Mahabharata · Chapter 7.21

tato yudhiṣṭhiro droṇaṃ dṛṣṭvāntikamupāgatam /
mahatā śaravarṣeṇa pratyagṛhṇādabhītavat //

tato halahalāśabda āsīdyaudhiṣṭhire bale /
jighṛkṣati mahāsiṃhe gajānāmiva yūthapam //

dṛṣṭvā droṇaṃ tataḥ śūraḥ satyajitsatyavikramaḥ /
yudhiṣṭhiramabhiprepsurācāryaṃ samupādravat //

tata ācāryapāñcālyau yuyudhāte mahābalau /
vikṣobhayantau tatsainyamindravairocanāviva //

tato droṇaṃ maheṣvāsaḥ satyajitsatyavikramaḥ /
avidhyanniśitāgreṇa paramāstraṃ vidarśayan //

tathāsya sāratheḥ pañca śarānsarpaviṣopamān /
amuñcadantakaprakhyānsammumohāsya sārathiḥ //

athāsya sahasā'vidhyaddhayāndaśabhirāśugaiḥ /
daśabhirdaśabhiḥ kruddha ubhau ca pārṣṇisārathī //

maṇḍalaṃ tu samāvṛtya vicaranpṛtanāmukhe /
dhvajaṃ ciccheda ca kruddho droṇasyāmitrakarṣaṇaḥ //

droṇastu tatsamālokya caritaṃ tasya saṃyuge /
manasā cintayāmāsa prāptakālamarindamaḥ //

tataḥ satyajitaṃ tīkṣṇairdaśabhirmarmabhedabhiḥ /
avidhyacchīghramācāryaśchittvā'sya saśaraṃ dhanuḥ //

sa śīghrataramādāya dhanuranyatpratāpavān /
droṇamabyahanadrājaṃstriṃśatā kaṅkapatribhiḥ //

dṛṣṭvā satyajitā droṇaṃ grasyamānamivāhave /
vṛkaḥ śaraśataistīkṣṇaiḥ pāñcālyo droṇamārdayat //

sañchādyamānaṃ samare droṇaṃ dṛṣṭvā mahāratham /
cukruśuḥ pāṇḍavā rājanvastrāṇi dudhuvuśca ha //

vṛkastu paramakruddho droṇaṃ ṣaṣṭyā stanāntare /
vivyādha balavānrājaṃstadadbhutamivābhavat //

droṇastu śaravarṣeṇa cchādyamāno mahārathaḥ /
vegaṃ cakre mahāvegaḥ krodhādudvṛtya cakṣuṣī //

tataḥ satyajitaścāpaṃ chittvā droṇo vṛkasya ca /
ṣaḍbhiḥ sasūtaṃ sahayaṃ śarairdroṇo'vadhīdvṛkam //

athānyaddhanurādāya satyajidvegavattaram /
sāśvaṃ sasūtaṃ viśikhairdroṇaṃ vivyādha sadhvajam //

sa tanna mamṛṣe droṇaḥ pāñcālyenārdito mṛdhe /
tatastasya vināśāya satvaraṃ vyasṛjaccharān //

hayāndhvajaṃ dhanurmuṣṭimubhau ca pārṣṇisārathī /
avākirattato droṇaḥ śaravarṣaiḥ sahasraśaḥ //

tathā sañchidyamāneṣu kārmukeṣu punaḥpunaḥ /
pāñcālyaḥ paramāstrajñaḥ śoṇāśvaṃ samayodhayat //

sa satyajitamālokya tathodīrṇaṃ mahāhave /
ardhacandreṇa ciccheda śirastasya mahātmanaḥ //

tasminhate mahāmātre pāñcālānāṃ mahārathe /
apāyājjavanairaśvairdroṇāttrasto yudhiṣṭhiraḥ //

pāñcālāḥ kekayā mātsyāścedikārūśakosalāḥ /
yudhiṣṭhiramabhīpsanto dṛṣṭvā droṇamupādravan //

tato yudhiṣṭhiraṃ prepsurācāryaḥ śatrupūgahā /
vyadhamattānyanīkāni tūlarāśimivānalaḥ //

nirdahantamanīkāni tāni tāni punaḥpunaḥ /
droṇaṃ matsyādavarajaḥ śatānīko'bhyavartata //

sūryaraśmipratīkāśaiḥ karmāraparimārjitaiḥ /
ṣaḍbhiḥ sasūtaṃ sahayaṃ droṇaṃ viddhvā'nadadbhṛśam //

krūrāya karmaṇe yuktaścikīrṣuḥ karma duṣkaram /
avākiraccharaśatairbhāradvājaṃ mahāratham //

tasya nānadato droṇaḥ śiraḥ kāyātsakuṇḍalam /
kṣureṇāpāharatturṇaṃ tato matsyāḥ pradudruvuḥ //

matsyāñjitvā'jayaccedīnkarūśānkekayānapi /
pāñcālānsṛñjayānpāṇḍūnbhāradvājaḥ punaḥpunaḥ //

taṃ dahantamanīkāni kruddhamagniṃ yathā vanam /
dṛṣṭvā rukmarathaṃ vīraṃ samakampanta sṛñjayāḥ //

ubhābhyāṃ sandadhānasya dhanurasyāśukāriṇaḥ /
jyāghoṣo nighnato'mitrāndikṣusarvāsu śuśruve //

nāgānaśvānpadātīṃśca rathino gajasādinaḥ /
raudrā hastavatā muktāḥ pramathnanti sma sāyakāḥ //

nānadyamānaḥ parjanyo miśravāto himātyaye /
aśmavarṣamivāvarṣanpareṣāṃ bhayamādadhat //

sarvā diśaḥ samacaratsainyaṃ vikṣobhayanniva /
balī śūro maheṣvāso mitrāṇāmabhayaṅkaraḥ //

tasya vidyudivābhreṣu cāpaṃ hemapariṣkṛtam /
dikṣu sarvāsu paśyāmo droṇasyāmitatejasaḥ //

śobhamānāṃ dhvaje cāsya vedīmadrākṣya bhārata /
himavacchikharākāraṃ carataḥ saṃyuge bhṛśam //

droṇastu pāṇḍavānīke cakāra kadanaṃ mahat /
yathā daityagaṇe viṣṇuḥ surāsuranamaskṛtaḥ //

sa śūraḥ satyavākprājño balavānsatyavikramaḥ /
mahānubhāvaḥ kalpānte raudrāṃ bhīruvibhīṣaṇām //

kavacormidhvajāvartāṃ martyakūlāpahāriṇīm //
gajavājimahāgrāhāmasimīnāṃ durāsadām //

vīrāsyiśarkarāṃ raudrāṃ bherīmurajakacchapām /
carmavarmaplavāṃ ghorāṃ keśaśaivalaśādvalām //

śaraughiṇīṃ dhanuḥsrotāṃ bāhupannagasaṅkulām /
raṇabhūmivahāṃ tīvrāṃ kurusṛñjayavāhinīm //

manuṣyaśīrṣapāṣāṇāṃ śaktimīnāṃ gadoḍupām /
uṣṇīṣaphenavasanāṃ vikīrṇāntrasarīsṛpām //

vīrāpahāriṇīmugrāṃ māṃsaśomitakardamām /
hastigrāhāṃ ketuvṛkṣāṃ kṣatriyāṇāṃ nimajjanīm //

krūrāṃ śarīrasaṅghāṭāṃ sādinakrāṃ duratyayām /
droṇaḥ prāvartayattatra nadīmantakagāminīm //

kravyādagaṇasañjuṣṭāṃ śvaśṛgālagaṇāyutām /
niṣevitāṃ mahāraudraiḥ piśitāśaiḥ samantataḥ //

taṃ dahantamanīkāni rathodāraṃ kṛtāntavat /
sarvato'bhyadravandroṇaṃ kuntīputrapurogamāḥ //

te droṇaṃ sahitāḥ śūrāḥ sarvataḥ pratyavārayan /
gabhastibhirivādityaṃ tapantaṃ bhuvanaṃ yathā //

taṃ tu śūraṃ maheṣvāsaṃ tāvakā'bhyudyatāyudhāḥ /
rājāno rājaputrāśca samantātparyavārayan //

śikhaṇḍī tu tato droṇaṃ pañcabhirnataparvabhiḥ /
kṣatravarmā ca viṃśatyā vasudānaśca pañcabhiḥ //

uttamaujāstribhirbāṇaiḥ kṣatradevaśca saptabhiḥ /
sātyakiśca śatenājau yudhāmanyustathā'ṣṭabhiḥ //

yudhiṣṭhiro dvādaśabhirdroṇaṃ vivyādha sāyakaiḥ /
dhṛṣṭadyumnaśca daśabhiścekitānastribhiḥ śaraiḥ //

tato droṇaḥ satyasandhaḥ prabhinna iva kuñjaraḥ /
abhyatītya sthānīkaṃ dṛḍhasenamapātayat //

tato rājānamāsādya praharantamabhītavat /
avidhyannavabhiḥ kṣemaṃ sa hataḥprāpatadrathāt //

sa madhyaṃ prāpya sainyānāṃ sarvāḥ pravicarandiśaḥ /
trātā hyabhavadanyeṣāṃ na trātavyaḥ kathañcana //

śikhaṇḍinaṃ dvādaśabhirviṃśatyā cottamaujasam /
vasudānaṃ ca bhallena praiṣayadyamasādanam //

aśītyā kṣatravarmāṇaṃ ṣaḍviṃśatyā sudakṣiṇam /
kṣatradevaṃ tu bhallena rathanīḍāḍapātayat //

yudhāmanyuṃ catuḥṣaṣṭyā triṃśatā caiva sātyakim /
viddhvā rukmarathastūrṇaṃ yudhiṣṭhiramupādravat //

tato yudhiṣṭhiraḥ kṣipraṃ guruto rājasattamaḥ /
apāyāñjavanairaśvaiḥ pāñcālyo droṇamabhyayāt //

taṃ droṇaḥ sadhanuṣkaṃ tu sāśvayantāramākṣiṇot / sa hataḥ prāpatadbhūmau rathājjyotirivāmbarāt /
hatvā taṃ vibabhau droṇaḥ kurubhiḥ parivāritaḥ //

vārdhakṣemistu vārṣṇeyo droṇaṃ viddhvā śarottamaiḥ /
navabhiśca mahīpālaḥ punarvivyādha pañcabhiḥ //

sa sātyakiścatuṣṣaṣṭyā rājanvivyādha sāyakaiḥ /
sucitro daśabhirbāṇairdroṇaṃ vidvvā'nadadbalī //

taṃ droṇaḥ samare rājañśaravarṣairavākirat /
apātayattayo droṇaḥ sucitraṃ sahasārathim //

sāśvaṃ ca samare rājanhato vai prāpatatkṣitau /
pātyamāno mahārāja babhau jyotirivāmbarāt //

tasminhate rājaputre pāñcālānāṃ yaśaskare /
hata droṇaṃ hata droṇamityāsīnniḥsvano mahān //

tāṃstathā bhṛśasaṃrabdhānpāñcālānmatsyakekayān /
sṛñjayānpāṇḍavāṃścaiva droṇo vyakṣobhayadbalī //

sātyakiṃ cekitānaṃ ca dhṛṣṭadyumnaśikhaṇ़ḍinau /
vārdhakṣemiṃ caitraseniṃ senābinduṃ suvarcasam //

etāṃścānyāṃśca subahūnnānājanapadeśvarān /
sarvāndroṇo'jayadyuddhe kurubhiḥ parivāritaḥ //

tāvakāśca mahārāja jayaṃ labdhvā mahāhave /
pāṇḍaveyānraṇe jaghnurdravamāṇānsamantataḥ //

te dānavā ivendreṇa vadhyamānā mahātmanā /
pāñcālāḥ kekayā mātsyāḥ samakampanta bhārata //