Mahabharata · Chapter 7.31

teṣvanīkeṣu bhagneṣu pāṇḍuputreṇa sañjaya / 5-31-1bcalitānāṃ drutānāṃ ca kathamāsīnmanāṃsi vaḥ //

ānīkānāṃ prabhagnānāmavasthānamapaśyatām /
duṣkaraṃ pratisandhānaṃ tanmamācakṣva sañjaya //
sañjaya uvāca /

tathāpi tava putrasya priyakāmā viśāmpate /
yaśaḥ pravīrā lokeṣu rakṣanto droṇamanvayuḥ //

samudyateṣu cāstreṣu samprāpte ca yudhiṣṭhire /
akurvannāryakarmāṇi bhairave satyabhītavat //

antaraṃ bhīmasenasya prāpatannamitaujasaḥ /
sātyakeścaiva vīrasya dhṛṣṭadyumnasya vā vibho //

droṇaṃ droṇamiti krūrāḥ pāñcālāḥ samacodayan /
mā droṇamiti putrāste kurūnsarvānacodayan //

droṇaṃ droṇamiti hyeke mā droṇamiti cāpare /
kurūṇāṃ pāṇḍavānāṃ ca droṇadyūtamavateta //

yaṃyaṃ pramathate droṇaḥ pāñcālānāṃ rathavrajam /
tatratatra tu pāñcālyo dhṛṣṭadyumno'bhyavartata //

teṣāṃ bhāgyaviparyāsaiḥ saṅgrāme bhairave sati /
vīrāḥ samāsadanvīrānkurvanto bhairavaṃ ravam //

akampanīyāḥ śatrūṇāṃ babhūvustatra pāṇḍavāḥ /
akampayannanīkāni smarantaḥ kleśamātmanaḥ //

te tvamarṣavaśaṃ prāptā hīmantaḥ satvacoditāḥ /
tyaktvā prāṇānnyavartanta ghnanto droṇaṃ mahāhave //

ayāsamiva sampātaḥ śilānāmiva cābhavat /
dīvyatāṃ tumule yuddhe prāṇairamitatejasām //

nānusmaranti saṅgrāmamapi vṛddhāstathāvidham /
ye pūrvadevairdevānāmapaśyanyuddhamadbhutam //

prākampateva pṛthivī tasminvīrāvasādane /
nivartatā balaughena mahatā bhārapīḍitā //

ghūrṇato'pi balaughasya divaṃ stabdhveva niḥsvanaḥ /
ajātaśatrostatsainyamāviveśa subhairavaḥ //

samāsādya tu pāṇḍūnāmanīkāni sahasraśaḥ /
droṇena caratā saṅkhye prabhagnāni śitaiḥ śaraiḥ //

teṣu pramathyamāneṣu droṇenādbhutakarmaṇā /
paryavarāyadāsādya droṇaṃ senāpatiḥ svayam //

tadadbhutamabhūdyuddhaṃ droṇapāñcālayostathā /
naiva tasyopamā kāciditi me niścitā matiḥ //

tato nīlo'nalaprakhyo dadāha kuruvāhinīm /
śaraskuliṅgaścāpārcirdihankakṣamivānalaḥ //

taṃ dahantamanīkāni droṇaputraḥ pratāpavān /
pūrvābhibhāṣī suślakṣṇaṃ smayamāno'bhyabhāṣata //

nīla kiṃ bahubhirdagdhaistava yodhaiḥ sarārciṣā /
mayaikena hi yudhyasva kruddhaḥ prahara cāśu mām //

taṃ padmanikarākāraṃ padmapatranibhekṣaṇam /
vyākośapadmābhamukho nīlo vivyādha sāyakaiḥ //

tenāpi viddhaḥ sahasā drauṇirbhallaiḥ śitaistribhiḥ /
dhanurdhvajaṃ ca cchatraṃ ca dviṣataḥ sannyakṛntata //

sa plutaḥ syandanāttasmānnīlaścarmavarāsibhṛt /
drauṇāyaneḥ śiraḥ kāyāddhartumaicchatpatattrivat //

tasyodyatāseḥ sunasaṃ śiraḥ kāyātsakuṇḍalam /
bhallenāpāharaddrauṇiḥ smayamāna ivānagha //

sampūrṇacandrābhamukhaḥ padmapatranibhekṣaṇaḥ /
prāṃśurutpalapatrābho nihato nyapatadbhuvi //

tataḥ pravivyathe senā pāṇḍavī bhṛśamākulā /
ācāryaputreṇa hate nīle jvalitatejasi //

acintayaṃśca te sarve pāṇḍavānāṃ mahārathāḥ /
kathaṃ no vāsavistrāyācchatrubhya iti māriṣa //

dakṣiṇena tu senāyāḥ kurute kadanaṃ balī /
saṃśaptakāvaśeṣasya nārāyaṇabalasya ca //