Mahabharata · Chapter 7.44

saindhavena niruddheṣu jayagṛddhiṣu pāṇ़ḍuṣu /
sughoramabhavadyuddhaṃ tvadīyānāṃ paraiḥ saha //

praviśyāthārjuniḥ senāṃ satyasandho durāsadaḥ /
vyakṣobhayata tejasvī makaraḥ sāgaraṃ yathā //

taṃ tathā śaravarṣeṇa chādayantamarindamam /
yathā pradhānāḥ saubhadramabhyayuḥ kurusattamāḥ //

teṣāṃ tasya ca sammardo dāruṇaḥ samapadyata /
sṛjatāṃ śaravarṣāṇi prasaktamamitaujasām //

rathavrajena saṃruddhastairamitraistathā'rjuniḥ /
vṛṣasenasya yantāraṃ hatvā ciccheda kārmukam //

taṃ ca vivyādha balavāṃstasya cāśvānajihmagaiḥ /
vātāyamānaistairaśvairvisañjño'pahṛto raṇāt //

tenāntareṇābhimanyoryantāpāsārayadratham /
rathavrajāstato hṛṣṭāḥ sādhusādhviti cukruśuḥ //

taṃ siṃhamiva saṅkruddhaṃ pramathnantaṃ śarairarīn /
ārādāyāntamabhyetya vasātīyo'bhyayāddrutam //

so'bhimanyuṃ śaraiḥ ṣaṣṭyā rukmapuṅkairavākirat /
abravīcca na me jīvañjīvato yudhi mokṣyase //

tamayasmayavarmāṇamiṣuṇā dūrapātinā /
vivyādha hṛdi saubhadraḥ sa papāta vyasuḥ kṣitau //

vasātīyaṃ hataṃ dṛṣṭvā kruddhāḥ kṣatriyapuṅgavāḥ /
parivavrustadā rājaṃstava pautraṃ jighāṃsavaḥ //

viṣphārayantaścāpāni nānārūpāṇyanekaśaḥ /
tadyuddhamabhavadraudraṃ saubhadrasyāribhiḥ saha //

teṣāṃ śarānseṣvasanāñśarīrāṇi śirāṃsi ca /
sakuṇḍalāni sragvīṇi kruddhaściccheda phālguniḥ //

sakhaṅgāḥ sāṅgulitrāṇāḥ sapaṭṭasaparaśvathāḥ /
adṛśyanta bhujāśchinnā hemābharaṇabhūṣitāḥ //

sragbhirābharaṇairvastraiḥ patitairvividhairdhvajaiḥ /
varmabhiścarmabhirhārairmukuṭaiśchatracāmaraiḥ //

upaskarairadhiṣṭhānairīṣādaṇḍakabandhuraiḥ /
akṣairvimathitaiścakrairbhagnaiśca bahudhā yugaiḥ //

anukarṣaiḥ patākābhistathā sārathivājibhiḥ /
rathaiśca bhagnairnāgaiśca hataiḥ kīrṇābhavanmahī //

nihataiḥ kṣatriyaiḥ śūrairnānājanapadeśvaraiḥ /
jayagṛddhairvṛtā bhūmirdāruṇā samapadyata //

diśo vicaratastasya sarvāśca pradiśastathā /
raṇe'bhimanyoḥ kruddhasya rūpamantaradhīyata //

kāñcanaṃ yadyadasyāsīdvarma cābharaṇāni ca /
dhanuṣaśca śarāṇāṃ ca tadapaśyāma kevalam //

taṃ tadā nāśakatkaściccakṣurbhyāmabhivīkṣitum /
ādadānaṃ śarairyodhānmadhye sūryamiva sthitam //