Mahabharata · Chapter 7.40

tataḥ samabhavadyuddhaṃ tayoḥ puruṣasiṃhayoḥ /
tasminkāle mahābāhuḥ saubhadraḥ paravīrahā //

saśaraṃ kārmukaṃ chittvā lāghavena vyapātayat /
duḥśāsanaṃ śaraistīkṣṇaiḥ santatakṣa samantataḥ //

śaravikṣatagātraṃ tu pratyamitramavasthitam /
abhimanyuḥ smayandhīmānduḥśāsanamathābravīt //

diṣṭyā paśyāmi saṅgrame māninaṃ śūramāgatam /
niṣṭhuraṃ tyaktadharmāṇamākrośanaparāyaṇam //

yatsabhāyāṃ tvayā rājño dhṛtarāṣṭrasya śṛṇvataḥ /
kopitaḥ paruṣairvākyairdharmarājo yudhiṣṭhiraḥ //

jayonmattena bhīmaśca bahvabaddhaṃ prabhāṣitaḥ /
akṣakūṭaṃ samāśritya saubalasyātmano balam //

tattvayedamanuprāptaṃ tasya kopānmahātmanaḥ /
paravittāpahārasya kodhasyāpraśamasya ca //

lobhasya jñānanāśasya drohasyātyāhitasya ca /
pitṝṇāṃ mama rājyasya haraṇasyogradhanvinām //

tattvayedamanuprāptaṃ prakopādvai mahātmanām /
sa tasyogramadharmasya phalaṃ prāpnuhi durmate //

śāsitā'smyadya te bāṇaiḥ sarvasainyasya paśyataḥ /
adyāhamanṛṇastasya kopasya bhavitā raṇe //

amarṣitāyāḥ kṛṣṇāyāḥ kāṅkṣitasya ca me pituḥ / adya kauravya bhīmasya bhavitāsmyanṛṇo yudhi /
na hi me mokṣyase jīvanyadi notsṛjase raṇaṃ //
sañjaya uvāca /

evamuktvā mahābāhurbāṇaṃ duḥśāsanāntakam /
sandadhe paravīraghnaḥ kālāgnyanilavarcasam //

tasyorastūrṇamāsādya jatrudeśe vibhidya tam / jagāma saha puṅkhena valmīkamiva pannagaḥ / athainaṃ pañcaviṃśatyā punareva samārpayat //

śarairagnisamasparśairākarṇasamacoditaiḥ / sa gāḍhaviddho vyathito rathopastha upāviśat / duḥśāsano mahārāja kaśmalaṃ cāviśanmahat //
sārathistvaramāṇastu duḥśāsanamacetanam / raṇamadhyādapovāha saubhadraśarapīḍitam //

pāṇḍavā draupadeyāśca virāṭaśca samīkṣya tam /
pāñcālāḥ kekayāścaiva siṃhanādamathānadan //

vāditrāṇi ca sarvāṇi nānāliṅgāni sarvaśaḥ /
prāvādayanta saṃhṛṣṭāḥ pāṇḍūnāṃ tatra sainikāḥ //

apaśyansmayamānāśca saubhadrasya viceṣṭitam /
atyantavairiṇaṃ dṛptaṃ dṛṣṭvā śatruṃ parājitam //

dharmamārutaśakrāṇāmaśvinoḥ pratimāstathā /
dhārayanto dhvajāgreṣu draupadeyā mahārathāḥ //

sātyakiścekitānaśca dhṛṣṭadyumnaśikhaṇḍinau /
kekayā dhṛṣṭaketuśca mātsyāḥ pāñcālasṛñjayāḥ //

pāṇḍavāśca mudā yuktā yudhiṣṭhirapurogamāḥ /
abhyadravanta tvaritā droṇānīkaṃ bibhitsavaḥ //

tato'bhavanmahāyuddhaṃ tvadīyānāṃ paraiḥ saha /
jayamākāṅkṣamāṇānāṃ śūrāṇāmanivartinām //

tathā tu vartamāne vai saṅgrāme'tibhayankare /
duryodhano mahārāja rādheyamidamabravīt //

paśya duḥśāsanaṃ vīramabhimanyuvaśangatam / pratapantamivādityaṃ nighnantaṃ śātravānraṇe /

atha caite susaṃrabdhāḥ siṃhā iva balotkaṭāḥ /
saubhadramudyatāstrātumabhyadhāvanta pāṇḍavāḥ //
sañjaya uvāca /

tataḥ karṇaḥ śaraistīkṣṇairabhimanyuṃ durāsadam /
abhyavarṣata saṅkruddhaḥ putrasya hitakṛttava //

tasya cānucarāṃstīkṣṇairvivyāgha parameṣubhiḥ /
avajñāpūrvakaṃ śūraḥ saubhadrasya paraṇājire //

abhimanyustu rādheyaṃ trisaptatyā śilīmukhaiḥ /
avidhyattvarito rājandroṇaṃ prepsurmahāmanāḥ //

taṃ tathā nāśakatkaściddoṇādvārayituṃ rathī /
ārujantaṃ rathavrātānvajrahastātmajātmajam //

tataḥ karṇo jayaprepsurmānī sarvadhanuṣmatām /
saubhadraṃ śataśo'vidhyaduttamāstrāṇi darśayan //

so'strairastravidāṃ śreṣṭho rāmaśiṣyaḥ pratāpavān /
samare śatrudurdharṣamabhimanyumapīḍayat //

sa tathā pīḍyamānastu rādheyenāstravṛṣṭibhiḥ /
samare'marasaṅkāśaḥ saubhadro na vyaśīryata //

tataḥ śilāśitaistīkṣṇairbhallairānataparvabhiḥ /
chittvā dhanūṃṣi śūrāṇāmārjuniḥ karṇamārdayat //

dhanurmaṇḍalanirmuktaiḥ śarairāśīviṣopamaiḥ /
sacchatradhvajayantāraṃ sāśvamāśu smayanniva //

karṇo'pi cāsya cikṣepa bāṇānsannataparvaṇaḥ /
asambrāntaśca tānsarvānagṛhṇātphalgunātmajaḥ //

tato muhūrtātkarṇasya bāṇenaikena vīryavān /
sadhvajaṃ kārmukaṃ vīraśchittvā bhūmāvapātayat //

tataḥ kṛcchragataṃ karṇaṃ dṛṣṭvā karṇādanantaraḥ /
saubhadramabhyayāttūrṇaṃ dṛḍhamudyamya kārmukam //

tata uccukruśuḥ pārthāsteṣāṃ cānucarā janāḥ /
vāditrāṇi ca sañjaghnaḥ saubhadraṃ cāpi tuṣṭuvuḥ //