Mahabharata · Chapter 7.39

dvaidhībhavati me cittaṃ śucā tuṣṭyā ca sañjaya /
mama putrasya yatnainyaṃ saubhadraḥ samavārayat //

vistareṇaiva me śaṃsa sarvaṃ gāvalgaṇe punaḥ /
vikrīḍitaṃ kumārasya skandasyevāsuraiḥ saha //
sañjaya uvāca /

hanta te sampravakṣyāmi vimardamatidāruṇam /
ekasya ca bahūnāṃ ca yathāsīttumulo raṇaḥ //

abhimanyuḥ kṛtotsāhaḥ kṛtotsāhānarindamān /
rathastho rathinaḥ sarvāṃstāvakānabhyavarṣayat //

droṇaṃ karṇaṃ kṛpaṃ śalyaṃ drauṇiṃ bhojaṃ bṛhadbalam //
duryodhanaṃ saumadattiṃ śakuniṃ ca mahābalam //

nānānṛpānnṛpasutānsainyāni vividhāni ca /
alātacakravatsarvāṃścaranbāṇaiḥ samārpayat //

nighnannamitrānsaubhadraḥ paramāstraiḥ pratāpavān /
adarśayata tejasvī dikṣu sarvāsu bhārata //

taddṛṣṭvā caritaṃ tasya saubhadrasyāmitaujasaḥ /
samakampanta sainyāni tvadīyāni sahasraśaḥ //

athābravīnmahāprājño bhāradvājaḥ pratāpavān /
harṣeṇotphullanayanaḥ kṛpamābhāṣya satvaram //

ghaṭayanniva marmāṇi putrasya tava bhārata /
abhimanyuṃ raṇe dṛṣṭvā tadā raṇaviśāradam //
droṇa uvāca /

eṣa gacchati saubhadraḥ pārthānāṃ prathito yuvā /
nandayansuhṛdaḥ sarvānrājānaṃ ca yudhiṣṭhiram //

nakulaṃ sahadevaṃ ca bhīmasenaṃ ca pāṇḍavam /
bandhūnsambandhinaścānyānmadhyasthānsuhṛdastathā //

nāsya yuddhe samaṃ manye kañcidanyaṃ dhanurdharam /
icchanhanyādimāṃ senāṃ kimarthamapi necchati //
sañjaya uvāca /

droṇasya prītisaṃyuktaṃ śrutvā vākyaṃ tavātmajaḥ /
ārjuniṃ prati saṅkruddho droṇaṃ dṛṣṭvā smayanniva //

atha duryodhanaḥ karṇamabravīdbāhlikaṃ nṛpaḥ /
duḥśāsanaṃ madrarājaṃ tāṃstathā'nyānmahārathān //

sarvabhūrdhābhiṣiktānāmācāryo brahmavittamaḥ /
arjunasya sutaṃ mūḍhaṃ nāyaṃ hantumihecchati //

na hyasya samare yuddhyedantako'pyātatāyinaḥ /
kimaṅga punarevānyo martyaḥ satyaṃ bravīmi vaḥ //

arjunasya sutaṃ tveṣa śiṣyatvādabhirakṣati /
śiṣyāḥ putrāśca dayitāstadapatyaṃ ca dharmiṇām //

saṃrakṣyamāṇo droṇena manyate vīryamātmanaḥ /
ātmasambhāvito mūḍhastaṃ pramathnīta māciram //

evamuktāstu te rājñā sātvatīputramabhyayuḥ /
saṃrabdhāste jighāṃsanto bhāradvājasya paśyataḥ //

duḥśāsanastu tacchrutvā duryodhanavacastadā /
abravītkuruśārdūla duryodhanamidaṃ vacaḥ //

ahamenaṃ haniṣyāmi mahārāja bravīmi te /
miṣatāṃ pāṇḍu putrāṇāṃ pāñcālānāṃ ca paśyatām //

grasiṣyāmyadya saubhadraṃ yathā rāhurdivākaram /
utkruśya cābravīdvākyaṃ kururājamidaṃ punaḥ //

śrutvā kṛṣṇau mayā grastaṃ saubhadramatimāninau /
gamiṣyataḥ pretalokaṃ jīvalokānna saṃśayaḥ //

tau ca śrutvā mṛtau vyaktaṃ pāṇḍoḥ kṣetrodbhavāḥ sutāḥ /
ekāhvā sasuhṛdvargāḥ klaibyāddhāsyanti jīvitam //

tasmādasminhate śatrau hatāḥ sarve'hitāstava /
śivena māṃ dhyāhi rājanneṣa hanmi ripūṃstava //
sañjaya uvāca /

evamuktvā'nadadrājanputro duḥśāsanastava /
saubhadramabhyayātkruddhaḥ śaravarṣairavākiran //

tamatikruddhamāyāntaṃ tava putramarindamaḥ /
abhimanyuḥ śaraistīkṣṇaiḥ ṣaḍviṃśatyā samārpayat //

duḥśāsanastu saṅkruddhaḥ prabhinna iva kuñjaraḥ /
ayodhayata saubhadramabhimanyuśca taṃ raṇe //

tau maṇḍalāni citrāṇi rathābhyāṃ savyadakṣiṇam /
caramāṇāvayudhyetāṃ rathaśikṣāviśāradau //

atha paṇavamṛdaṅgadundubhīnāṃ krakacamahānakabherijharjharāṇam /
ninadamatibhṛśaṃ narāḥ pracakru-- rlavaṇajalodbhavasiṃhanādamiśram //