Mahabharata · Chapter 7.30

priyamindrasya satataṃ sakhāyamamitaujasam /
hatvā prāgjyotiṣaṃ pārthaḥ pradakṣiṇamavartata //

tato gāndhārarājasya sutau parapurañjayau /
ardetāmarjunaṃ saṅkhye bhrātarau vṛṣakācalau //

tau sametyārjunaṃ vīrau puraḥ paścācca dhanvitau /
avidhyetāṃ mahāvegairniśitairāśugairbhṛśam //

vṛṣakasya hayānsūtaṃ dhanuśchatraṃ rathaṃ dhvajam /
tilaśo vyadhamatpārthaḥ saubalasya śitaiḥ śaraiḥ //

tato'rjunaḥ śaravrātairjānāpraharaṇairapi /
gāndhārānākulāṃścakre saubalapramukhānpunaḥ //

tataḥ pañcaśatānvīrāngāndhārānudyatāyudhān /
prāhiṇonmṛtyulokāya kruddho bāṇairdhanañjayaḥ //

hatāśvāttu rathāttūrṇamavatīrya mahābhujaḥ /
āruroha rathaṃ bhrāturanyaśca dhanurādade //

tāvekarathamārūḍhau bhrātarau vṛṣakācalau /
śaravarṣeṇa bībhatsumavidhyetāṃ muhurmuhuḥ //

syālau tava mahātmānau rājānau vṛṣakācalau /
bhṛśaṃ vijaghnatuḥ pārthamindraṃ vṛtrabalāviva //

labdhalakṣau tu gāndhārāvahatāṃ pāṇḍavaṃ punaḥ /
naidāghavārṣikau māsau lokaṃ gharmāṃśubhiryathā //

tau rathasthau naravyāghrau rājānau vṛṣakācalau /
saṃściṣṭāṅgau sthitau rājañjaghānaikeṣuṇā'rjunaḥ //

tau rathātsiṃhasankāśau lohitākṣau mahābhujau /
rājansampetaturvīrau sodaryāvekalakṣaṇau //

tayorbhūmiṃ gatau dehau rathādbandhujanapriyau /
yaśo daśaḥ diśaḥ puṇyaṃ gamayitvā vyavasthitau //

dṛṣṭvā vinihatau saṅkhye mātulāvapalāyinau /
bhṛśaṃ mumucuraśrūṇi putrāstava viśāmpate //

nihatau bhrātarau dṛṣṭvā māyāśataviśāradaḥ /
kṛṣṇau sammohanmāyāṃ vidadhe śakunistataḥ //

laguḍāyoguḍāśmānaḥ śataghnyaśca saśaktayaḥ /
gadāparighanistriṃśaśūlamudgarapaṭṭasāḥ //

sakampanarṣṭinakharā musalāni paraśvathāḥ /
kṣurāḥ kṣurapranālīkā vatsadantāsthisandhayaḥ //

cakrāṇi viśikhāḥ prāsā vividhānyāyudhāni ca /
prapetuḥ śataśo digbhyaḥ pradigbhyaścārjunaṃ prati //

kharoṣṭramahiṣāḥ siṃhā vyāghrāḥ sṛmaracitrakāḥ /
ṛkṣāḥ sālāvṛkā gṛdhrāḥ kapayaśca sarīsṛpāḥ //

vividhāni ca rakṣāṃsi kṣudhitānyarjunaṃ prati /
saṅkruddhānyabhyadhāvanta vividhāni vayāṃsi ca //

tato divyāstravicchūraḥ kuntīputro dhanañjayaḥ /
visṛjanniṣujālāni sahasā tānyatāḍayat //

te hanyamānāḥ śūreṇa pravaraiḥ sāyakairdṛḍhaiḥ /
viruvanto mahārāvānvineśuḥ sarvato hatāḥ //

tatastamaḥ prādurabhūdarjunasya rathaṃ prati /
tasmācca tamaso vacāḥ krūrāḥ pārthamabhartsayan //

tattamo bhairavaṃ ghoraṃ bhayakartṛ mahāhave /
uttamāstreṇa mahatā jyautiṣeṇārjuno'vadhīt //

hate tasmiñjalaughāstu prādurāsanbhayānakāḥ / ambhasastasya nāśārthamādityāstramathārjunaḥ /
prāyuṅktāmbhastatastena prāyaśo'streṇa śoṣitam //

evaṃ bahuvidhā māyāḥ saubalasya kṛtāḥ kṛtāḥ /
jaghānāstrabalenāśu prahasannarjuno'bravīt //

durdyūtadevingāndhāre nākṣānkṣipati gāṇḍivam /
jvalitānniśitāṃstīkṣṇāñśarānkṣipatigāṇḍivaṃ //

tadā hatāsu māyāsu trasto'rjunaśarāhataḥ /
apāyāñjavanairaśvaiḥ śakuniḥ prākṛto yathā //

tato'rjuno'stravicchaighryaṃ darśayannātmano'riṣu /
abhyavarṣaccharaudheṇa kauravāṇāmanīkinīm //

sā hanyamānā pārthena tava putrasya vāhinī /
dvaidhībhūtā mahārāja gaṅgevāsādya parvatam //

droṇamevānvapadyanta kecittatra nararṣabhāḥ /
kecidduryodhanaṃ rājannardyamānāḥ kirīṭinā //

nāpaśyāma tatastvenaṃ sainye vai rajasāvṛte /
gāṇḍīvasya ca nirghoṣaḥ śruto dakṣiṇato mayā //

śaṅkhadundubhinirghoṣaṃ vāditrāṇāṃ ca niḥsvanam /
gāṇḍīvasya tu nirghoṣo vyatikramyāspṛśaddivam //

tataḥ punardakṣiṇataḥ saṅgrāmaścitrayodhinām /
suyuddhaṃ cārjunasyāsīdahaṃ droṇamanviyām //

yaudhiṣṭhirābhyanīkāni praharanti tatastataḥ / nānāvidhānyanīkāni putrāṇāṃ tava bhārata /
arjuno vyadhamatkāle divīvābhrāṇi mārutaḥ //

taṃ vāsavamivāyāntaṃ bhūrivarṣaṃ śaraughiṇam /
maheṣvāsā naravyāghrā nograṃ kecidavārayan //

te hanyamānāḥ pārthena tvadīyā vyathitā bhṛśam /
svāneva bahavo jaghnurvidravantastatastataḥ //

te'rjunena śarā muktāḥ kaṅkapatrāstanucchidaḥ /
śalabhā iva sampetuḥ saṃvṛṇvānā diśo daśa //

turagaṃ rathinaṃ nāgaṃ padātimapi māriṣa /
vinirbhidya kṣitiṃ jagmurvalmīkamiva pannagāḥ //

na ca dvitīyaṃ vyasṛjatkuñjarāśvanareṣu saḥ /
pṛthagekaśarārugṇā nipetuste gatāsavaḥ //

hatairmanuṣyaurdviradaiśca sarvataḥ śarābhisṛṣṭaiśca hayairnipātitaiḥ /
tadā'śvagomāyubalābhināditaṃ vicitramāyodhaśiro babhūva tat //

pitā sutaṃ tyajati suhṛdvaraṃ suhṛt tathaiva putraḥ pitaraṃ śarāturaḥ /
svarakṣaṇe kṛtamatayastadā janā satyajanti vāhānapi pārthapīḍitāḥ //