Mahabharata · Chapter 7.42

bālamatyantasukhinaṃ svabāhubaladarpitam /
yuddheṣvakuśalaṃ vīraṃ kulaputraṃ tanutyajam //

gāhamānamanīkāni sadaśvaiśca trihāyanaiḥ /
api yaudhiṣṭhirātsainyātkaścidanvapatadbalī //
sañjaya uvāca /

yudhiṣṭhiro bhīmasenaḥ śikhaṇḍī sātyakiryamau /
dhṛṣṭadyumno virāṭaśca drupadaśca saṅkekayaḥ //

dhṛṣṭaketuśca saṃrabdho mātsyāścābhyapatanraṇe /
tenaiva tu pathā yāntaḥ pitaro mātulaiḥ saha //

abhyadravanparīpsanto vyūḍhānīkāḥ prahāriṇaḥ /
tāndṛṣṭvā dravataḥ śūrāṃstvadīyā vimukhā'bhavan //

tatastadvimukhaṃ dṛṣṭvā tava sūnormahadbalam /
jāmātā tava tejasvī saṃstambhayiṣurādravat //

saindhavasya mahārāja putro rājā jayadrathaḥ /
sa putragṛddhinaḥ pārthānsahasainyānavārayat //

ugradhanvā maheṣvāso divyamastramudīrayan /
vārdhakṣatrirupāsedhatpravaṇādiva kuñjaraḥ //
dhṛtarāṣṭra uvāca /

katibhāramahaṃ manye saindhave sañjayāhitam /
yadekaḥ pāṇḍavānkruddhānpuprepsūnavārayat //

atyadbhutamahaṃ manye balaṃ śauryaṃ ca saindhave /
tasya prabrūhi me vīryaṃ karma cāgryaṃ mahātmanaḥ //

kiṃ japtaṃ hutamiṣṭaṃ vā kiṃ sutaptamatho tapaḥ /
damo vā brahmacaryaṃ vā sūta yaccāsya sattama //

devaṃ katamamārādhya viṣṇumīśānamabjajam /
sindhurāṭ tanaye saktānkruddhānpārthānavārayat //

naivaṃ kṛtaṃ mahatkarma bhīṣmeṇājñāsiṣaṃ tathā /
sindhurājo hi yenaikaḥ pāṇḍavānsamavārayat //
sañjaya uvāca /

dvīpadīharaṇe yattadbhīmasenena nirjitaḥ /
mānātsa taptavānrājā varārthī sumahattapaḥ //

indriyāṇīndriyārthebhyaḥ priyebhyaḥ sannivartya saḥ /
kṣutpipāsātakapasahaḥ kṛśo dhamanisantataḥ //

devamārādhayaccharvaṃ gṛṇanbrahma sanātanam /
bhaktānukampī bhagavāṃstasya cakre tato dayām //

svapnānte'pyatha caivāha haraḥ sindhupateḥ sutam /
varaṃ vṛṇīṣva prīto'smi jayadratha kimicchasi //

evamuktastu śarveṇa sindhurājo jayadrathaḥ /
uvāca praṇato rudraṃ prāñjalirniyatātmavān //

pāṇḍaveyānahaṃ saṅkhye bhīmavīryaparākramān /
vārayeyaṃ rathenaikaḥ samastāniti bhārata //

evamuktastu deveśo jayadrathamathābravīt / dadāmi te varaṃ saumya vinā pārthaṃ dhanañjayam /
vārayiṣyasi saṅgrāme caturaḥ pāṇḍunandanān //

ekāhamiti rājendra tatraivāntaradhīyata /
evamastviti deveśamuktvābuddhyata pārthivaḥ //

sa tena varadānena divyenāstbalena ca /
ekaḥ saṃvārayāmāsa pāṇḍavānāmanīkinīm //

tasya jyātalaghoṣeṇa kṣatriyānbhayamāviśat /
parāṃstu tava sainyasya harṣaḥ paramako'bhavat //

dṛṣṭvā tu kṣatriyā bhāraṃ saindhave sarvamāhitam /
utkruśyābhyadravanrājanyena yaudhiṣṭhiraṃ balam //