Mahabharata · Chapter 7.38

tathā pramathamānaṃ taṃ maheṣvāsānajihmagaiḥ /
ārjuniṃ māmakāḥ saṅkhye ke tvenaṃ samavārayan //
sañjaya uvāca /

śṛṇu rājankumārasya raṇe vikrīḍitaṃ mahat /
bibhitsato rathānīkaṃ bhāradvājena rakṣitam //

madreśaṃ sāditaṃ dṛṣṭvā saubhadreṇāśugai raṇe /
śalyādavarajaḥ kruddha krinbāṇānsamabhyayāt //

sa viddhvā daśabhirbāṇaiḥ sāśvayantāramārjunim /
udakrośanmahāśabdaṃ tiṣṭhatiṣṭheti cābravīt //

tasyārjuniḥ śirogrīvaṃ pāṇipādaṃ dhanurhayān /
chatraṃ dhvajaṃ niyantāraṃ triveṇuṃ cāpyupaskaram //

cakraṃ yugaṃ ca tūṇīraṃ hyanukarṣaṃ sāyakaiḥ /
patākāṃ cakragoptārau sarvopakaraṇāni ca //

laghuhastaḥ praciccheda dadṛśe taṃ na kaścana /
sa papāta kṣitau kṣīṇaḥ praviddhābharaṇāmbaraḥ //

vāyuneva mahācaityaḥ samūlaṃ citravedikaḥ /
anugāstasya vitrastāḥ prādravansarvato diśaḥ //

ārjuneḥ karma taddṛṣṭvā sampraṇeduḥ samantataḥ /
nādena sarvabhūtāni sādhusādhviti bhārata //

śalyabhrātaryathārugṇe bahuśastasya sainikāḥ /
kulādhivāsanāmāni śrāvayanto'rjunātmajam //

abhyadhāvanta saṅkruddhā vividhāyudhapāṇayaḥ /
rathairaśvairgajaiścānye padbhiścānye balotkaṭāḥ //

bāṇaśabdena mahatā rathanemisvanena ca /
hunkāraiḥ kṣveḍitotkṛṣṭaiḥ siṃhanādaiḥ sagarjitaiḥ //

jyātalatrasvanairanye garjanto'rjunanandanam /
bruvantaśca na no jīvanmokṣyase jīvitāditi //

tāṃstathā bruvato dṛṣṭvā saubhadraḥ prahasanniva /
yo yosmai prāharatpūrvaṃ taṃ taṃ vivyādha patribhiḥ //

sandarśayiṣyannastrāṇi vicitrāṇi laghūni ca /
ārjuniḥ samare śūro mṛdupūrvamayudhyata //

vāsudevādupāttaṃ yadastraṃ yacca dhanañjayāt /
adarśayata tatkārṣṇiḥ kṛṣṇābhyāmaviśeṣavat //

dūramasya guruṃ bhāraṃ sādhvasaṃ ca punaḥ punaḥ /
sandadhadvisṛjaṃśceṣūnnirviśeṣamadṛśyata //

cāpamaṇḍalamevāsya visphuraddikṣvadṛśyata /
sudīptasya śaratkāle saviturmaṇḍalaṃ yathā //

jyāśabdaḥ śuśruve tasya talaśabdaśca dāruṇaḥ /
mahāśanimucaḥ kāle payodasyeva niḥsvanaḥ //

hīmānamarṣī saubhadro mānakṛtpriyadarśanaḥ /
sammimānayiṣurvīrāniṣvastraiścāpyayudhyata //

mṛdurbhūtvā mahārāja dāruṇaḥ samapadyata /
varṣābhyatīto bhagavāñśaradīva divākaraḥ //

śarānvicitrānsubahūnrukmapuṅkhāñśilāśitān /
mumoca śataśaḥ kruddho gabhastīniva bhāskaraḥ //

kṣuraprairvatsadantaiśca vipāṭheśca mahāyaśāḥ /
nārācairardhacandrābhairbhallairañjalikairapi //

avākiradrathānīkaṃ bhāradvājasya paśyataḥ /
tatastatsainyamabhavadvimukhaṃ śarapīḍitam //