Mahabharata · Chapter 7.60

bhagīrathaṃ ca rājānaṃ mṛtaṃ sṛñjaya śuśruma /
paritrāṇāya pūrveṣāṃ yena gaṅgā'vatāritā //

yasyendro bāhuvīryeṇa prīto rājño mahātmanaḥ /
so'śvamedhaśatairīje samāptavaradakṣiṇaiḥ //

havirmantrānnasampannairdevānāmādadhau mudam /
yena bhāgīrathī gaṅgā cayanaiḥ kāñcanaiścitā //

yaḥ sahasraṃ sahasrāṇāṃ kanyā hemavibhūṣitāḥ /
rājñaśca rājaputrāṃśca brāhmaṇebhyo hyamanyata //

sarvā rathagatāḥ kanyā rathāḥ sarve caturyujaḥ /
ratherathe śataṃ nāgāḥ sarve vai hemamālinaḥ //

sahasramaśvāścaikaikaṃ gajānāṃ pṛṣṭhato'nvayuḥ /
aśveaśve śataṃ gāvo gavāṃ paścādajāvikam //

tenākrāntā janaughena dakṣiṇā bhūyasīrdadat /
upahvare'tivyathitā tasyāṅke niṣasāda ha //

tathā māgīrathī gaṅgā hyūrdhvagā hyabhavatpurā /
duhitṛtvaṃ gatā rājñaḥ putratvamagamattadā //

tāṃ tu gāthā jaguḥ prītā gandharvāḥ sūryavarcasaḥ /
pitṛdevamanuṣyāṇāṃ śṛṇvatāṃ valguvādinaḥ //

bhagīrathaṃ yajamānamaikṣvākuṃ bhūridakṣiṇam /
gaṅgā samudragā devī vavre pitaramīśvaram //

tasya sendraiḥ suragaṇairdevairyajñaḥ svalaṅkṛtaḥ /
samyakparigṛhītaśca śāntavighno nirāmayaḥ //

yo ya iccheta vipro vai yatrayatrātmanaḥ priyam /
bhagīrathastadā prītastatratatrādadadvaśī //

nādeyaṃ brāhmaṇasyāsīdyasya yatsyātpriyaṃ dhanam /
so'pi vipraprasādena brahmalokaṃ gato nṛpaḥ //

yena yātau makhamukhau diśāśāviha pādapāḥ /
tenāvasthātumicchanti taṃ gatvā rājamīśvaram //

sa cenmamāra sṛñjaya caturbhadratarastvayā / putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //