મહાભારત · અધ્યાય 7.44

સૈન્ધવેન નિરુદ્ધેષુ જયગૃદ્ધિષુ પાણ઼્ડુષુ ।
સુઘોરમભવદ્યુદ્ધં ત્વદીયાનાં પરૈઃ સહ ॥

પ્રવિશ્યાથાર્જુનિઃ સેનાં સત્યસન્ધો દુરાસદઃ ।
વ્યક્ષોભયત તેજસ્વી મકરઃ સાગરં યથા ॥

તં તથા શરવર્ષેણ છાદયન્તમરિન્દમમ્ ।
યથા પ્રધાનાઃ સૌભદ્રમભ્યયુઃ કુરુસત્તમાઃ ॥

તેષાં તસ્ય ચ સમ્મર્દો દારુણઃ સમપદ્યત ।
સૃજતાં શરવર્ષાણિ પ્રસક્તમમિતૌજસામ્ ॥

રથવ્રજેન સંરુદ્ધસ્તૈરમિત્રૈસ્તથાઽર્જુનિઃ ।
વૃષસેનસ્ય યન્તારં હત્વા ચિચ્છેદ કાર્મુકમ્ ॥

તં ચ વિવ્યાધ બલવાંસ્તસ્ય ચાશ્વાનજિહ્મગૈઃ ।
વાતાયમાનૈસ્તૈરશ્વૈર્વિસઞ્જ્ઞોઽપહૃતો રણાત્ ॥

તેનાન્તરેણાભિમન્યોર્યન્તાપાસારયદ્રથમ્ ।
રથવ્રજાસ્તતો હૃષ્ટાઃ સાધુસાધ્વિતિ ચુક્રુશુઃ ॥

તં સિંહમિવ સઙ્ક્રુદ્ધં પ્રમથ્નન્તં શરૈરરીન્ ।
આરાદાયાન્તમભ્યેત્ય વસાતીયોઽભ્યયાદ્દ્રુતમ્ ॥

સોઽભિમન્યું શરૈઃ ષષ્ટ્યા રુક્મપુઙ્કૈરવાકિરત્ ।
અબ્રવીચ્ચ ન મે જીવઞ્જીવતો યુધિ મોક્ષ્યસે ॥

તમયસ્મયવર્માણમિષુણા દૂરપાતિના ।
વિવ્યાધ હૃદિ સૌભદ્રઃ સ પપાત વ્યસુઃ ક્ષિતૌ ॥

વસાતીયં હતં દૃષ્ટ્વા ક્રુદ્ધાઃ ક્ષત્રિયપુઙ્ગવાઃ ।
પરિવવ્રુસ્તદા રાજંસ્તવ પૌત્રં જિઘાંસવઃ ॥

વિષ્ફારયન્તશ્ચાપાનિ નાનારૂપાણ્યનેકશઃ ।
તદ્યુદ્ધમભવદ્રૌદ્રં સૌભદ્રસ્યારિભિઃ સહ ॥

તેષાં શરાન્સેષ્વસનાઞ્શરીરાણિ શિરાંસિ ચ ।
સકુણ્ડલાનિ સ્રગ્વીણિ ક્રુદ્ધશ્ચિચ્છેદ ફાલ્ગુનિઃ ॥

સખઙ્ગાઃ સાઙ્ગુલિત્રાણાઃ સપટ્ટસપરશ્વથાઃ ।
અદૃશ્યન્ત ભુજાશ્છિન્ના હેમાભરણભૂષિતાઃ ॥

સ્રગ્ભિરાભરણૈર્વસ્ત્રૈઃ પતિતૈર્વિવિધૈર્ધ્વજૈઃ ।
વર્મભિશ્ચર્મભિર્હારૈર્મુકુટૈશ્છત્રચામરૈઃ ॥

ઉપસ્કરૈરધિષ્ઠાનૈરીષાદણ્ડકબન્ધુરૈઃ ।
અક્ષૈર્વિમથિતૈશ્ચક્રૈર્ભગ્નૈશ્ચ બહુધા યુગૈઃ ॥

અનુકર્ષૈઃ પતાકાભિસ્તથા સારથિવાજિભિઃ ।
રથૈશ્ચ ભગ્નૈર્નાગૈશ્ચ હતૈઃ કીર્ણાભવન્મહી ॥

નિહતૈઃ ક્ષત્રિયૈઃ શૂરૈર્નાનાજનપદેશ્વરૈઃ ।
જયગૃદ્ધૈર્વૃતા ભૂમિર્દારુણા સમપદ્યત ॥

દિશો વિચરતસ્તસ્ય સર્વાશ્ચ પ્રદિશસ્તથા ।
રણેઽભિમન્યોઃ ક્રુદ્ધસ્ય રૂપમન્તરધીયત ॥

કાઞ્ચનં યદ્યદસ્યાસીદ્વર્મ ચાભરણાનિ ચ ।
ધનુષશ્ચ શરાણાં ચ તદપશ્યામ કેવલમ્ ॥

તં તદા નાશકત્કશ્ચિચ્ચક્ષુર્ભ્યામભિવીક્ષિતુમ્ ।
આદદાનં શરૈર્યોધાન્મધ્યે સૂર્યમિવ સ્થિતમ્ ॥