Mahabharata · Chapter 7.182

kathamasmaddhitārthaṃ te kaiśca yogairjanārdana /
jarāsandhaprabhṛtayo ghātitāḥ pṛthivīśvarāḥ //
vāsudeva uvāca /

jarāsandhaścedirājo naiṣādiśca mahābalaḥ /
yadi syurna hatāḥ pūrvamidānīṃ syurbhayaṅkarāḥ //

duryodhanastānavaśyaṃ vṛṇuyādrathasattamān /
te'smāsu nityavidviṣṭāḥ saṃśrayeyuśca kauravān //

te hi vīrā maheṣvāsāḥ kṛtāstrā dṛḍhayodhinaḥ /
dhārtarāṣṭracamūṃ kṛtsnāṃ rakṣeyuramarā iva //

sūtaputro jarāsandhaścedirājo niṣādajaḥ /
suyodhanaṃ samāśritya taperanpṛthivīmimām //

yogairabhihatā yaiste tanme śṛṇu dhanañjaya /
ajayyā hi vinā yogairmṛdhe te daivatairapi //

ekaiko hi pṛthak teṣāṃ samastāṃ ripuvāhinīm /
yodhayetsamare pārtha lokapālābhirakṣitām //

jarāsandho hi ruṣito rauhiṇeyapradharṣitaḥ /
asmadvadhārthaṃ cikṣepa gadāṃ vai sarvaghātinīm //

sīmantamiva kurvāṇā nabhasaḥ pāvakaprabhā /
adṛśyatāpatantī sā śakrumuktā yathā'śaniḥ //

tāmāpatantīṃ dṛṣṭvaiva gadāṃ rohiṇinandanaḥ /
pratighātārthamastraṃ vai sthūṇākarṇamavāsṛjat //

astravegapratihatā sā gadā prāpatadbhuvi /
dārayantī dharāṃ devīṃ kampayantīva parvatān //

tatra sā rākṣasī ghorā jarānāmnī suvikramā /
sandadhe sā hi sañjātaṃ jarāsandhamarindamam //

dvābhyāṃ jāto hi mātṛbhyāmardhadehaḥ pṛthakpṛthak /
jarayā sandhito yasmājjarāsandhastato'bhavat //

sā tu bhūmiṃ gatā pārtha hatā sasutabāndavā /
gadayā tena cāstreṇa sthūṇākarṇena rākṣasī //

vinābhūtaḥ sa gadayā jarāsandho mahāmṛdhe /
nihato bhīmasenena paśyataste dhanañjaya //

yadi hi syādgadāpāṇirjarāsandhaḥ pratāpavān /
sendrā devā na taṃ hantuṃ raṇe śaktā narottama //

tvaddhitārthaṃ ca naiṣādiraṅguṣṭhena viyojitaḥ /
droṇenācāryakaṃ kṛtvā chadmanā satyavikramaḥ //

sa tu baddhāṅgulitrāṇo naiṣādirdṛḍhavikramaḥ /
atimānī vacanaro babhau rāma ivāparaḥ //

ekalavyaṃ hi sāṅguṣṭhamaśaktā devadānavāḥ /
sarākṣasoragāḥ pārtha vijetuṃ yudhi karhicit //

kimu mānuṣamātreṇa śakyaḥ syātprativīkṣitum /
dṛḍhamuṣṭiḥ kṛtī nityamasyamāno divāniśam //

tvaddhitārthaṃ tu sa mayā hataḥ saṅgrāmamūrdhani //

cedirājaśca vikrāntaḥ pratyakṣaṃ nihatastava /
sa cāpyaśakyaḥ saṅgrāme jetuṃ sarvasurāsuraiḥ //

vadhārthaṃ tasya jāto'hamanyeṣāṃ ca suradviṣām /
tvatsahāyo naravyāghra lokānāṃ hitakāmyayā //

hiḍimbabakakirmīrā bhīmasenena pātitāḥ /
rāvaṇena samaprāṇā brahmayajñavināśanāḥ //

hatastathaiva māyāvī haiḍimbenāpyalāyudhaḥ /
haiḍimbaścāpyupāyena śaktyā karṇena ghātitaḥ //

yadi hyenaṃ nāhaniṣyatkarṇaḥ śaktyā mahāmṛdhe / mayāṃ vadhyo'bhaviṣyatsa bhaimasenirghaṭotkacaḥ /
mayā na nihataḥ pūrvameṣa yuṣmatpriyepsayā //

eṣa hi brāhmaṇadveṣī yajñadveṣī ca rākṣasaḥ / dharmasya loptā pāpātmā tasmādeva nipātitaḥ /
vyaṃsitā cāpyūpāyena śakradattā mayā'nagha //

yehi dharmasya loptāro vadhyāste mama pāṇḍava /
dharmasaṃsthāpanārthaṃ hi pratijñaiṣā mamāvyayā //

brahma satyaṃ damaḥ śaucaṃ dharmo hīḥ śrīrdhṛtiḥ kṣamā /
yatra tatra rame nityamahaṃ satyena te śape //

na viṣādastvayā kāryaḥ karṇaṃ vaikartanaṃ prati /
upadekṣyāmyupāyaṃ te yena taṃ prasahiṣyasi //

suyodhanaṃ cāpi raṇe haniṣyati vṛkodaraḥ /
tasyāpi ca vadhopāyaṃ vakṣyāmi tava pāṇḍava //

vardhate tumulastveṣa śabdaḥ pacaramūṃ prati /
vidravanti ca sainyāni tvadīyāni diśo daśa //

labdhalakṣyā hi kauravyā vidhamanti camūṃ tava /
dahatyeṣa ca vaḥ sainyaṃ droṇaḥ praharatāṃ varaḥ //