Mahabharata · Chapter 7.48

sa karṇaṃ karṇinā karṇe punarvivyādha phālguniḥ /
śaraiḥ pañcāśatā cainamavidhyatkopayanbhṛśam //

prativivyādha rādheyastāvadbhiratha taṃ punaḥ /
śarairācitasarvāṅgo bahvaśobhata bhārata //

karṇaṃ cāpyakarotkruddho rudhirotpīḍavāhinam / karṇo'pi vibabhau śūraḥ śaraiśchinno'sṛgātapluḥ /
sandhānugataparyantaḥ śaradīva divākaraḥ //

tāvubhau śaracitrāṅgau rudhireṇa samukṣitau /
babhūvaturmahātmānau puṣpitāviva kiṃśukau //

atha karṇasya sacivānṣaṭ śūrāṃścitrayodhinaḥ /
sāśvasūtadhvajarathānsaubhadro nijaghāna ha //

tathetarānmaheṣvāsāndaśabhirdaśabhiḥ śaraiḥ /
pratyavidhyadasambhrāntastadadbhutamivābhavat //

māgadhasya tathā putraṃ hatvā ṣaḍbhirajihmagaiḥ /
sāśvaṃ sasūtaṃ taruṇamaśvaketumapātayat //

mārtikāvatakaṃ bhojaṃ tataḥ kuñjaraketanam /
kṣurapreṇa samunmathya nanāda visṛjanśarān //

tasya dauḥśāsanirviddhvā caturbhiścaturo hayān /
sūtamekena vivyādha daśabhiścārjunātmajam //

tato dauḥśāsaniṃ kārṣṇirviddhvā saptabhirāśugaiḥ /
saṃrambhādraktanayano vākyamuccairathābravīt //

pitā tavāhavaṃ tyaktvā gataḥ kāpuruṣo yathā /
diṣṭyā tvamapi jānīṣe yoddhuṃ na tvadya mokṣyase //

etāvaduktvā vacanaṃ karmāraparimārjitam /
nārācaṃ visasarjāsmai taṃ drauṇistribhirācchinat //

tasyārjunirdhvajaṃ chittvā śalyaṃ tribhiratāḍayat /
taṃ śalyo navabhirbāṇairgārdhrapatrairatāḍayat //

hṛdyasambhrāntavadrājaṃstadadbhutamivābhavat /
tasyārjunirdhvajaṃ chittvā hatvobhau pārṣṇisārathī //

taṃ vivyādhāyasaiḥ ṣaḍbhiḥ sopākrāmadrathāntaram /
śatruñjayaṃ candraketuṃ meghavegaṃ suvarcasam //

sūryabhāsaṃ ca pañcaitānhatvā vivyādha saubalam /
taṃ saubalastribhirviddhvā duryodhanamathābravīt //

sarva enaṃ vimathnīmaḥ puraikaikaṃ hinasti naḥ /
athābravītpunardroṇaṃ karṇo vaikartano raṇe //

purā sarvānpramathnāti brūhyasya vadhammāśu naḥ /
tato droṇo maheṣvāsaḥ sarvāṃstānpratyabhāṣata //

asti vā'syāntaraṃ kiñcitkumārasyātha paśyata /
anvasya pitaraṃ cādya carataḥ sarvato diśam //

śīghratāṃ narasiṃhasya pāṇḍaveyasya paśyata /
dhanurmaṇḍalamevāsya rathamārgeṣu dṛśyate //

sandadhānasya viśikhāñśīghraṃ caiva vimuñcataḥ /
ārujannapi me prāṇānmohayannapi sāyakaiḥ //

praharṣayati māṃ bhūyaḥ saubhadraḥ paravīrahā /
atimānaṃ dadhātyeṣa saubhadro vicaranraṇe //

antaraṃ yasya saṃrabdhā na paśyanti mahārathāḥ / asyato laghuhastasya diśaḥ sarvā maheṣubhiḥ /
na viśeṣaṃ prapaśyāmi raṇe gāṇḍīvadhanvanaḥ //
sañjaya uvāca /

atha karṇaḥ punardroṇamāhārjuniśarāhataḥ /
sthātavyamiti tiṣṭhāmi pīḍyamāno'bhimanyunā //

tejasvinaḥ kumārasya śarāḥ paramadāruṇāḥ /
kṣiṇvanti hṛdayaṃ me'dya ghorāḥ pāvakatejasaḥ //

tamācāryo'bravītkarṇaṃ śanakaiḥ prahasanniva /
abhedyamasya kavacaṃ yuvā cāśuparākramaḥ //

upadiṣṭā mayā cāsya pituḥ kavacadhāraṇā /
tāmeṣa nikhilāṃ vetti dhruvaṃ parapurañjayaḥ //

śakyaṃ tvasya dhanuśchettuṃ jyāṃ ca bāṇaiḥ samāhitaiḥ /
abhīṣūṃśca hayāṃścaiva tathobhau pārṣṇisārathī //

etatkuru maheṣvāsa rādheya yadi śakyate /
athainaṃ vimukhīkṛtya paścātpraharaṇaṃ kuru //

sadhanuṣko na śakyo'yamapi jetuṃ surāsuraiḥ /
virathaṃ vidhanuṣkaṃ ca kuruṣvainaṃ yadīcchasi //
punaḥ sthitena kenāpi duḥśako jetumārjuniḥ //
sañjaya uvāca /

tadācāryavacaḥ śrutvā karṇo vaikartanastvaran /
asyato laghuhastasya pṛṣṭhato dhanurācchinat //

aśvānasyāvadhīddoṇo gautamaḥ pārṣṇisārathī /
śeṣāstu cchinnadhanvānaṃ śaravarṣairavākiran //

tvaramāṇāstvarākāle virathaṃ ṣaṇmahārathāḥ /
śaravarṣairakaruṇā bālamekamavākiran //

sa cchinnadhanvā virathaḥ svadharmamanupālayan /
khaṅgacarmadharaḥ śrīmānutpapāta vihāyasā //

mārgaiḥ sakauśikādyaiśca lāghavena balena ca /
ārjunirvyacaradyvomni bhṛśaṃ vai pakṣirāḍiva //

mayyeva nipatatyeṣa sāsirityūrdhvadṛṣṭayaḥ /
vivyadhustaṃ maheṣvāsaṃ samare chidradarsinaḥ //

kṣurapreṇa mahātejāstvaramāṇaḥ sapatnajit //

rādheyo niśitairbāṇairvyadhamaccarma cottamam //

vyasicarmeṣupūrṇāṅgaḥ so'ntarikṣātpunaḥ kṣitim /
āsthitaścakramudyamya droṇaṃ kruddho'bhyadhāvata //

sa cakrareṇūkajjvalaśobhitāṅgo babhāvatīvojjvalacakrapāṇiḥ /
raṇe'bhimanyuḥ kṣaṇamāsa raudraḥ sa vāsudevānukṛtiṃ prakurvan //

srutarudhirakṛtaikarāgavastro bhrukuṭipuṭākulito'tisiṃhanādaḥ /
prabhuramitabalo raṇe'bhimanyu-- rnṛpavaramadhyagato bhṛśaṃ vyarājat //