Mahabharata · Chapter 7.50

vayaṃ tu pravaraṃ hatvā teṣāṃ taiḥ śarapīḍitāḥ /
niveśāyābhyupāyāmaḥ sāyāhne rudhirokṣitāḥ //

nirīkṣamāṇāstu vayaṃ pare cāyodhanaṃ śanaiḥ /
apayātā mahārāja glāniṃ prāptā vicetasaḥ //

tato niśāyā divasasya cāśivaḥ śivārutaiḥ sandhiravartatādbhutaḥ /
kuśeśayāpīḍanibhe divākare vilambamāne'stamupetya parvatam //

varāsiśaktyṛṣṭivarūthacarmaṇāṃ vibhūṣaṇānāṃ ca samākṣipanprabhāḥ /
divaṃ ca bhūmiṃ ca samānayanniva
priyāṃ tanuṃ bhānurupaiti pāvakam //

mahābhrakūṭācalaśṛṅgasannibhai-- rgajairanekairiva vajrapātitaiḥ /
savaijayantyaṅkuśavarmayantṛbhi-- rnipātitairnaṣṭagatiścitā kṣitiḥ //

hateśvaraiścūrṇitacakrakūbarai-- rhatāśvasūtairvipatākaketubhiḥ /
mahārathairbhūḥ śuśubhe vicūrṇitaiḥ purairivāmitrahatairnarādhipa //

rathāśvabṛndaiḥ sahasādibhirhataiḥ praviddhabhāṇḍābharaṇaiḥ pṛthagvidhaiḥ /
nirastajihvādaśanāntralocanai-- rdharā babhau ghoravirūpadarśanā //

praviddhavarmābhaṇāmbarāyudhā vipannahastyaśvarathānugā narāḥ /
mahārhaśayyāstaraṇocitāstadā kṣitāvanāthā iva śerate hatāḥ //

atīva hṛṣṭāḥ śvaśṛgālavāyasā bakāḥ suparṇāśca vṛkāstarakṣavaḥ /
vayāṃsyasṛkpānyatha rakṣasāṃ gaṇāḥ piśācasaṅghāśca sudāruṇā raṇe //

tvaco vinirbhidya pibanvasāmasṛk tathaiva majjāḥ piśitāni cāśnuvan /
vapāṃ vilumpanti hasanti gānti ca prakarṣamāṇāḥ kuṇapānyanekaśaḥ //

śarīrasaṅghāṭavahā hyasṛgjalā rathoḍupā kuñjaraśailasaṅkaṭā /
manuṣyaśīrṣopalamāṃsakardamā praviddhanānāvidhaśastramālinī //

bhayāvahā vaitaraṇīva dustarā pravartitā yodhavaraistadā nadī /
uvāha madhyena raṇājire bhṛśaṃ bhayāvahā dīnamṛtapravāhinī //

pibanti ca snānti ca yatra durdṛśāḥ piśācasaṅghāstu nadanti bhairavāḥ /
sunanditāḥ praṇabhṛtāṃ kṣayankarāḥ samānabhakṣāḥ śvasṛgālapakṣiṇaḥ //

tathā tadāyodhanamugradarśanaṃ niśāmukhe pitṛpatirāṣṭravardhanam /
nirīkṣamāṇaḥ śanakairjahurnarāḥ samutthitā nṛttakabandhasaṅkulam //

apetavidhvastamahārhabhūṣaṇaṃ nipātitaṃ śakrasamaṃ mahābalam /
raṇe'bhimanyuṃ dadṛśustadā janā vyapoḍhahavyaṃ sadasīva pāvakam //