મહાભારત · અધ્યાય 7.38

તથા પ્રમથમાનં તં મહેષ્વાસાનજિહ્મગૈઃ ।
આર્જુનિં મામકાઃ સઙ્ખ્યે કે ત્વેનં સમવારયન્ ॥
સઞ્જય ઉવાચ ।

શૃણુ રાજન્કુમારસ્ય રણે વિક્રીડિતં મહત્ ।
બિભિત્સતો રથાનીકં ભારદ્વાજેન રક્ષિતમ્ ॥

મદ્રેશં સાદિતં દૃષ્ટ્વા સૌભદ્રેણાશુગૈ રણે ।
શલ્યાદવરજઃ ક્રુદ્ધ ક્રિન્બાણાન્સમભ્યયાત્ ॥

સ વિદ્ધ્વા દશભિર્બાણૈઃ સાશ્વયન્તારમાર્જુનિમ્ ।
ઉદક્રોશન્મહાશબ્દં તિષ્ઠતિષ્ઠેતિ ચાબ્રવીત્ ॥

તસ્યાર્જુનિઃ શિરોગ્રીવં પાણિપાદં ધનુર્હયાન્ ।
છત્રં ધ્વજં નિયન્તારં ત્રિવેણું ચાપ્યુપસ્કરમ્ ॥

ચક્રં યુગં ચ તૂણીરં હ્યનુકર્ષં સાયકૈઃ ।
પતાકાં ચક્રગોપ્તારૌ સર્વોપકરણાનિ ચ ॥

લઘુહસ્તઃ પ્રચિચ્છેદ દદૃશે તં ન કશ્ચન ।
સ પપાત ક્ષિતૌ ક્ષીણઃ પ્રવિદ્ધાભરણામ્બરઃ ॥

વાયુનેવ મહાચૈત્યઃ સમૂલં ચિત્રવેદિકઃ ।
અનુગાસ્તસ્ય વિત્રસ્તાઃ પ્રાદ્રવન્સર્વતો દિશઃ ॥

આર્જુનેઃ કર્મ તદ્દૃષ્ટ્વા સમ્પ્રણેદુઃ સમન્તતઃ ।
નાદેન સર્વભૂતાનિ સાધુસાધ્વિતિ ભારત ॥

શલ્યભ્રાતર્યથારુગ્ણે બહુશસ્તસ્ય સૈનિકાઃ ।
કુલાધિવાસનામાનિ શ્રાવયન્તોઽર્જુનાત્મજમ્ ॥

અભ્યધાવન્ત સઙ્ક્રુદ્ધા વિવિધાયુધપાણયઃ ।
રથૈરશ્વૈર્ગજૈશ્ચાન્યે પદ્ભિશ્ચાન્યે બલોત્કટાઃ ॥

બાણશબ્દેન મહતા રથનેમિસ્વનેન ચ ।
હુન્કારૈઃ ક્ષ્વેડિતોત્કૃષ્ટૈઃ સિંહનાદૈઃ સગર્જિતૈઃ ॥

જ્યાતલત્રસ્વનૈરન્યે ગર્જન્તોઽર્જુનનન્દનમ્ ।
બ્રુવન્તશ્ચ ન નો જીવન્મોક્ષ્યસે જીવિતાદિતિ ॥

તાંસ્તથા બ્રુવતો દૃષ્ટ્વા સૌભદ્રઃ પ્રહસન્નિવ ।
યો યોસ્મૈ પ્રાહરત્પૂર્વં તં તં વિવ્યાધ પત્રિભિઃ ॥

સન્દર્શયિષ્યન્નસ્ત્રાણિ વિચિત્રાણિ લઘૂનિ ચ ।
આર્જુનિઃ સમરે શૂરો મૃદુપૂર્વમયુધ્યત ॥

વાસુદેવાદુપાત્તં યદસ્ત્રં યચ્ચ ધનઞ્જયાત્ ।
અદર્શયત તત્કાર્ષ્ણિઃ કૃષ્ણાભ્યામવિશેષવત્ ॥

દૂરમસ્ય ગુરું ભારં સાધ્વસં ચ પુનઃ પુનઃ ।
સન્દધદ્વિસૃજંશ્ચેષૂન્નિર્વિશેષમદૃશ્યત ॥

ચાપમણ્ડલમેવાસ્ય વિસ્ફુરદ્દિક્ષ્વદૃશ્યત ।
સુદીપ્તસ્ય શરત્કાલે સવિતુર્મણ્ડલં યથા ॥

જ્યાશબ્દઃ શુશ્રુવે તસ્ય તલશબ્દશ્ચ દારુણઃ ।
મહાશનિમુચઃ કાલે પયોદસ્યેવ નિઃસ્વનઃ ॥

હીમાનમર્ષી સૌભદ્રો માનકૃત્પ્રિયદર્શનઃ ।
સમ્મિમાનયિષુર્વીરાનિષ્વસ્ત્રૈશ્ચાપ્યયુધ્યત ॥

મૃદુર્ભૂત્વા મહારાજ દારુણઃ સમપદ્યત ।
વર્ષાભ્યતીતો ભગવાઞ્શરદીવ દિવાકરઃ ॥

શરાન્વિચિત્રાન્સુબહૂન્રુક્મપુઙ્ખાઞ્શિલાશિતાન્ ।
મુમોચ શતશઃ ક્રુદ્ધો ગભસ્તીનિવ ભાસ્કરઃ ॥

ક્ષુરપ્રૈર્વત્સદન્તૈશ્ચ વિપાઠેશ્ચ મહાયશાઃ ।
નારાચૈરર્ધચન્દ્રાભૈર્ભલ્લૈરઞ્જલિકૈરપિ ॥

અવાકિરદ્રથાનીકં ભારદ્વાજસ્ય પશ્યતઃ ।
તતસ્તત્સૈન્યમભવદ્વિમુખં શરપીડિતમ્ ॥