥ kṣatriyāḥ prāpnuvanti tān //

evamāśvāsito rājā bhāradvājena saindhavaḥ /
apānudadbhayaṃ pārthādyuddhāya ca mano dadhe //

tataḥ praharṣaḥ sainyānāṃ tasya cāsīdviśāmpate /
vāditrāṇāṃ dhvaniścograḥ siṃhanādaravaiḥ saha //