Mahabharata · Chapter 7.36

saubhadrastadvacaḥ śrutvā dharmarājasya dhīmataḥ /
acodayata yantāraṃ droṇānīkāya bhārata //

tena sañcodyamānastu yāhiyāhīti sārathiḥ /
pratyuvāca tato rājannabhimanyumidaṃ vacaḥ //

atibhāro'yamāyuṣmannāhitastvayi pāṇḍavaiḥ /
sampradhārya kṣaṇaṃ buddhyā tatastvaṃ yoddhumarhasi //

ācāryo hi kṛtī droṇaḥ paramāstre kṛtaśramaḥ /
tvaṃ tu bālaḥ sa balavānsaṅgrāmāṇāmakovidaḥ //

tato'bhimanyuḥ prahasansārathiṃ vākyamabravīt /
sārathe konvayaṃ droṇaḥ samagraṃ kṣatrameva vā //

vyavasāyo hi me yoddhuṃ raṇotsavasamudyataḥ /
airāvatagataṃ śakraṃ sahāmaragaṇairaham //

athavā rudramīśānaṃ sarvabhūtagaṇārcitam /
yodhayeyaṃ raṇamukhe na me kṣatre'dya vismayaḥ //

yaccaitatpaśyase sūta sayodhāśvarathadvipam /
tanmamādya dviṣatsainyaṃ kalāmarhati ṣoḍaśīm //

api viśvajitaṃ viṣṇuṃ mātulaṃ prāpya sūtaja /
pitaraṃ cārjunaṃ yuddhe na bhīrmāmupayāsyati //
sañjaya uvāca /

evamapyucyamānaḥ sa sārathistaṃ punaḥ punaḥ /
vīra te tena mā yuddhamiti saubhadramabravīt //

abhimanyuśca tāṃ vācaṃ kadarthīkṛtya sāratheḥ /
yāhītyevābravīdenaṃ droṇānīkāya māciram //

tataḥ sannodayāmāsa hayānāśu trihāyanān /
nātihṛṣṭamanāḥ sūto hemabhāṇḍaparicchadān //

te preṣitāḥ sumitreṇa droṇānīkāya vājinaḥ /
droṇamabhyadravanrājanmahāvegā mahābalāḥ //

tamudīkṣya tathāyāntaṃ sarve droṇapurogamāḥ /
abhyavartanta kauravyāḥ pāṇḍavāśca tamanvayuḥ //

sakarṇikārapravarocchritadhvajaḥ suvarṇavarmā'rjunirarjunādvaraḥ /
yuyutsayā droṇamukhānmahārathān samāsadatsiṃhaśiśuryathā dvipān //

te viṃśatipade yattāḥ samprahāraṃ pracakrire /
āsīdgāṅga ivāvarto muhūrtamudadhāviva //

śūrāṇāṃ yudhyamānānāṃ nighnatāmitaretaram /
saṅgrāmastumulo rājanprāvartata sudāruṇaḥ //

pravartamāne saṅgrāme tasminnatibhayaṅkare /
droṇasya miṣato vyūhaṃ bhittvā vyacaradārjuniḥ //

tadabhedyamanādhṛṣyaṃ droṇānīkaṃ sudurjayam /
bhittvārjunirasambhrānto viveśācintyavikramaḥ //

taṃ praviṣṭaṃ vinighnantaṃ śatrusaṅghānmahābalam /
hastyaśvarathapattyaughāḥ parivavrurudāyudhāḥ //

nānāvāditraninadaiḥ kṣveḍitotkruṣṭagarjitaiḥ /
huṅkāraiḥ siṃhanādaiśca tiṣṭha tiṣṭheti niḥsvanaiḥ //

ghorairhalahalāśabdairmāgāstiṣṭhaihi māmiti /
asāvahamamitreti pravadanto muhurmuhuḥ //

bṛṃhitaiḥ śiñjitairhāsaiḥ karanemisvanairapi /
sannādayanto vasudhāmabhidudruvurārjunim //

teṣāmāpatatāṃ vīraḥ śīghrayodhī mahābalaḥ /
kṣiprāstro nyavadhīdrājanmarmajño marmabhedibhiḥ //

te hanyamānā vivaśā nānāliṅgaiḥ śitaiḥ śaraiḥ /
abhipetuḥ subahuśaḥ śalabhā iva pāvakam //

tatasteṣāṃ śarīraiśca śarīrāvayavaiśca saḥ /
santaṃstāra kṣitiṃ kṣipraṃ kuśairvedimivādhvare //

baddhagodhāṅgulitrāṇānsaśarāsanasāyakān /
sāsicarmāṅkuśābhīṣūnsatomaraparaśvathān //

sagadāyoguḍaprāsānsarṣṭitomarapaṭṭasān /
sabhiṇḍipālaparighānyaśaktivarakampanān //

sapratodamahāśaṅkhānsakuntānsakacagrahān /
samudgarakṣepaṇīyānsapāśaparighopalān //

sakeyūrāṅgadānbāhūnhṛdyagandhānulepanān /
s̤añcicchedārjunirvṛttāṃstvadīyānāṃ sahasraśaḥ //

taiḥ sphuradbhirmahārāja śuśubhe bhūḥ sulohitaiḥ /
pañcāsyaiḥ pannagaiśchinnairgaruḍeneva māriṣa //

sunāsānanakeśāntairavraṇaiścārukuṇḍalaiḥ /
sandaṣṭauṣṭhapuṭaiḥ krodhātkṣaradbhiḥ śoṇitaṃ bahu //

sacārumukuṭoṣṇīṣairmaṇiratnavibhūṣitaiḥ /
vinālanalinākārairdivākaraśaśiprabhaiḥ //

hitapriyaṃvadaiḥ kāle bahubhiḥ puṇyagandhibhiḥ /
dviṣacchirobhiḥ pṛthivīṃ sa vai tastāra phālguniḥ //

gandharvanagarākārānvidhivatkalpitānrathān /
vīṣāmukhānvitriveṇūnnyastadaṇḍakabandhurān //

vijaṅghākūbarāṃstatra vinemīṃśra vyarānapi /
vicakropaskaropasthānbhagnopakaraṇānapi //

samāsthitānyodhavarairdāntāśvānsādhusārathīn /
vipatākādhvajacchatrānvitūṇīrāyudhānapi //

prapātitopastaraṇānhatayodhānsahasraśaḥ /
śarairviśakalīkurvandikṣu sarvāsvadṛśyata //

punardvipāndvipārohānvaijayantyaṅkuśadhvajān /
tūṇānvarmāṇyatho kakṣyā graiveyāṃśca sakambalān //

ghaṇṭāḥ śuṇḍāviṣāṇāgrāñchatramālāḥ padānugān /
śarairniśitadhārāgraiḥ śātravāṇāmaśātayat //

vanāyujānpārvatīyānkāmbhojānatha bāhlikān /
sthiravāladhikarṇākṣāñjavanānsādhuvāhinaḥ //

ārūḍhāñśikṣitairyodhaiḥ śaktyṛṣṭiprāsayodhibhiḥ /
vidhvastacāmaramukhānvipraviddhaprakīrṇakān //

nirastajihvānayanānniṣkīrṇāntrayakṛddhanān /
hatārohāṃśchinnaghaṇṭānkravyādagaṇamodakān //

nikṛttacarmakavacāñśakṛnmūtrāsṛgāplutān / nipātayannaśvavarāṃstāvakānsa vyarocata / eko viṣṇurivācintyaṃ kṛtvā karma suduṣkaram //

tathā nirmāthitaṃ tena caturaṅgabalaṃ mahat /
yathā'surabalaṃ ghoraṃ tryambakena mahaujasā //

kṛtvā karma raṇe'sahyaṃ parairārjunirāhave /
abhinacca padātyoghāṃstvadīyāneva sarvaśaḥ //

evamekena tāṃ senāṃ saubhadreṇa sitaiḥ śaraiḥ /
bhṛśaṃ viprahatāṃ dṛṣṭvā skandenevāsurīṃ camūm //

tvadīyāstava putrāśca vīkṣamāṇā diśo daśa /
saṃśuṣkāsyāścalannetrāḥ prasvinnā romaharṣiṇaḥ //

palāyanakṛtotsāhā nirutsāhā dviṣajjaye /
gotranāmabhiranyonyaṃ krandanto jīvitaiṣiṇaḥ //

hatānputrānpitṝnbhrātṝnbandhūnsambandhinastathā /
prātiṣṭhanta samutsṛjya tvarayanto hayadvipān //