Mahabharata · Chapter 7.189

tato duḥśāsanaḥ kruddhaḥ sahadevamupādravat /
rathavegena tīvreṇa kampayanniva medinīm //

tasyāpatata evāśu bhallenāmitrakarśanaḥ /
mādrīputraḥ śiro yantuḥ saśirastrāṇamacchinat //

nainaṃ duḥśāsanaḥ sūtaṃ nāpi kaścana sainikaḥ /
kṛttottamāṅgamāśutvātsahadevena buddhavān //

yadā tvasaṅgṛhītatvātprayāntyaśvā yathāsukham /
tato duḥśāsanaḥ sūtaṃ bubudhe gatacetasam //

sa hayānsannigṛhyājau svayaṃ hayaviśāradaḥ /
yuyudhe rathināṃ śreṣṭho laghu citraṃ ca suṣṭhu ca //

tadasyāpūjayankarma sve pare cāpi saṃyuge /
hatasūtarathenājau vyacaradyadabhītavat //

sahadevastu tānaśvāṃstīkṣṇairbāṇairavākirat /
pīḍyamānāḥ śaraiścāśu prādravaṃste tatastataḥ //

sa raśmiṣu viṣaktatvādutsarja śarāsanam /
dhanuṣā karma kurvaṃstu raśmīṃśca punarutsṛjat //

chidreṣveteṣu taṃ bāṇairmādrīputro'bhyavākirat /
parīpsaṃstvatsutaṃ karṇastadantaramavāpatat //

vṛkodarastataḥ karṇaṃ tribhirbhallaiḥ samāhitaḥ /
ākarṇapūrṇairabhyaghnadbāhvorurasi cānadat //

sa nivṛttastataḥ karṇaḥ saṅghaṭṭita ivoragaḥ / bhīmamāvārayāmāsa vikiranniśitāñcharān /
tato'bhūttumulaṃ yuddhaṃ bhīmarādheyayostadā //

tau vṛṣāviva nardantau vivṛttanayanāvubhau /
vegena mahatā'nyonyaṃ saṃrabdhāvabhipetatuḥ //

abhisaṃśliṣṭayostatra tayorāhavaśauṇḍayoḥ /
vicchinnaśarapātatvādgadāyuddhamavartata //

gadayā bhīmasenastu karṇasya rathakūbaram /
bibheda śatadhā rājaṃstadadbhutamivābhavat //

tato bhīmasya rādheyo gadāmāvidhya vīryavān /
avāsṛjadrathe tāṃ tu bibheda gadayā gadām //

tato bhīmaḥ punargurvīṃ cikṣepādhirathergadām /
tāṃ gadāṃ bahubhiḥ karṇaḥ supuṅkhaiḥ supravejitaiḥ //

pratyavidhyatpunaścānyaiḥ sā bhīmaṃ punarāvrajat /
vyālīva mantrābhihatā karṇabāṇairabhidrutā //

tasyāḥ pratinipātena bhīmasya vipulo dhvajaḥ /
papāta sārathiścāsya mumoha ca gadāhataḥ //

sa karṇaṃ sāyakānaṣṭau vyasṛjatkrodhamūrcchitaḥ /
taistasya niśitaistīkṣṇairbhīmaseno mahābalaḥ //

ciccheda paravīraghnaḥ prahasanniva bhārata /
dhvajaṃ śarāsanaṃ caiva śarāvāpaṃ ca bhārata //

karṇo'pyanyaddhanurgṛhya hemapṛṣṭhaṃ durāsadam / tataḥ punastu rādheyo hayānasya ratheṣubhiḥ /
ṛkṣavarṇāñjaghānāśu tathobhau pārṣṇisārathī //

sa vipannaratho bhīmo nakulasyāpluto ratham /
hariryathā gireḥ śṛṅgaṃ samākramadarindamaḥ //

tathā droṇārjunau citramayudhyetāṃ mahārathau /
ācāryaśiṣyau rājendra kṛtapratikṛtau yudhi //

laghusandhānayogābhyāṃ rathayośca raṇena ca /
mohayantau manuṣyāṇāṃ cakṣūṃṣi ca manāṃsi ca //

upāramanta te sarve yodhā'smākaṃ pare tathā / vicitrānpṛtanāmadhye rathamārgānudīrya tau /

anyonyamapasavyaṃ ca kartuṃ vīrau tadeṣatuḥ //

parākramaṃ tayoryodhā dadṛśuste suvismitāḥ //

tayoḥ samabhavadyuddhaṃ droṇapāṇḍavayormahat /
āmiṣārthe mahārāja gagane śyenayoriva //

yadyaccakāra droṇastu kuntīputrajigīṣayā /
tattatpratijaghānāśu prahasaṃstasya pāṇḍavaḥ //

yadā droṇo na śaknoti pāṇḍavaṃ sma viśeṣitum /
tataḥ prāduścakārāstramastramārgaviśāradaḥ //

aindraṃ pāśupataṃ tvāṣṭraṃ vāyavyamatha vāruṇam /
muktammuktaṃ droṇacāpāttajjaghāna dhanañjayaḥ //

astrāṇyastrairyadā tasya vidhivaddhanti pāṇḍavaḥ /
tato'straiḥ paramairdivyairdroṇaḥ pārthamavākirat //

yadyadastraṃ sa pārthāya prayuṅkte vijigīṣayā /
tasyatasya vighātāya tattaddhi kurute'rjunaḥ //

sa vadhyamāneṣvastreṣu divyeṣvapi yathāvidhi /
arjunenārjunaṃ droṇo manasaivābhyapūjayat //

mene cātmānamadhikaṃ pṛthivyāmadhi bhārata /
tena śiṣyeṇa sarvebhyaḥ śastravidbhya parantapaḥ //

vāryamāṇastu pārthena tathā madhye mahātmanām /
yatamāno'rjunaṃ prītyā prīyate smārjunena saḥ //

tato'ntarikṣe devāśca gandharvāśca sahasraśaḥ /
ṛṣayaḥ siddhasaṅghāśca vyatiṣṭhanta didṛkṣayā //

tadapsarobhirākīrṇaṃ yakṣagandharvasaṅkulam /
śrīmadākāśamabhavadbhūyo meghākulaṃ yathā //

tatrāsmāntarhitā vāco vyacaranta punaḥ punaḥ /
droṇapārthastavopetā vyaśrūyanta narādhipa //

visṛjyamāneṣvastreṣu jvālayastu diśo daśa /
abruvaṃstatra siddhāśca ṛṣayaśca samāgatāḥ //

naivedaṃ mānuṣaṃ yuddhaṃ nāsuraṃ na ca rākṣasam /
na daivaṃ na ca gāndharvaṃ brāhmaṇaṃ dhruvamidaṃ param //

vicitramidamāścaryaṃ na no dṛṣṭaṃ na ca śrutam /
ati pāṇḍavamācāryo droṇaṃ cāpyati pāṇḍavaḥ //

nānayorantaraṃ śakyaṃ draṣṭumanyena kenacit //

yadi rudro dvidhākṛtya yudhyetātmānamātmanā /
tatra śakyopamā kartumanyatra tu na vidyate //

jñānamekasthamācārye jñānaṃ yogaśca pāṇḍave / śauryamekasthamācārye balaṃ śauryaṃ ca pāṇḍave /

nemau śakyau maheṣvāsau yuddhe kṣapayituṃ paraiḥ /
icchamānau punarimau hanyetāṃ sāmaraṃ jagat //

ityabruvanmahārāja dṛṣṭvā tau puruṣarṣabhau /
antarhitāni bhūtāni prakāśāni ca sarvaśaḥ //

yadā droṇaṃ mahārāja viśeṣayati pāṇḍavaḥ /
tato droṇo brāhmamastraṃ prāduścakre mahāmatiḥ //

tadastraṃ saṃhitaṃ rājandhorarūpaṃ mahāhave /
santāpayadraṇe pārthaṃ bhūtānyantarhitāni ca //

tataścacāla pṛthivī saparvatavanadrumā / saritaśca pratisrotaḥ pravahurvai kṣaṇāntaram /
vavau ca viṣamo vāyuḥ sāgarāścāpi cukṣubhuḥ //

tatastrāso mahānāsītkurupāṇḍavasenayoḥ /
sarveṣāṃ caiva bhūtānāmudyate'stre mahātmanā //

tataḥ pārtho'pyasambhrāntastadastraṃ pratijaghnivān /
brahmāstreṇaiva rājendra tataḥ sarvamaśīśamat //

yadā na gamyate pāraṃ tayoranyatarasya vā /
tataḥ saṅkulayuddhena tadyuddhaṃ vyākulīkṛtam //

nājñāyata tataḥ kiñcitpunareva viśāmpate /
pravṛtte tumule yuddhe droṇapāṇḍavayornṛpa //

droṇo muktvā raṇe pārthaṃ pāñcālānanvadhāvata /
arjunopi raṇe droṇaṃ tyaktvā prādravayatkurūn //

śaraughairatha tābhyāṃ tu chāyābhūtaṃ mahāmṛdhe /
tumalaṃ prababhau rājansarvasya jagato bhayam //

śarajālaiḥ samākīrṇe meghajālairivāmbare /
nāpatacca tataḥ kaścidantarikṣacarastadā //