Mahabharata · Chapter 7.183

ekavīravadhe moghā śaktiḥ sūtātmaje yadā /
kasmātsarvānsamutsṛjya sa tāṃ pārthe na muktavān //

tasminhate hatā hi syuḥ sarve pāṇḍavasṛñjayāḥ /
ekavīravadhe kasmādyuddhe na jayamādadhe //

āhūto na nivarteyamiti tasya mahāvratam /
svayaṃ mārgayitavyaḥ sa sūtaputreṇa phalgunaḥ //

tato dvairathamānīya phalgunaṃ śaktadattayā /
jaghāna na vṛṣā kasmāttanmamācakṣva sañjaya //

nūnaṃ buddhivihīnaścāpyasahāyaśca me sutaḥ /
śatrubhirvyaṃsitaḥ pāpaḥ kathaṃ nu sa jayedarīn //

yā hyasya paramā śaktirjayasya ca parāyaṇam /
sā śakhtirvāsudevena vyaṃsitā ca ghaṭotkace //

kuṇeryathā hastagataṃ hiyedbilvaṃ balīyasā /
tathā śaktiramoghā sā moghībhūtā ghaṭotkace //

yathā varāhasya śunaśca yudhyato-- stayorabhāve śvapacasya lābhaḥ /
manye vidvanvāsudevasya tadva-- dyuddhe lābhaḥ karṇahaiḍimbayorvai //

ghaṭotkaco yadi hanyādvi karṇaṃ paro lābhaḥ sa bhavetpāṇḍavānām /
vaikartano vā yadi taṃ nihanyā-- ttathāpi kṛtyaṃ śaktināśātkṛtaṃ syāt //

iti prājñaḥ prajñayaitadvicintya ghaṭotkacaṃ sūtaputreṇa yuddhe /
aghātayadvāsudevo nṛsiṃhaḥ priyaṃ kurvanpāṇḍavānāṃ hitaṃ ca //
sañjaya uvāca /

etaccikīrṣitaṃ jñātvā karṇe madhunihā nṛpa /
niyojayāmāsa tadā dvairathe rākṣaseśvaram //

ghaṭotkacaṃ mahāvīryaṃ mahābuddhirjanārdanaḥ /
amoghāyā vighātārthaṃ rājandurmantrite tava //

tadaiva kṛtakāryā hi vayaṃ syāma kurūdvaha /
na rakṣedyadi kṛṣṇastaṃ pārthaṃ karṇānmahārathāt //

sāśvadhvajarathaḥ saṅkye dhṛtarāṣṭra patedbhuvi /
vinā janārdanaṃ pārtho yogānāmīśvaraṃ prabhum //

taistairupāyairbahubhī rakṣyamāṇaḥ sa pārthiva /
jayatyabhimukhaḥ śatrūnpārthaḥ kṛṣṇena pālitaḥ //

saviśeṣaṃ tvameyātmā kṛṣṇo rakṣenna phalgunam /
hanyātkṣipraṃ hi kaunteyaṃ śaktirvṛkṣamivāśaniḥ //
dhṛtarāṣṭra uvāca /

virodhī ca kumantrī ca prājñamānī mamātmajaḥ /
yasyaiṣa samatikrānto vadhopāyo jayaṃ prati //

sa vā karṇo mahābuddhiḥ sarvaśastrabhṛtāṃ varaḥ /
na muktavānkathaṃ sūta tāmamoghāṃ dhanañjaye //

tavāpi samatikrāntametadgāvalgaṇe katham /
etamarthaṃ mahābuddhe yattvayā nāvabodhitaḥ //
sañjaya uvāca /

duryodhanasya śakunermama duḥśāsanasya ca /
rātrau rātrau bhavatyeṣā nityameva vikatthanā //

śvaḥ sarvasainyānutsṛjya jahi karṇa dhanañjayam /
preṣyavatpāṇḍupāñcālānupabhokṣyāmahe tataḥ //

athavā nihate pārthaṃ pāṇḍavānyatamaṃ tataḥ /
sthāpayedyadi vārṣṇeyastasmātkṛṣṇo hi hanyatām //

kṛṣṇo hi mūlaṃ pāṇḍūnāṃ pārthaḥ skandha ivodgataḥ /
śākhā ivetare pārthāḥ pāñcālāḥ patrasañjñitāḥ //

kṛṣṇāśrayāḥ kṛṣṇabalāḥ kṛṣṇanāthāśca pāṇḍavāḥ /
kṛṣṇaḥ parāyaṇaṃ caiṣāṃ jyotiṣāmiva candramāḥ //

tasmātparṇāni śākhāśca skandhaṃ cotsṛjya sūtaja /
kṛṣṇaṃ hi vidvi pāṇḍūnāṃ mūlaṃ sarvatra sarvadā //

hanyādyadi hi dāśārhaṃ karṇo yādavanandanam /
kṛtsnā vasumatī rājanvaśe tasya na saṃśayaḥ //

yadi hi sa nihataḥ śayīta bhūmau yadukulapāṇḍavanandano mahātmā / nanu tava vasudhā narendra sarvā sagirisamudravanā vaśaṃ vrajeta //

sā tu buddhiḥ kṛtā'pyevaṃ jāgrati tridaśeśvare /
aprameye hṛṣīkeśe yuddhakāle tvamuhyata //

arjunaṃ cāpi rādheyātsadā rakṣati keśavaḥ /
na hyenamaicchatpramukhe sauteḥ sthāpayituṃ raṇe //

anyāṃścāsmai rathodārānupāsthāpayadacyutaḥ /
amoghāṃ tāṃ kathaṃ śaktiṃ moghāṃ kuryāmiti prabho //

yaścaivaṃ rakṣate pārthaṃ karṇātkṛṣṇo mahāmanāḥ /
ātmānaṃ sa kathaṃ rājanna rakṣetpurupottamaḥ //

paricintya tu paśyāmi cakrāyudhamarindamam /
na so'sti triṣu lokeṣu yo jayeta janārdanam //
sañjaya uvāca /

tataḥ kṛṣṇaṃ mahābāhuṃ sātyakiḥ satyavikramaḥ /
papraccha rathaśārdūlaḥ karṇaṃ prati mahārathaḥ //

ayaṃ ca pratyayaḥ karṇe śaktiścāmitavikramā /
kimarthaṃ sūtaputreṇa na muktā phalgune tu sā //
vāsudeva uvāca /

duḥśāsanaśca karṇaśca śakuniśca masaindhavaḥ / satataṃ mantrayanti sma duryodhanapurogamāḥ /

karṇakarṇa maheṣvāsa raṇe'mitaparākrama /
nānyasya śaktireṣā te moktavyā jayatāṃ vara //

ṛte mahārathātkarṇa kuntīputrādvanañjayāt /
sa hi teṣāmatiyaśā devānāmiva vāsavaḥ //

tasminvinihate pārthe pāṇḍavāḥ sṛñjayaiḥ saha /
bhaviṣyanti gatātmānaḥ surā iva niragnayaḥ //

tatheti ca pratijñātaṃ karṇena śinipuṅgava /
hṛdi nityaṃ ca karṇasya vadho gāṇḍīvadhanvanaḥ //

ahameva tu rādheyaṃ mohayāmi yudhāṃvara /
tato nāvāsṛjacchaktiṃ pāṇḍave śvetavāhane //

phalgunasya hi sā mṛtyuriti cintayato'niśam /
na nidrā na ca me hārṣo manaso'sti yudhāṃvara //

ghaṭotkace vyaṃsitāṃ tu dṛṣṭvā tāṃ śinipuṅgava /
mṛtyorāsyāntarānmuktaṃ pasyāmyadya dhanañjayam //

na pitā na ca me mātā na yūyaṃ bhrātarastathā /
na ca prāṇāstathā rakṣyā yathā bībhatsurāhave //

trailokyarājyādyatkiñcidbhavedanyatsudurlabham /
neccheyaṃ sātvatāhaṃ tadvinā pārthaṃ dhanañjayam //

ataḥ praharṣaḥ sumahānyuyudhānādya me'bhavat /
mṛtaṃ pratyāgatamiva dṛṣṭvā pārthaṃ dhanañjayam //

ataśca prahito yuddhe mayā karṇāya rākṣasaḥ /
na hyanyaḥ samare rātrau śaktaḥ karṇaṃ prabādhitum //
sañjaya uvāca /

iti sātyakaye prāha tadā devakinandanaḥ /
dhanañjayahite yuktastatpriye satataṃ rataḥ //