Mahabharata · Chapter 7.51

hate tasminmahāvīrye saubhadre rathayūthape /
vimuktarathasannāhāḥ sarve nikṣiptakārmukāḥ //

upopaviṣṭā rājānaṃ parivārya yudhiṣṭhiram /
tadeva yuddhaṃ dhyāyantaḥ saubhadragatamānasāḥ //

tato yudhiṣṭhiro rājā vilalāpa suduḥkhitaḥ / tato yudhiṣṭhiro rājā vilalāpa suduḥkhitaḥ /

abhimanyau hate vīre bhrātuḥ putre mahārathe //
yudhiṣṭhira uvāca /

enaṃ jitvā kṛpaṃ śalyaṃ rājānaṃ ca suyodhanam /
drom̐ṇaṃ drauṇiṃ maheṣvāsaṃ tathaivānyānmahārathān //

droṇānīkamasambādhaṃ mama priyacikīrṣayā /
hatvā śatrugaṇānvīrāneṣa śete mahārathaḥ //

kṛtāstrayu ddhakuśalānmaheṣvāsānmahābalān /
kulaśaḥ pūṇairyuktāñchūrānvikhyātapauruṣān //

droṇena rprāhetaṃ vyūhamabhedyamamarairapi /
adṛṣṭapūrvamasmābhiḥ padmaṃ cakrāyudhapriyaḥ //

bhittvā madhyaṃ praviṣṭo'sau gomadhyamiva kesarī /
vikrīḍitaṃ raṇe tena nighnatā vai parānvarān //

yasya śūrā maheṣvāsāḥ pratyanīkagatā raṇe /
prabhagnā vinivartante kṛtāstrā yuddhadurmadāḥ //

atyantaśatrurasmākaṃ yena duḥśāsanaḥ śaraiḥ /
kṣipraṃ hyabhimukhaḥ saṅkhye visañjño vimukhīkṛtaḥ //

sa tīrtvā dustaraṃ vīro droṇānīkamahārṇavam /
prāpya dauḥśāsaniṃ kārṣṇiḥ prāpto vaivasvatakṣayam //

kathaṃ drakṣyāmi kaunteyaṃ saubhadre nihate'rjunam /
subhadrāṃ vā mahābhāgāṃ priyaṃ putramapaśyatīm //

hatavatsāṃ yathā dhenuṃ taddṛrśanakṛtonmukhīm / kiṃsvidvakṣyāmyapetārthamakliṣṭamasamañjasam /
tāvubhau prativakṣyāmi hṛṣīkeśadhanañjayau //

ahameva subhadrāyāḥ keśavārjunayorapi /
priyakāmo jayākāṅkṣī kṛtavānidamapriyam //

na lubdho budhyate doṣām̐llobhānmohātpravartate /
madhulipsurhi nāpaśyaṃ prapātamahamīdṛśam //

yo hi bhojye puraskāryo yāneṣu śayaneṣu ca /
bhūṣaṇeṣu ca so'smābhirbālo yudhi puraskṛtaḥ //

kathaṃ hi bālastaruṇo yuddhānāmaviśāradaḥ /
sadaśva iva sambādhe viṣame kṣemamarhati //

no ceddhi vayamapyenaṃ mahīmanuśayīmahi /
bībhatsoḥ kopadīptasya dagdhāḥ kṛpaṇacakṣuṣā //

alubdho mitamānhīmānkṣamāvānrūpavānbalī /
vapuṣmānmānakṛdvīraḥ priyaḥ satyaparākramaḥ //

yasya ślāghanti vibudhāḥ karmāṇyūrjitakarmaṇaḥ /
nivātakavacāñjaghne kālakeyāṃśca vīryavān //

mahendraśatravo yena hiraṇyapuravāsinaḥ /
akṣṇornimeṣamātreṇa paulobhāḥ sagaṇā hatāḥ //

parebhyo'pyabhayārthibhyo yo dadātyabhayaṃ vibhuḥ /
tasyāsmābhirna śakitastrātumapyātmajo balī //

bhayaṃ tu sumahatprāptaṃ dhārtarāṣṭrānmahābalān /
pārthaḥ putravadhātkruddhaḥ kauravāñśoṣayiṣyati //

kṣudraḥ kṣudrasahāyaśca svapakṣakṣayakārakaḥ /
vyaktaṃ duryodhano dṛṣṭvā śocanhāsyati jīvitaṃ //

na me jayaḥ prītikaro na rājyaṃ na cāmaratvaṃ na suraiḥ salokatā /
imaṃ samīkṣyāprativīryapauruṣaṃ nipātitaṃ devavarātmajātmajam //