Mahabharata · Chapter 7.198

arjunasya vacaḥ śrutvā nocustatra mahārathāḥ /
apriyaṃ vā priyaṃ vā'pi mahārāja dhanañjayam //

tataḥ kruddho mahābāhurbhīmaseno'bhyabhāṣata /
kutsayanniva kaunteyamarjunaṃ bharatarṣabha //

muniryathā'raṇyagato bhāṣate dharmasaṃhitam /
nyastadaṇḍo yathā pārthaṃ brāhmaṇaḥ saṃśitavrataḥ //

kṣatatrātā kṣatājjīvankṣantā strīṣvapi sādhuṣu /
kṣatriyaḥ kṣitimāpnoti kṣipraṃ dharmaṃ yaśaḥ śriyaḥ //

sa bhavānkṣatriyaguṇairyuktaḥ sarvaiḥ kulodvahaḥ /
avipaścidyathā vācaṃ vyāharannādya śobhase //

parākramaste kaunteya śakrasyeva śacīpateḥ /
na cātivartase dharmaṃ velāmiva mahodadhiḥ //

na pūjayettvāṃ konvadya yattrayodaśavārṣikam /
amarṣaṃ pṛṣṭhataḥ kṛtvā dharmamevābhikāṅkṣase //

diṣṭyā tāta manaste'dya svadharmamanuvartate /
ānṛśaṃsye ca te diṣṭyā buddhiḥ satatamacyuta //

yattu dharmapravṛttasya hṛtaṃ rājyamadharmataḥ /
draupadī ca parāmṛṣṭā sabhāmānīya śatrubhiḥ //

vanaṃ pravrājitāścāsma valkalājinavāsasaḥ /
anarhamāṇāstaṃ bhāvaṃ trayodaśa samāḥ paraiḥ //

bahūni kṣāmya śatrūṇāṃ satyadharmaratā vayam /
tathā tanmarṣayitvā tu yathā te utpathe sthitāḥ //

etānyamarṣasthānāni marṣitāni tvayā'ghana /
kṣatradharmaprasaktena sarvametadanuṣṭhitam //

tamadharmamapākṛṣṭaṃ smṛtvā'dya sahitastvayā /
sānubandhānhaniṣyāmi kṣudrānrājyaharānaham //

tvayā hi kathitaṃ pūrvaṃ yuddhāyābhyāgatā vayam /
ghaṭāmahe yathāśakti tvaṃ tu no'dya jugupsase //

svadharmaṃ necchase jñātuṃ vṛthā vacanameva te /
bhayārditānāmasmākaṃ vācā marmāṇi kṛntasi //

vapanvraṇe kṣāramiva kṣatānāṃ śatrukarśana /
vidīryate me hṛdayaṃ tvayā vākśalyapīḍitam //

adharmamena vipulaṃ dhārmikaḥ sanna budhyase /
yattvamātmānamasmāṃśca praśaṃsyānna praśaṃsasi //

vāsudeve sthite cāpi droṇaputraṃ praśaṃsasi /
yaḥ kalāṃ ṣoḍaśīṃ pūrṇāṃ dhanañjaya na te'rhati //

svayamevātmano doṣānbruvāṇaḥ kiṃ na lajjase //

mama nāgāyutaṃ pārtha balaṃ bāhvorvidhīyate /
dārayeyaṃ mahīṃ krodhādvikireyaṃ ca parvatān //

āvidhyaitāṃ gadāṃ gurvī bhīmāṃ kāñcanamālinīm /
giriprakāśānkṣitijānbhañjeyamanilo yathā //

drāvayeyaṃ śaraiścāpi sendrāndevānsamāgatān /
sarākṣasagaṇānpārtha sāsuroragamānavān //

sa tvamevaṃvidhaṃ jānanbhrātaraṃ māṃ nararṣabha /
droṇaputrādbhayaṃ kartuṃ nārhasyamitavikrama //

athavā tiṣṭha bībhatso saha sarvaiḥ sahodaraiḥ /
ahamenaṃ gadāpāṇirjeṣyāmyeko mahāhave //

tataḥ pāñcālarājasya putraḥ pārthamathābravīt /
saṅkruddhamiva nardantaṃ hiraṇyakaśipurharim //
dhṛṣṭadyumna uvāca /

bībhatso viprakarmāṇi vihitāni manīṣibhiḥ /
yājanādhyāpane dānaṃ yathā yajñapratigrahau //

ṣaṣṭhamadhyayanaṃ nāma teṣāṃ kasminpratiṣṭhitaḥ /
hato droṇo mayā hyevaṃ kiṃ māṃ pārtha vigarhase //

apakrāntaḥ svadharmācca kṣātradharmaṃ vyapāśritaḥ /
adharmeṇa hatastasmādastreṇa kṣudrakarmakṛt //

tathā māyāṃ prayuñjānamasahyaṃ brāhmaṇabruvam /
pratimāyī nihanyādyo na yuktaṃ pārtha tatra kim //

tasmiṃstathā mayā śaste yadi drauṇāyanī ruṣā /
kurute bhairavaṃ nādaṃ tatra kiṃ mama hīyate //

na cādbhutamidaṃ manye yaddrauṇiścātra garjati /
ghātayiṣyati kauravyānparitrātumaśaknuvan //

yacca māṃ dhārmiko bhūtvā bravīṣi gurughātinam /
tadarthamahamutpannaḥ pāñcālyasya suto'nalāt //

yasya kāryamakāryaṃ vā yudhyataḥ syātsamaṃ raṇe /
taṃ kathaṃ brāhmaṇaṃ brūyāḥ kṣatriyaṃ vā dhanañjaya //

yo hyanastravido hanyādbrahmāstraiḥ krodhamūrcchitaḥ /
sarvopāyairna sa kathaṃ vadhyaḥ puruṣasattama //

viśeṣātpitṛhantā me na sa vadhyaḥ kathaṃ mayā / yo'yaṃ pāpaḥ sudurmedhā bāndhavānyudhi jaghnivān /
tasya viprabruvavadhe kathaṃ pāpaṃ bhavenmama //

vidharmiṇaṃ dharmavidbhiḥ proktaṃ teṣāṃ viṣopamam /
jānandharmārthatattvajña kiṃ māmarjuna garhase //

nṛśaṃsaḥ sa mayā'kramya ratha eva nipātitaḥ /
tanmāmanindyaṃ bībhatso kimarthaṃ nābhinandase //

kālānalasamaṃ pārtha jvalārkaviṣopamam /
bhīmaṃ droṇaśiraśchinnaṃ na praśaṃsasi me katham //

yo'sau mamaiva nānyasya bāndhavānyudhi jaghnivān /
chittvā'pi tasya mūrdhānaṃ naivāsmi vigatajvareḥ //

tacca me kṛntate marma yanna tasya śiro mayā /
niṣādaviṣaye kṣiptaṃ jayadrathaśiro yathā //

athāvadhaśca śatrūṇāmadharmaḥ śrūyate'rjuna /
kṣatriyasya hi dharmo'yaṃ hanyāddhanyeta vā punaḥ //

sa śatrurnihataḥ saṅkhye mayā dharmeṇa pāṇḍava /
yathā tvayā hataḥ śūro bhagadattaḥ pituḥ sakhā //

pitāmahaṃ raṇe hatvā manyase dharmamātmanaḥ /
mayā śatrau hate kasmātpāpe dharmaṃ na manyase //

sambandhāvanataṃ pārtha na māṃ tvaṃ vaktumarhasi /
svagātrakṛtasopānaṃ niṣaṇṇamiva dantinam //

kṣamāmi te sarvameva vāgvyatikramamarjuna /
draupadyā draupadeyānāṃ kṛte nānyena hetunā //

kulakramāgataṃ vairaṃ mamācāryeṇa viśrutam /
tathā jānātyayaṃ loko na yūyaṃ pāṇḍunandanāḥ //

nānṛtī pāṇḍavo jyeṣṭho nāhaṃ vā'dhārmiko'rjuna /
na kṣatriya iti prāhuryo na hanti raṇājire //

pitaraṃ vā guruṃ vā'pi jighāṃsu putraśiṣyayoḥ /
jihmena vā'pyajihmena hanyādevāvicārayan //

ityuktaṃ brahmaṇā pūrvaṃ kṣatriyāṇāṃ dviṣadvadhe /
tasmācchiṣyeṇa nihataḥ śatrurme brāhmaṇabruvaḥ //

yaḥ kṣatriyasuto hanyātpitaraṃ vā guruṃ ca vā / aniṣṭaṃ kṣatriyo hanyātsa vai kṣatriya ucyate /
śiṣyadrohī hataḥ pāpo yudhyasva vijayastava //