Mahabharata · Chapter 7.58

śibimauśīnaraṃ cāpi mṛtaṃ sṛñjaya śuśruma /
ya imāṃ pṛthivīṃ sarvāṃ carmavatparyaveṣṭayat //

sādridvīpārṇavavanāṃ rathaghoṣeṇa nādayan /
sa śibiryaṣṭumanvicchanmukhyaḥ sarvasapatnajit //

tena yajñairbahuvidhairiṣṭaṃ paryāptadakṣiṇaiḥ /
avihiṃsya janānanyānavāpa vasu puṣkalam //

sarvamūrdhābhiṣiktānāṃ sammataḥ so'bhavadyudhi /
ajayaccāśvamedhairyo vijitya pṛthivīmimām //

nirargalairbahuphalairniṣkakoṭisahasradaḥ /
bibharti dakṣiṇā yasya gaṅ्gāyāḥ srota āvṛṇot //

hastyaśvapaśubhirdhānyairmṛgairgojāvibhistathā /
vividhaiḥ pṛthivīṃ puṇyāṃ śibirbrāhmaṇasātkarot //

yāvatyo varṣato dhārā yāvatyo divi tārakāḥ /
yāvatyaḥ sikatā gāṅgyo yāvanmerormahopalāḥ //

udanvati ca yāvanti ratnāni prāṇino'pi ca /
tāvatīradadadgā vai śibirauśīnaro'dhvare //

nodyantāraṃ dhurastasya kañcidanyaṃ prajāpatiḥ /
bhūtaṃ bhavyaṃ bhavantaṃ vā nādhyagacchannarottamam //

tasyāsanvividhā yajñāḥ sarvakāmaiḥ samanvitāḥ /
hemayūpāsanagṛhā hemaprākāratoraṇāḥ //

śucisvādvannapānaṃ ca brāhmaṇāḥ prayutāyutāḥ /
nānābhakṣyaiḥ priyakathāḥ payodadhimahāhadāḥ //

tasyāsanyajñavāṭeṣu nadyaḥ śubhrānnaparvatāḥ /
pibata snāta khādadhvamiti yatrocyate janaiḥ //

yasmai prādādvaraṃ rudrastuṣṭaḥ puṇyena karmaṇā /
akṣayaṃ dadato vittaṃ śraddhā kīrtistathā kriyāḥ //

yathoktameva bhūtānāṃ priyatvaṃ svargamuttamam /
etām̐llabdhvā varāniṣṭāñśibiḥ kāle divaṃ gataḥ //

sa cenmamāra sṛñjaya caturbhadratarastvayā / putrātpuṇyatarastubhyaṃ mā putramanutapyathāḥ /
ayajvānamadakṣiṇyamabhi śvaityetyudāharat //