Mahabharata · Chapter 7.75

pratijñāte tu pārthena sindhurājavadhe tadā /
vāsudevo mahābāhurdhanañjayamabhāṣata //

bhrātṝṇāṃ matamajñāya tvayā vācā pratiśrutam /
saindhavaṃ cāsmi hanteti tatsāhasamidaṃ kṛtam //

asammantrya mayā sārdhamatibhāro'yamudyataḥ /
kathaṃ tu sarvalokasya nāvahāsyā bhavemahi //

dhārtarāṣṭrasya śibire ye tu praṇihitāścarāḥ /
ta ime śīghramāgamya pravṛttiṃ vedayanti naḥ //

tvayā vai sampratijñāte sindhurājavadhe prabho /
siṃhanādaḥ savāditraḥ sumahāniha taiḥ śrutaḥ //

tena śabdena vitrastā dhārtarāṣṭrāḥ sasaindhavāḥ /
nākasmātsiṃhanādo'yamiti matvā vyavasthitāḥ //

sumahāñśabdasampātaḥ kauravāṇāṃ mahābhuja /
āsīnnāgāśvapattīnāṃ rathaghoṣaśca bhairavaḥ //

abhimanyorvadhaṃ śrutvā dhruvamārto dhanañjayaḥ /
rātrau niryāsyati krodhātiti mattvā vyavasthitāḥ //

taiścārebhya iyaṃ kṛtsnā śrutā satyavatastava /
pratijñā sindhurājasya vadhe rājīvalocana //

tato vimanasaḥ sarve trastāḥ kṣudramṛgā iva /
āsansuyodhanāmātyāḥ sa ca rājā jayadrathaḥ //

athotthāya sahāmātyairdīnaḥ svaśivirātkila /
ayātsauvīrasindhūnāmīśvaro rājasaṃsadam //

sa mantrakāle sammantrya sarvāṃ naiśreyasīṃ kriyām /
suyodhanamidaṃ vākyamabravīdrājasaṃsadi //

māmasau putrahanteti śvo'bhiyātā dhanañjayaḥ /
pratijñāto hi senāyā madhye tena vadho mama //

tāṃ na devā na gandharvā nāsuroragarākṣasāḥ /
utsahante'nyathā kartuṃ pratijñāṃ savyasācinaḥ //

te māṃ rakṣata saṅgrāme mā vo mūrdhni dhanañjayaḥ /
padaṃ kṛtvā'pnuyāllakṣyaṃ yuktaṃ pratividhīyatām //

atha rakṣā na me samyakkriyate kurunandana /
anujānīhi māṃ rājangamiṣyāmi gṛhānprati //

evamuktastvavākśīrṣo vimanāḥ sasuyodhanaḥ /
śrutvā taṃ samayaṃ tasya dhyānamevānvapadyata //

tamārtamabhisamprekṣya rājā kila sa saindhavaḥ /
mṛdu cātmahitaṃ caiva sāpekṣamidamuktavān //

neha paśyāmi bhavatāṃ tathāvīryaṃ dhanurdharam /
yo'rjunasyāstramastreṇa pratihanyānmahāhave //

vāsudevasahāyasya gāṇḍīvaṃ dhunvato dhanuḥ /
ko'rjunasyāgratastiṣṭhetsākṣādapi śatakratuḥ //

maheśvaro'pi pārthena śrūyate yodhinaḥ purā /
padātinā mahāvīryo girau himavati prabhuḥ //

dānavānāṃ sahasrāṇi hiraṇyapuravāsinām /
jaghānaikarathenaiva devarājapracoditaḥ //

samāyukto hi kaunteyo bāsudevena dhīmatā /
sāmarānapi lokāṃstrīnhanyāditi matirmama //

so'hamicchāmyanujñātuṃ rakṣituṃ vā mahātmanā /
droṇena sahaputreṇa vīreṇa yadi manyase //
śrībhagavānuvāca /

sa rājñā svayamācāryo bhṛśamatrārthito'rjuna /
saṃvidhānaṃ ca vihitaṃ rathāśca kila sajjitāḥ //

karṇo bhūriśravā drauṇirvṛṣasenaśca durjayaḥ /
kṛpaśca madrarājaśca ṣaḍete'sya purogamāḥ //

śakaṭaḥ padmakaścārdho vyūho droṇena nirmitaḥ /
padmakarṇikamadhyasthaḥ sūcī pārśve jayadrathaḥ //

sthāsyate rakṣite vīraiḥ sindhurāṭ sa sudurmadaḥ /
dhanuṣyastre ca vīrye ca prāṇe caiva tathaurase //

aviṣahyatamā hyete niścitāḥ pārtha ṣaḍrathāḥ /
etānajitvā sagaṇānnaiva prāpyo jayadrathaḥ //

teṣāmekaikaśo vīryaṃ ṣaṇṇāṃ tvamanucintaya /
sahitā hi naravyāghra na śakyā jetumañjasā //

bhūyastu mantrayiṣyāmi nītimātmahitāya vai /
mantrajñaiḥ sacivaiḥ sārdhaṃ suhṛdbhiḥ kāryasiddhaye //