Mahabharata · Chapter 7.43

yanmāṃ pṛcchasi rājendra sindhurājasya vikramam /
śṛṇu tatsarvamākhyāsye yathā pāṇḍūnayodhayat //

tamūhurvājino vaśyāḥ saindhavāḥ sādhuvāhinaḥ /
vikurvāṇā bṛhanto'śvāḥ śvasanoparaṃhasaḥ //

gandharvanagarākāraṃ vidhivatkalpitaṃ ratham /
tasyābhyaśobhayatketurvārāho rājato mahān //

śvetaścatrapatākābhiścāmaravyajanena ca /
sa babhau rājaliṅgaistaistārāpatirivāmbare //

muktāvajramaṇisvarṇairbhūṣitaṃ tadayasmayam /
varūthaṃ vibabhau tasya jyotirbhiḥ khamivāvṛtam //

sa viṣphārya mahaccāpaṃ kiranniṣugaṇānbahūna /
tatkaṇḍaṃ pūrayāmāsa yadārjuniradārayat //

sa sātyakiṃ tribhirbāṇairaṣṭabhiśca vṛkodaram /
dhṛṣṭadyumnaṃ tathā ṣaṣṭyā virāṭaṃ daśabhiḥ śaraiḥ //

drupadaṃ pañcabhistīkṣṇaiḥ saptabhiśca śikhaṇḍinam /
kekayānpañcaviṃśatyā draupadeyāṃstribhistribhiḥ //

yudhiṣṭhiraṃ tu saptatyā tataḥ śeṣānapānudat /
iṣujālena mahatā tadadbhutamivābhavat //

athāsya śitapītena bhallenādiśya kārmukam /
ciccheda prahasanrājā dharmaputraḥ pratāpavān //

akṣṇornimeṣamātreṇa so'nyadādāya kārmukam /
vivyādha daśabhiḥ pārthaṃ tāṃścaivānyāṃstribhistribhiḥ //

tattasya lāghavaṃ jñātvā bhīmo bhallaistribhistribhiḥ /
dhanurdhvajaṃ ca cchatraṃ ca kṣitau kṣipramapātayat //

so'nyadādāya balavānsajjaṃ kṛtvā ca kārmukam /
bhīmasyāpātayatketuṃ dhanuraśvāṃśca māriṣa //

sa hatāśvādavaplutya cchinnadhanvā rathottamāt /
sotyakerāpluto yānaṃ giryagramiva kesarī //

tatastvadīyāḥ saṃhṛṣṭāḥ sādhusādhviti vādinaḥ /
sindhurājasya tatkarma prekṣyāśraddheyamadbhutam //

saṅkruddhānpāṇḍavāneko yaddadhārāstratejasā /
tattasya karma bhūtāni sarvāṇyevābhyapūjayan //

saubhadreṇa hataiḥ pūrvaṃ sottarāyodhibhirdvipaiḥ /
pāṇḍūnāṃ darśitaḥ panthāḥ saindhavena nivāritaḥ //

yatamānāstu te vīrā mātsyapāñcālakekayāḥ /
pāṇḍavāścānvapadyanta pratiśekurna saindhavam //

yo yo hi yatate bhettuṃ droṇānīkaṃ tavāhitaḥ /
tattameva varaṃ prāpya saindhavaḥ pratyavārayat //