Mahabharata · Chapter 7.45

ādadānastu śūrāṇāmāyuṃṣyabhavadārjuniḥ /
antakaḥ sarvabhūtānāṃ prāṇānkāla ivāgate //

sa śakra iva vikrāntaḥ śakrasūnoḥ suto balī /
abhimanyustadānīkaṃ loḍayansamadṛśyata //

praviśyaiva tu rājendra kṣatriyendrāntakopamaḥ /
satyaśravasamādatta vyāghro mṛgamivolbaṇaḥ //

satyaśravasi cākṣipte tvaramāṇā mahārathāḥ /
pragṛhya vipulaṃ śastramabhimanyumupādravan //

ahampūrvamahampūrvamiti kṣatriyapuṅgavāḥ /
spardhamānāḥ samājagmurjighāṃsanto'rjunātmajam //

kṣatriyāṇāmanīkāni pradrutānyabhidhāvatām /
jagrāha timirāsādya kṣudramatsyānivārṇive //

ye kecana gatāstasya samīpamapalāyinaḥ /
na te pratinyavartanta samudrādiva sindhavaḥ //

mahāgrahagṛhīteva vātavegabhayārditā /
samakampata sā senā vibhraṣṭā naurivārṇave //

atha rukmaratho nāma madreśvarasuto balī /
trastāmāśvāsayansenāmatrasto vākyamabravīt //

alaṃ trāsena vaḥ śūrā naiṣa kaścinmayi sthite /
ahamenaṃ grīhaṣyāmi jīvagrāhaṃ na saṃśayaḥ //

evamuktvā tu saubhadramabhidudrāva vīryavān /
sukalpitenohyamānaḥ syandanena virājatā //

so'bhimanyuṃ tribhirbāṇairviddhvā vakṣasyathānadat /
tribhiśca dakṣiṇe bāhau savye ca niśitaistribhiḥ //

sa tasyeṣvasanaṃ chittvā phālguniḥ savyadakṣiṇau /
bhujau śiraśca svakṣibhru kṣitau kṣipramapātayat //

dṛṣṭvā rukmarathaṃ rugṇaṃ putraṃ śalyasya māninam /
jīvagrāhaṃ jighṛkṣantaṃ saubhadreṇa yaśasvinā //

saṅgrāmadurmadā rājanrājaputrāḥ prahāriṇaḥ /
vayasyāḥ śalyaputrasya suvarṇavikṛtadhvajāḥ //

tālamātrāṇi cāpāni vikarṣanto mahābalāḥ /
ārjuniṃ śaravarṣeṇa samantātparyavārayan //

śūraiḥ nikṣābalopetaistaruṇairatyamarṣaṇaiḥ /
dṛṣṭvaikaṃ samare śūraṃ saubhadramaparājitam //

chādyamānaṃ śaravrātairhṛṣṭo duryodhano'bhavat /
vaivasvatasya bhavanaṃ gataṃ hyemamanyata //

suvarṇapuṅkhairiṣubhirnānāliṅgaiḥ sutejanaiḥ /
adṛśyamārjuniṃ cakrurnimeṣātte nṛpātmajāḥ //

sasūtāśvadhvajaṃ tasya syandanaṃ taṃ ca māriṣa /
ācitaṃ samapaśyāma śvāvidhaṃ śalalairiva //

sa gāḍhaviddhaḥ kruddhaśca totrairgaja ivārditaḥ /
gāndharvamastramāyacchadrathamāyāṃ ca bhārata //

arjuno tapastaptvā gandharvebhyo yadāhṛtam /
tumburupramukhebhyo vai tenāmohayatāhitān //

ekadhā śatadhā rājandṛśyate sma sahasradhā /
alātacakravatsaṅkhye kṣipramastrāṇi darśayan //

rathacaryāstramāyābhirmohayitvā parantapaḥ /
bibheda śatadhā rājañśarīrāṇi mahīkṣitām //

prāṇāḥ prāṇabhṛtāṃ saṅkhye preṣitā niśitaiḥ śaraiḥ /
rājanprāpurasuṃ lokaṃ śarīrāṇyavaniṃ yayuḥ //

dhanūṃṣyaśvānniyantṝṃśca dhvajānbāhūṃśca sāṅgadān /
sirāṃsi ca śitairbāṇaisteṣāṃ ciccheda phālguniḥ //

cūtārāmo yathā bhagnaḥ pañcavarṣaḥ phalopagaḥ /
rājaputraśataṃ tadvatsaubhadreṇa nipātitam //

kruddhāśīviṣasaṅkāśānsukumārānsukhocitān /
ekena nihatāndṛṣṭvā bhīto duryodhano'bhavat //

rathinaḥ kuñjarānaśvānpadātīṃścāvamarditān /
dṛṣṭvā duryodhanaḥ kṣipramupāyāttamamarṣitaḥ //

tayoḥ kṣaṇamivāpūrvaḥ saṅgrāmaḥ samapadyata /
athābhavatte vimukhaḥ putraḥ śaraśatāhataḥ //