Mahabharata · Chapter 7.49

viṣṇoḥ svasurnandakaraḥ sa viṣṇvāyudhabhūṣaṇaḥ /
rarājātirathaḥ saṅkhye janārdana ivāparaḥ //

mārutoddhūtakeśāntamudyatārivarāyudham /
vapuḥ samīkṣya pṛthvīśā duḥsamīkṣyaṃ surairapi //

yadi pāṇitalādetaccakraṃ muñceta phālguniḥ /
varadānānmātulasya viṣṇoścakramivāpatet //

taccakraṃ bhṛśamudvignāḥ sañcicchiduranekadhā /
mahārathastataḥ kārṣmiḥ sa jagrāha mahāgadām //

vidhanuḥsyandanāsistairvicakraścāribhiḥ kṛtaḥ /
abhimanyurgadāpāṇiraśvatthāmānamārdayat //

sa gadāmudyatāṃ dṛṣṭvā jvalantīmaśanīmiva /
apākrāmadrathopasthādvikramāṃstrīnnararṣabhaḥ //

tasyāśvāngadayā hatvā tathobhau pārṣṇisārathī /
śarācitāṅgaḥ saubhadraḥ śvāvidvatsamadṛśyata //

tataḥ subaladāyādaṃ kālikeyamapothayat /
jaghāna cāsyānucarāngāndhārānsaptasaptatim //

punaścaiva vasātīyāñjaghāna rathino daśa / kekayānāṃ rathānsapta hatvā ca daśa kuñjarān /
dauḥśāsanirathaṃ sāśvaṃ gadayā samapothayat //

tato dauḥśasaniḥ kruddho gadāmudyamya māriṣa /
abhidudrāva saubhadraṃ tiṣṭhatiṣṭheti cābravīt //

tāvudyatagadau vīrāvanyonyavadhakāṅkṣiṇau /
bhrātṛvyau samprajahāte pureva tryambakāndhakau //

tāvanyonyaṃ gadāgrābhyāmāhatya patitau kṣitau /
indradhvajāvivotsṛṣṭau raṇamadhye parantapau //

dauḥśāsanirathotthāya kurūṇāṃ kīrtivardhanaḥ /
uttiṣṭhamānaṃ saubhadraṃ gadayā mūrdhnyatāḍayat //

gadāvegena mahatā vyāyāmena ca mohitaḥ /
vicetā nyapatadbhūmau saubhadraḥ paravīrahā //

evaṃ vinihato rājanneko bahubhirāhave /
kṣobhayitvā camūṃ sarvāṃ nalinīmiva kuñjaraḥ //

aśobhata hato vīro vyādhairvanagajo yathā /
taṃ tathā patitaṃ śūraṃ tāvakāḥ paryavārayan //

dāvaṃ dagdhvā yathā śāntaṃ pāvakaṃ śiśirātyaye /
vimṛdvya nagaśṛṅgāṇi sannivṛttamivānilam //

astiṃ gatamivādityaṃ taptvā bhārata vāhinīm /
upaplutaṃ yathā somaṃ saṃśuṣkamiva sāgasm //

pūrṇacandrābhavadanaṃ kākapakṣavṛtālikam / taṃ bhūmau patitaṃ dṛṣṭvā tāvakāste mahārathāḥ /
mudā paramayā yuktāścukruśuḥ siṃhavanmuhuḥ //

āsītparamako harṣastāvakānāṃ viśāmpate /
itareṣāṃ tu vīrāṇāṃ netrebhyaḥ prāpatajjalam //

antarikṣe ca bhūtāni prākrośanta viśāmpate /
dṛṣṭvā nipatitaṃ vīraṃ cyutaṃ candramivāmbarāt //

droṇakarṇamukhaiḥ ṣaḍbhirdhārtarāṣṭrairmahārathaiḥ /
eko'yaṃ nihataḥ śete naiṣa dharmo mato hi naḥ //

tasminvinihate vīre bahvaśobhata medinī /
dyauryathā pūrṇacandreṇa nakṣatragaṇamālinī //

rukmapuṅkhaiśca sampūrṇā rudhiraughapariplutā /
uttamāṅgaiśca śūrāṇāṃ bhrājamānaiḥ sakuṇḍalaiḥ //

vicitraiśca paristomaiḥ patākābhiśca saṃvṛtā /
cāmaraiśca kuthābhiśca praviddhaiścāmbarottamaiḥ //

rathāśvanaranāgānāmalaṅkāraiśca suprabhaiḥ /
khaṅgaiḥ suniśitaiḥ pītairnirmuktairbhujagairiva //

cāpaiśca vividhaiśchinnaiḥ śaktyṛṣṭiprāsakampanaiḥ /
vividhaiścāyudhaiścānyaiḥ saṃvṛtā bhūraśobhata //

niṣṭanadbhiratīvānyairudvahadrudhirasravaiḥ /
naraiḥ patadbhiḥ patitairavanī svadhikaṃ babhau //

vājibhiścāpi nirjīvaiḥ śvasadbhiḥ śoṇitokṣitaiḥ /
sārohairviṣamā bhūmiḥ saubhadreṇa nipātitaiḥ //

sāṅkuśaiḥ samahāmātraiḥ sarvamāyudhaketubhiḥ /
parvatairiva vidhvastairviśikhairmathitairgajaiḥ //

pṛthivyānukīrṇaiśca aśvasārathiyodhibhiḥ /
hadairiva prakṣubhitairhṛtanāgai rathottamaiḥ //

padātisaṅghaiśca hatairvividhāyudhabhūṣaṇaiḥ /
bhīrūṇāṃ trāsajananī ghorarūpā'bhavanmahī //

taṃ dṛṣṭvā patitaṃ bhūmau candrārkasadṛśadyutim /
tāvakānāṃ parā prītiḥ pāṇḍūnāṃ cābhavadvyathā //

abhimanyau hate rājañśiśuke'prāptayauvane /
samprādravaccamūḥ sarvā dharmarājasya paśyataḥ //

dīryamāṇaṃ balaṃ dṛṣṭvā saubhadre vinipātite /
ajātaśatrustānvīrānidaṃ vacanamabravīt //

svargameṣa gataḥ śūro yo hato na parāṅmukhaḥ /
saṃstambhayata mābhaiṣṭa vijeṣyāmo raṇe ripūn //

ityevaṃ sa mahātejā duḥkhitebhyo mahādyutiḥ /
dharmarājo yudhāṃ śreṣṭho bruvanduḥkhamapānudat //

yuddhe hyāśīviṣākārānrājaputrānraṇe ripūn /
pūrvaṃ nihatya saṅgrāme paścādārjunirabhyayāt //

hatvā daśasahasrāṇi kausalyaṃ ca mahāratham /
kṛṣṇārjunasamaḥ kārṣṇiḥ śakralokaṃ gato dhruvam //

rathāśvanaramātaṅgānvinihatya sahasraśaḥ / avitṛptaḥ sa saṅgrāmādaśocyaḥ puṇyakarmakṛt /

gataḥ puṇyakṛtāṃ lokāñśāśvatānpuṇyanirjitān //