Mahabharata · Chapter 7.181

tasminhate mahāmāye mahātejasi rākṣase /
amarṣitāḥ pāṇḍaveyāḥ kimakurvanmahāraṇe //

marditāśca bhṛśaṃ yuddhe kimakurvanta sañjaya //

ye ca te'bhyadravandroṇaṃ vyūḍhānīkaṃ prahāriṇaḥ /
sṛñjayāḥ saha pāñcālaiste'rurvankiṃ mahāraṇe //

saumadattivadhāddroṇamāyattaṃ saindhavasya ca /
amarṣājjīvitaṃ tyaktvā gāhamānaṃ varūthinīm //

jṛmbhamāṇamiva vyāghraṃ vyāttānanamivāntakam /
kathaṃ pratyudyayurdroṇamajayyaṃ kurusṛñjayāḥ //

ācāryaṃ ye ca rakṣanti duryodhanapurogamāḥ /
drauṇikarṇakṛpāstāta te hyakurvankimāhave //

bhāradvājaṃ jighāṃsantau savyasācivṛkodarau /
ārcchatāṃ māmakānyuddhe kathaṃ sañjaya śaṃsa me //

sindhurājavadheneme ghaṭotkacavadhena te /
amarṣitāśca saṅkruddhā raṇaṃ cakruḥ kathaṃ yudhi //
sañjaya uvāca /

haiḍimbiṃ nihataṃ dṛṣṭvā viśīrṇamiva parvatam /
babhūvuḥ pāṇḍavāḥ sarve śokabāṣpākulekṣaṇāḥ //

vāsudevastu harṣeṇa mahatā'bhipariplutaḥ /
nanāda siṃhavannādaṃ vyathayanniva bhārata //

hataṃ ghaṭotkacaṃ jñātvā vāsudevaḥ pratāpavān /
vinadya ca mahānādaṃ paryaṣvajata phalgunam //

sa vinadya mahānādamabhīśūnsanniyamya ca /
nanarta harṣasaṃvīto vātoddhūta iva drumaḥ //

tataḥ pariṣvajya punaḥ pārthamāsphoṭya cāsakṛt /
rathopasthagato dhīmānprāṇadatpunaracyutaḥ //

prahṛṣṭamanasaṃ jñātvā vāsudevaṃ mahābalaḥ /
arjuno'thābravīdrājannātihṛṣṭamanā iva //

atiharṣo'yamasthāne tavādya madhusūdana /
śokasthāne tu samprāpte haiḍimbasya vadhena tu //

vimukhānīha sainyāni hataṃ dṛṣṭvā ghaṭotkacam /
vayaṃ ca bhṛśamudvignā heḍimbestu nipātanāt //

naitatkāraṇamalpaṃ hi bhaviṣyati janārdana /
tadadya śaṃsa me pṛṣṭaḥ satyaṃ satyavatāṃ vara //

yadyetanna rahasyaṃ te vaktumarhasyarindama /
dhairyasya vikṛtiṃ brūhi tvamadya madhusūdana //

samudrasyeva saṃśoṣaṃ meroriva visarpaṇam /
tathaitadadya manye'haṃ tava karma janārdana //
vāsudeva uvāca /

atiharṣamimaṃ prāptaṃ śṛṇu me tvaṃ dhanañjaya /
atīva manasaḥ sadyaḥ prasādakaramuttamam //

śaktiṃ ghaṭotkacenemāṃ vyaṃsayitvā mahādyute /
karṇaṃ nihatamevājau viddhi sadyo dhanañjaya //

śaktihastaṃ punaḥ karṇaṃ ko loke'sti pumāniha /
ya enamabhitastiṣṭhetkārtikeyamivāhave //

diṣṭyā'panītakavaco diṣṭyā'pahṛtakuṇḍalaḥ /
diṣṭyā sā vyaṃsitā śaktiramoghā'sya ghaṭotkace //

yadi hi syātsakavacastathaiva syātsakuṇḍalaḥ /
sāmarānapi lokāṃstrīnekaḥ karṇo jayedraṇe //

vāsavo vā kubero vā varuṇo vā jaleśvaraḥ /
yamo vā notsahetkarṇaṃ raṇe pratisamāsitum //

gāṇḍīvamudyamya bhavāṃścakraṃ cāhaṃ sudarśanam /
na śaktau svo raṇe jetuṃ tathāyuktaṃ nararṣabham //

tvaddhitārthaṃ tu śakreṇa māyāpahṛtakuṇḍalaḥ /
vihīnakavacaścāyaṃ kṛtaḥ parapurañjayaḥ //

utkṛtya kavacaṃ yasmātkuṇḍale vimale ca te /
prādācchakrāya vai karṇastasmādvaikartanaḥ smṛtaḥ //

āśiviṣa iva krudvaḥ stambhito mantratejasā /
tathā'dya bhāti karṇo me śāntajvāla ivānalaḥ //

yadāprabhṛti karṇāya śaktirdattā mahātmanā /
vāsavena mahābāho kṣiptā yā'sau ghaṭatkace //

kuṇḍalābhyāṃ nimāyātha divyena kavacena ca /
tāṃ prāpyāmanyata vṛṣā satataṃ tvāṃ hataṃ raṇe //

evaṃ gato'pi śakyo'yaṃ hatuṃ nānyena kenacit /
ṛte tvāṃ puruṣavyāghra śape satyena cānagha //

brahmaṇyaḥ satyavādī ca sapasvī niyatavrataḥ /
ripuṣvapi dayāvāṃśca tasmātkarṇo vṛṣā smṛtaḥ //

yuddhaśauṇḍo mahābāhurnityodyataśarāsanaḥ / kesarīva vane nardanmattamātaṅgayūthapān /
vimardanrathaśārdūlānrājate raṇamūrdhanixxx //

madhyangata ivādityo yo na śakyo nirīkṣitum /
tvadīyaiḥ puruṣavyāghra yodhamukhyairmahātsabhiḥ //

śarajālasahasrāṃśuḥ śaradīva dixxxx //

tapānte jalado yadvaccharadhārāḥ kṣaranmuhuḥ /
divyāstrajaladaḥ karṇaḥ parjanya iva vṛṣṭimān //

tridaśairapi cāsyadbhiḥ śaravarṣaṃ samantataḥ /
aśakyastadayaṃ jetuṃ sravadbhirmāṃsaśoṇitam //

kavacena vihīnaśca kuṇḍalābhyāṃ ca pāṇḍava /
so'dya mānuṣatāṃ prāpto vimuktaḥ śakradattayā //

eko hi yogo'sya bhavedvadhāya cchidre hyenaṃ svapramattaḥ pramattam /
kṛcchraṃ prāptaṃ rathacakre vimagne hanyāḥ pūrvaṃ tvaṃ tu sañjñāṃ vicārya //

na hyudyatāstraṃ yudhi hanyādajayya-- mapyekavīro balabhitsavajraḥ //

jarāsandhaścedirājo mahātmā mahābāhuścaikalavyo niṣādaḥ /
ekaikaśo nihatāḥ sarva ete yogaistaistaistvaddhitārthaṃ mayaiva //

athāpare nihatā rākṣasendrā hiḍimbakirmīrabakapradhānāḥ /
alāyudhaḥ paracakrāvamardī ghaṭotkacaścograkarmā tarasvī //