Mahabharata · Chapter 7.59

rāmaṃ dāśarathiṃ caiva mṛtaṃ sṛñjaya śuśruma / yaṃ prajā anvamodanta pitā putramivaurasam /
asaṅkhyeyā guṇā yasminnāsannamitatejasi //

yaścaturdaśavarṣāṇi nideśātpituracyutaḥ /
vane vanitayā sārdhamavasallakṣmaṇāgrajaḥ //

jaghāna ca janasthāne rākṣasānmanujarṣabhaḥ /
tapasvināṃ rakṣaṇārthaṃ sahasrāṇi caturdaśa //

tatraiva vasatastasya rāvaṇo nāma rākṣasaḥ /
jahāra bhāryāṃ vaidehīṃ sammohyainaṃ sahānujam //

rāmo hṛtāṃ rākṣasena bhāryāṃ śrutvā jaṭāyuṣaḥ /
āturaḥ śokasantapto rāmo'gacchaddharīśvaram //

tena rāmaḥ susaṅgamya vānaraiśca mahābalaiḥ /
ājagāmodadheḥ pāraṃ setuṃ kṛtvā mahārṇave //

tatra hatvā tu paulastyānsasuhṛdgaṇabāndhavān /
māyāvinaṃ mahāghoraṃ rāvaṇaṃ lokakaṇṭakam //

surāsurairavadhyaṃ taṃ devabrāhmaṇakaṇṭakam /
jaghāna sa mahābāhuḥ paulastyaṃ sagaṇaṃ raṇe //

hatvā tatra ripuṃ saṅkhye bhāryayā saha saṅgataḥ /
sa ca laṅkeśvaraṃ cakre dharmātmānaṃ vibhīṣaṇam //

bhāryayā saha saṃyuktastato vānarasenayā /
ayodhyāmāgato vīraḥ puṣpakeṇa virājatā //

tatra rājanpraviṣṭaḥ sannayodhyāyāṃ mahāyaśāḥ /
mātṝrvayasyānsacivānṛtvijaḥ sapurohitān //

śuśrūṣamāṇaḥ satataṃ mantribhiścābhiṣecitaḥ /
visṛjya harirājānaṃ hanumantaṃ sahāṅgadam //

bhrātaraṃ bharataṃ vīraṃ śatrughnaṃ caiva lakṣmaṇam /
pūjayanparayā prītyā vaidehyā cābhipūjitaḥ //

daśavarṣasahasrāṇi daśavarṣaśatāni ca /
catuḥsagāraparyantāṃ pṛthivīmanvaśāsata //

aśvamedhaśatairījaṃ kratubhirbhūridakṣiṇaiḥ /
yaśca vipraprasādena sarvakāmānavāpya ca //

samprāpya vidhivadrājyaṃ sarvabhūtānukampanaḥ /
sarvadvīpānavaṣṭabhya prajā dharmeṇa pālayan //

sa nirgalaṃ mukhyatamamaśvamedhaśataṃ prabhuḥ / ājahāra sureśasya haviṣā mudamāharan /
anyaiśca vividhairyajñairīje bahuguṇairnṛpaḥ //

kṣutpipāse'jayadrāmaḥ sarvarogāṃśca dehinām /
satataṃ guṇasampanno dīpyamānaḥ svatejasā //

atisarvāṇi bhūtāni rāmo dāśarathirbabhau / ṛṣīṇāṃ devatānāṃ ca mānuṣāṇāṃ ca sarvaśaḥ /
pṛthivyāṃ saha vāso'bhūdrāme rājyaṃ praśāsati //

nāhīyata tadā prāmaḥ prāṇināṃ na tadā vyathā /
prāṇāpānau samāvāstāṃ rāme rājyaṃ praśāsati //

paryadīpyanta tejāṃsi tadā'narthāśca nābhavan /
dīrghāyuṣaḥ prajāḥ sarvā yuvā na mriyate tadā //

vedaiścaturbhiḥ suprītāḥ prāpnuvanti divaukasaḥ /
havyaṃ kavyaṃ ca vividhaṃ niṣpūrtaṃ hutameva ca //

adaṃśamaśakā deśā naṣṭavyālasarīsṛpāḥ /
nāpyu prāṇabhṛtāṃ mṛtyurnākāle jvalano'dahat //

adharmarucayo lubdhā mūrkhā vā nābhavaṃstadā /
śiṣṭeṣṭaprājñakarmāṇaḥ sarve varṇāstadā'bhavan //

svadhāṃ pūjāṃ ca rakṣobhirjanasthāne praṇāśitām /
prādānnihatya rakṣāṃsi pitṛdevebhya īśvaraḥ //

sahasraputrāḥ puruṣā daśavarṣaśatāyuṣaḥ /
na ca jyeṣṭhāḥ kaniṣṭhebhyastadā śrāddhāni kurvate //

śyāmo yuvā lohitākṣo mattamātaṅgavikramaḥ /
ājānubāhuḥ subhujaḥ siṃhaskandho mahābalaḥ //

daśavarṣasahasrāṇi daśavarṣaśatāni ca /
sarvabhūtamanaḥkānto rāmo rājyamakārayat //

rāmo rāmo rāma iti prajānāmabhavatkathā /
rāmabhūtaṃ jagadabhūdrāme rājyaṃ praśāsati //

caturvidhāḥ prajā rāmaḥ svargaṃ nītvā divaṃ gataḥ /
ātmecchayā pratiṣṭhāpya rājavaṃśamihāṣṭadhā //

sa cenmamāra sṛñjaya caturbhadratarastvayā / putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //