Mahabharata · Chapter 7.29

tathā kruddhaḥ kimakarodbhagadattasya pāṇḍavaḥ /
prāgjyotiṣo vā pārthasya tanme śaṃsa yathātatham //
sañjaya uvāca /

prāgjyotiṣeṇa saṃsaktāvubhau dāśārhapāṇḍavau /
mṛtyudaṃṣṭrāntikaṃ prāptau sarvabhūtāni menire //

tathā tu śaravarṣāṇi pātayatyaniśaṃ prabho /
gajaskandhānmahārāja kṛṣṇayoḥ syandanasthayoḥ //

atha kārṣṇāyasairbāṇaiḥ pūrṇakārmukaniḥsṛtaiḥ /
avidhyaddevakīputraṃ hemapuṅkhaiḥ śilāśitaiḥ //

agnisparśasamāstīkṣṇā bhagadattena coditāḥ /
nirbhidya devakīputraṃ kṣitiṃ jagmuḥ suvāsasaḥ //

tasya pārtho dhanuśchittvā parivāraṃ nihatya ca /
lālayanniva rājānaṃ bhagadattamayodhayat //

so'rkaraśminibhāṃstīkṣṇāṃstomarānvai caturdaśa /
apreṣayatsavyasācī dvidhaikaikamathācchinat //

tato nāgasya tadvarma vyadhamatpākaśāsaniḥ /
śarajālena mahatā tadvyaśīryata bhūtale //

śīrṇavarmā sa tu gajaḥ śaraiḥ subhṛśamarditaḥ /
babhau dhārānipātākto vyabhraḥ parvatarāḍiva //

tataḥ prāgjyotiṣaḥ śaktiṃ hemadaṇḍāmayasmayīm /
vyasṛjadvāsudevāya dvidhā tāmarjuno'cchinat //

tataśchatraṃ dhvajaṃ caiva cchittvā rājño'rjunaḥ śaraiḥ /
vivyādha daśabhistūrṇamutsmayanparvateśvaram //

so'tividdho'rjunaśaraiḥ supuṅkhaiḥ kaṅkapatribhiḥ /
bhagadattastataḥ kruddhaḥ pāṇḍavasya janādhipaḥ //

vyasṛjattomarānmūrdhni śvetāśvasyonnāda ca /
tairarjunasya samare kirīṭaṃ parivartitam //

parivṛttaṃ kirīṭaṃ tadyamayanneva pāṇḍavaḥ /
sudṛṣṭaḥ kriyatāṃ loka iti rājānamabravīt //

evamuktastu saṅkruddhaḥ śaravarṣeṇa pāṇḍavam /
abhyavarṣatsa govindaṃ dhanurādāya bhāsvaram //

tasya pārtho dhanuśchittvā tūṇīrānsannikṛtya ca /
tvaramāṇo dvisaptatyā sarvamarmasvatāḍayat //

viddhastato'tivyathito vaiṣṇavāstramudīrayan /
abhimantryāṅkuśaṃ kruddho vyasṛjatpāṇḍavorasi //

visṛṣṭaṃ bhagadattena tadastraṃ sarvaghāti vai /
urasā pratijagrāha pārthaṃ sañchādya keśavaḥ //

vaijayantyabhavanmālā tadastraṃ keśavorasi /
padmakośavicitrā sā sarvartukusumotkarā //

jvalanārkenduvarṇābhā pāvakojjvalapallavā /
tayā padmapalāśinyā vātakampitapatrayā //

śuśubhe'bhyadhikaṃ śauriratasīpuṣpasannibhaḥ /
tato'rjunaḥ klāntamanāḥ keśavaṃ pratyabhāṣata //

ayudhyamānasturagānsaṃyantāsmi janārdana /
ityuktvā puṇḍarīkākṣa pratijñāṃ svāṃ na rakṣasi //

yadyahaṃ vyasanī vā syāmaśakto vā nivāraṇe /
tatastvayaivaṃ kāryaṃ syānna tu kāryaṃ mayi sthite //

sabāṇaḥ sadhanuścāhaṃ sasuhāsuramānuṣān /
śakto lokānimāñjetuṃ taccāpi viditaṃ tava //

tato'rjunaṃ vāsudevaḥ pratyuvācāryavadvacaḥ /
śṛṇu guhyamidaṃ pārtha purāvṛttaṃ yathā'nagha //

yeyaṃ bhūtadharā devī sarvabhūtadharā dharā /
sakāmā lokakartāraṃ nārāyaṇamupasthitā //

sa saṅgatya tayā sārdhaṃ prītastasyā varaṃ dadau /
sā vavre viṣṇusadṛśaṃ putramastraṃ ca vaiṣṇavam //

babhūva ca sutastasyā narako nāma viśrutaḥ /
astraṃ ca vaiṣṇavaṃ tasmai dadau nārāyaṇaḥ svayam //

tadevaṃ narakasyāsīdastraṃ sarvāhitāntakam /
tasmātprāgjyotiṣaṃ prāptaṃ sarvaśastravighātanam //

nāsyāvadhyo'sti loke'sminmadanyaḥ kaścidarjuna /
tasmānmayā kṛtaṃ hyetanmā bhūtte buddhiranyathā //
sañjaya uvāca /

anunīya tu dāśārhaḥ pāṇḍavaṃ tvarito'bravīt /
jahi prāgjyotiṣaṃ kṣipraṃ vākyaśeṣaṃ ca me śṛṇu //

caturmūrtirahaṃ śaśvallokatrāṇārthamudyataḥ /
ātmānaṃ pravibhajyeha lokānāṃ hitamādadhe //

ekā mūrtistapaścaryāṃ kurute me bhuvi sthitā /
aparā paśyati jagatkurvāṇaṃ sādhvasādhunī //

aparā kurute karma mānuṣaṃ lokamāśritā /
śete caturthīṃ tvaparā nidrāṃ varṣasahasrikīm //

yā'sau varṣasahasrānte mūrtiruttiṣṭhate mama /
varārhebhyo varāñśreṣṭhāṃstasminkāle dadāti sā //

taṃ tu kālamanuprāptaṃ viditvā pṛthivī tadā /
ayācata varaṃ yanmāṃ narakārthāya tacchṛṇu //

devānāṃ dānavānāṃ ca avadhyastanayo'stu me /
upeto vaiṣṇavāstreṇa tanme tvaṃ dātumarhasi //

evaṃ varamahaṃ śrutvā jagatyāstanaye tadā /
amoghamastraṃ prāyacchaṃ vaiṣṇavaṃ paramaṃ purā //

avocaṃ caitadastraṃ vai hyamoghaṃ bhavatu kṣame /
narakasyābhirakṣārthaṃ nainaṃ kaścidvadhiṣyati //

anenāstreṇa te guptaḥ sutaḥ parabalārdanaḥ /
bhaviṣyati durādharṣaḥ sarvalokeṣu sarvadā //

tathetyuktvā gatā devī kṛtakāmā manasvinī /
sa cāpyāsīddurādharṣo narakaḥ śatrutāpanaḥ //

tasmātprāgjyotiṣaṃ prāptaṃ tadastraṃ pārtha māmakam /
nāsyāvadhyo'sti lokeṣu sendrarudreṣu māriṣa //

tanmayā tvatkṛte caitadanyathaivopanirmitam /
viyuktaṃ paramāstreṇa jahi pārtha mahāsuram //

avadhyo'yaṃ mahāstreṇa bhagadattaḥ surāsuraiḥ / vairiṇaṃ jahi durdharṣaṃ bhagadattaṃ suradviṣam /
yathā'haṃ jaghnivānpūrvaṃ hitārthaṃ narakaṃ tathā //
sañjaya uvāca /

evamuktastadā pārthaḥ keśavena mahātmanā /
bhagadattaṃ śitairbāṇaiḥ sahasā samavākirat //

tataḥ pārtho mahābāhurasambhrānto mahāmanāḥ /
kumbhayorantare nāgaṃ nārācena samārpayat //

sa samāsādya taṃ nāgaṃ bāṇo vajra ivācalam /
abhyagātsaha puṅkhena valmīkamiva pannagaḥ //

sa karī bhagadattena preryamāṇo muhurmuhuḥ /
na karoti vacastasya daridrasyeva yoṣitā //

sa tu viṣṭabhya gātrāṇi dantābhyāmavaniṃ yayau /
nadannārtasvanaṃ prāṇānutsasarja mahādvipaḥ //

tato gāṇḍīvadhanvānamabhyabhāṣata keśavaḥ /
ayaṃ mahattaraḥ pārtha palitena samāvṛtaḥ //

valīsañchannanayanaḥ śūraḥ paramadrurjayaḥ /
akṣṇorunmīlanārthāya baddhapaṭṭo hyasau nṛpaḥ //

devavākyātpraciccheda śareṇa bhṛśamarjunaḥ /
chinnamātreṃ'śuke tasminruddhanetro babhūva saḥ //

tamomayaṃ jaganmene bhagadattaḥ pratāpavān /
tataścandrārdhabimbena bāṇena nataparvaṇā //

bibheda hṛdayaṃ rājño bhagadattasya pāṇḍavaḥ /
sa bhinnahṛdayo rājā bhagadattaḥ kirīṭinā //

śarāsanaṃ śarāṃścaiva gatāsuḥ pramumoca ha / śirasastasya vibhraṣṭaṃ papāta ca varāṃśukam /
nālatāḍanavibhraṣṭaṃ palāśaṃ nalinādiva //

sa hemamālī tapanīyabhāṇḍā tpapāta nāgādgirisannikāśāt /
supuṣpito mārutavegabhagno mahīdharāgrādiva karṇikāraḥ //

nihatya taṃ narapatimindravikramaṃ sasvāyamindrasya tadaindrirāhave /
tato'parāṃstava jayakāṅkṣiṇo narān babhañja vāyurbalavāndrumāniva //