Mahabharata · Chapter 7.22

bhāradvājena bhagneṣu pāṇḍaveṣu mahāmṛdhe /
pāñcāleṣu ca sarveṣu kaścidanyo'bhyavartata //

āryāṃ yuddhe matiṃ kṛtvā kṣatriyāṇāṃ yaśaskarīm /
asevitāṃ kāpuruṣaiḥ sevitāṃ puruṣarṣabhaiḥ //

sa hi vīronnataḥ śūro yo bhagneṣu nivartate /
aho nāsītpumānkaściddṛṣṭvā droṇaṃ vyavasthitam //

jṛmbhamāṇamiva vyāghraṃ prabhinnamiva kuñjaram /
tyajantamāhave prāṇānsannaddhaṃ citrayodhinam //

maheṣvāsaṃ naravyāghraṃ dviṣatāṃ bhayavardhanam /
kṛtajñaṃ satyanirataṃ duryodhanahitaiṣiṇam //

bhāradvājaṃ tathā'nīke dṛṣṭvā śūramavasthitam /
ke śūrāḥ sannyavartanta tanmamācakṣva sañjaya //
sañcaya uvāca /

tāndṛṣṭvā calitānsaṅkhye praṇunnāndroṇasāyakaiḥ /
pāñcālānpāṇvānmātsyānsṛñjayāṃścedikekayān //

droṇacāpavimuktena śaraugheṇāśu hāriṇā /
sindhoriva mahaudhena hiyamāṇānyathā plavān //

kauravāḥ siṃhanādena nānāvādyasvanena ca /
rathadvipanarāṃścaiva sarvataḥ samavārayan //

tānpaśyansainyamadhyastho rājā svajanasamvṛtaḥ /
duryodhano'bravītkarṇaṃ prahṛṣṭaḥ prahasanniva //
duryodhana uvāca /

paśya rādheya pāñcālānpraṇunnāndroṇasāyakaiḥ /
siṃheneva mṛgānvanyāṃstrāsitāndṛḍhadhanvanā //

naite jātu punaryuddhamīheyuriti me matiḥ /
yathā tu bhagnā droṇena vāteneva mahādrumāḥ //

ardyamānāḥ śarairete rukmapuṅkhairmahātmanā /
pathā naikena gacchanti ghūrṇamānāstatastataḥ //

sanniruddhāśca kauravyairdroṇena ca mahātmanā /
ete'nye maṇḍalībhūtāḥ pāvakeneva kuñjarāḥ //

bhramarairiva cāviṣṭā droṇasya niśitaiḥ śaraiḥ /
anyonyaṃ samalīyanta palāyanaparāyaṇāḥ //

eṣa bhīmo mahākrodhī hīnaḥ pāṇḍavasṛñjayaiḥ /
madīyairāvṛto yodhaiḥ karṇa nandayatīva mām //

vyaktaṃ droṇamayaṃ lokamadya paśyati durmatiḥ /
nirāśo jīvitānnūnamadya rājyācca pāṇḍavaḥ //
karṇa uvāca /

naiṣa jātu mahābāhurjīvannāhavamutsṛjet /
na cemānpuruṣavyāghra siṃhanādānsahiṣyati //

na cāpi pāṇḍavā yuddhe bhajyeranniti me matiḥ /
śūrāśca balavantaśca kṛtāstrā yuddhadurmadāḥ //

viṣāgnidyūtasaṅkleśānvanavāsaṃ ca pāṇḍavāḥ /
smaramāṇā na hāsyanti saṅgrāmamiti me matiḥ //

nivṛtto hi mahābāhuramitaujā vṛkodaraḥ /
varānvarānhi kaunteyo rathodārānhaniṣyati //

asinā dhanuṣā śakyā hayairnāgairnarai sthaiḥ /
āyasena ca daṇḍena vrātānvrātānhaniṣyati //

tamenamanuvartante sātyakipramukhā rathāḥ /
pāñcālāḥ kekayā māstyāḥ pāśḍavāśca viśeṣataḥ //

śūrāśca balavantaśca vikrāntāśca mahārathāḥ /
vinighnantaśca bhīmena saṃrabdhenābhicoditāḥ //

te droṇamabhivartante sarvataḥ kurupuṅgavāḥ /
vṛkodaraṃ parīpsantaḥ sūryamabhragaṇā iva //

samareṣu tu nirdiṣṭāḥ pāṇḍavāḥ kṛṣṇabāndhavāḥ /
pāñcālāḥ kekayā mātsyāḥ pāṇḍaveyāśca sarvaśaḥ //

śūrāśca balavantaśca vikrāntāśca mahārathāḥ /
hīmantaḥ śatrumaraṇe nipuṇāḥ puṇyalakṣaṇāḥ //

bahavaḥ pārthivā rājaṃsteṣāṃ vaśagatā raṇe /
māvamaṃsthāḥ pāṇḍavāṃstvaṃ nārāyaṇapurogamān //

ekāyanagatā hyete pīḍayeyuryatavratam /
arakṣamāṇaṃ śalabhā yathā dīpaṃ mumūrṣavaḥ //

asaṃśayaṃ kṛtāstrāśca paryāptāścāpi vāraṇe /
atibhāramahaṃ manye bhāradvāje samāhitam //

te śīghramanugacchāmo yatra droṇo vyavasthitaḥ /
kokā iva mahānāgaṃ mā vai hanyuryatavratam //
sañjaya uvāca /

rādheyasya vacaḥ śrutvā rājā duryodhanastataḥ /
bhrātṛbhiḥ sahito rājanprāyāddroṇarathaṃ prati //

tatrārāvo mahānāsīdekaṃ droṇaṃ jighāṃsatām /
pāṇḍavānāṃ nivṛttānāṃ nānāvarṇairhayottamaiḥ //