Mahabharata · Chapter 7.37

tāṃ prabhāgnāṃ camūṃ dṛṣṭvā saubhadreṇāmitaujasā /
duryodhano bhṛśaṃ kruddhaḥ svayaṃ saubhadramabhyayāt //

tato rājānamāvṛttaṃ saubhadraṃ prati saṃyuge /
dṛṣṭvā droṇo'bravīdyodhānparīpsadhvaṃ narādhipam //

purā'bhimanyurlakṣaṃ naḥ paśyatāṃ hanti vīryavān / tamādravata mābhaiṣṭa kṣipraṃ rakṣata kauravam /
sañjaya uvāca /

evamuktāstatastena bhāradvājena dhīmatā / kṛtajñānabalotsedhāḥ suhṛdo jitakāśinaḥ /
trāsyamānā bhayādvīraṃ parivavrustavātmajam //

droṇo drauṇiḥ kṛpaḥ karṇaḥ kṛtavarmā ca saubalaḥ /
bṛhadbalo madrarājo bhūrirbhūriśravāḥ śalaḥ //

pauravo vṛṣasenaśca visṛjantaḥ śitāñśarān /
saubhadraṃ śaravarṣeṇa mahatā samavākiran //

sammohayitvā tamatha duryodhanamamocayan /
āsyādgrāsamivākṣiptaṃ mamṛṣe nārjunātmajaḥ //

tāñśaraugheṇa mahatā sāśvasūtānmahārathān /
vimukhīkṛtya saubhadraḥ siṃhanādamathānadat //

tasya nādaṃ tataḥ śrutvā siṃhasyevāmiṣaiṣiṇaḥ /
nāmṛṣyanta susaṃrabdhāḥ punardroṇamukhā rathāḥ //

ta enaṃ koṣṭhakīkṛtya rathavaṃśena māriṣa /
vyasṛjanniṣujālāni nānāliṅgāni saṅghaśaḥ //

tānyantarikṣe ciccheda pautraste niśitaiḥ śaraiḥ /
tāṃścaiva prativivyādha tadadbhutamivābhavat //

tato rathapadātyoghāḥ kuñjarāḥ sādinaśca ha / kopitāstena śūreṇa śarairāśīviṣopamaiḥ /
parivabrurjighāṃsantaḥ saubhadramaparājitam //

samudramiva paryastaṃ tvadīyaṃ taṃ balārṇavam /
dadhāraiko'rjunirbāṇairvelevodvṛttamarṇavam //

śūrāṇāṃ yudhyamānānāṃ nighnatāmitaretaram /
abhimanyoḥ pareṣāṃ ca nāsītkaścitparāṅmukhaḥ //

tasmiṃstu ghore saṅgrāme vartamāne bhayaṅkare /
duḥsaho navabhirbāṇairabhimanyumavidhyata //

duḥśāno dvādaśabhiḥ kṛpaḥ śāradvatastribhiḥ /
droṇastu saptadaśabhiḥ śarairāśīviṣopamaiḥ //

viviṃśatistu saptatyā kṛtavarmā ca saptabhiḥ /
bṛhadbalastathā'ṣṭābhiraśvatthāmā ca saptabhiḥ //

bhūriśravāstribhirbāṇairmadreśaḥ ṣaṅbhirāśugaiḥ /
dvābhyāṃ śarābhyāṃ śakunistribhirduryodhano nṛpaḥ //

sa tu tānprativivyādha tribhistribhirajihmagaiḥ /

nṛtyanniva mahārāja cāpahastaḥ pratāpavān //

tato'bhimanyuḥ saṅkruddhastrāsyamānastavātmajaiḥ /
vidarśayanvai sumahacchikṣaurasakṛtaṃ balam //

garuḍānilaraṃhobhiryanturvākyakarairhayaiḥ /
abhyadravata taṃ kārṣṇimaśmakendraḥ kṛtatvaraḥ //

aśvāścāśmakamādāya tvaramāṇā'bhyahārayan /
vivyādha daśabhirbāṇaistiṣṭhatiṣṭheti cābravīt //

tasyābhimanyurdaśabhirhayānsūtaṃ dhvajaṃ śaraiḥ /
bāhū dhanuḥ śiraścorvyāṃ smayamāno'bhyapātayat //

tatastasminhate vīre saubhadreṇāśmakeśvare /
sañcacāla balaṃ sarvaṃ palāyanaparāyaṇam //

tataḥ karṇaḥ kṛpo droṇo drauṇirgāndhārarāṭ śalaḥ / śalyo bhūriśravāḥ krāthaḥ somadatto viviṃśatiḥ /
vṛṣasenaḥ suṣeṇaśca kuṇḍabhedī pratardanaḥ //

bṛndārako lalitthaśca prabāhurdīrghalocanaḥ /
duryodhanaśca saṅkruddhaḥ śaravarṣairavākiran //

so'tividdho maheṣvāsairabhimanyurajihmagaiḥ /
śaramādatta karṇāya varmakāyāvabhedinam //

tasya bhittvā tanutrāṇaṃ dehaṃ nirbhidya cāśugaḥ /
prāviśaddharaṇīṃ vegādvalmī kamiva pannagaḥ //

sa tenātiprahāreṇa vyathito vihvalanniva /
sañcacāla raṇe karṇaḥ kṣitikampe yathā'calaḥ //

tathānyairniśitairbāṇaiḥ suṣeṇaṃ dīrghalocanam /
kuṇḍabhediṃ ca saṅkruddhastribhistrīnavadhīdbalī //

karṇastaṃ pañcaviṃśatyā nārācānāṃ samārpayat /
aśvatthāmā ca viṃśatyā kṛtavarmā ca saptabhiḥ //

sa śarācitasarvāṅgaḥ kruddhaḥ śakrātmajātmajaḥ /
vicarandadṛśe sainye pāśahasta ivāntakaḥ //

śalyaṃ ca śaravarṣeṇa samīpasthāmavākirat /
udakrośanmahābāhustava sainyāni bhīṣayan //

tataḥ sa viddho'stravidā marmabhidbhirajihmagaiḥ /
śalyo rājanrathopasthe niṣasāda mumoha ca //

taṃ hi dṛṣṭvā tathā viddhaṃ saubhadreṇa yaśāsvinā /
samprādravaccamūḥ sarvā bhāradvājasya paśyataḥ //

samprekṣya taṃ mahābāhuṃ rukmapuṅkhaiḥ samāvṛtam /
tvadīyāḥ prapalāyante mṛgāḥ siṃhārditā iva //

saubhadraśaranirbhagnāḥ samare'maravikramāḥ /
evaṃ śalyo vimṛditastava pautreṇa bhārata //

sa tu raṇayaśasā'bhipūjyamānaḥ pitṛsuracāraṇasiddhayakṣasaṅgaiḥ
avanitalagataiśca bhūtasaṅghai-- rativibabhau hutabhugyathā'jyasiktaḥ //