મહાભારત · અધ્યાય 7.182

કથમસ્મદ્ધિતાર્થં તે કૈશ્ચ યોગૈર્જનાર્દન ।
જરાસન્ધપ્રભૃતયો ઘાતિતાઃ પૃથિવીશ્વરાઃ ॥
વાસુદેવ ઉવાચ ।

જરાસન્ધશ્ચેદિરાજો નૈષાદિશ્ચ મહાબલઃ ।
યદિ સ્યુર્ન હતાઃ પૂર્વમિદાનીં સ્યુર્ભયઙ્કરાઃ ॥

દુર્યોધનસ્તાનવશ્યં વૃણુયાદ્રથસત્તમાન્ ।
તેઽસ્માસુ નિત્યવિદ્વિષ્ટાઃ સંશ્રયેયુશ્ચ કૌરવાન્ ॥

તે હિ વીરા મહેષ્વાસાઃ કૃતાસ્ત્રા દૃઢયોધિનઃ ।
ધાર્તરાષ્ટ્રચમૂં કૃત્સ્નાં રક્ષેયુરમરા ઇવ ॥

સૂતપુત્રો જરાસન્ધશ્ચેદિરાજો નિષાદજઃ ।
સુયોધનં સમાશ્રિત્ય તપેરન્પૃથિવીમિમામ્ ॥

યોગૈરભિહતા યૈસ્તે તન્મે શૃણુ ધનઞ્જય ।
અજય્યા હિ વિના યોગૈર્મૃધે તે દૈવતૈરપિ ॥

એકૈકો હિ પૃથક્ તેષાં સમસ્તાં રિપુવાહિનીમ્ ।
યોધયેત્સમરે પાર્થ લોકપાલાભિરક્ષિતામ્ ॥

જરાસન્ધો હિ રુષિતો રૌહિણેયપ્રધર્ષિતઃ ।
અસ્મદ્વધાર્થં ચિક્ષેપ ગદાં વૈ સર્વઘાતિનીમ્ ॥

સીમન્તમિવ કુર્વાણા નભસઃ પાવકપ્રભા ।
અદૃશ્યતાપતન્તી સા શક્રુમુક્તા યથાઽશનિઃ ॥

તામાપતન્તીં દૃષ્ટ્વૈવ ગદાં રોહિણિનન્દનઃ ।
પ્રતિઘાતાર્થમસ્ત્રં વૈ સ્થૂણાકર્ણમવાસૃજત્ ॥

અસ્ત્રવેગપ્રતિહતા સા ગદા પ્રાપતદ્ભુવિ ।
દારયન્તી ધરાં દેવીં કમ્પયન્તીવ પર્વતાન્ ॥

તત્ર સા રાક્ષસી ઘોરા જરાનામ્ની સુવિક્રમા ।
સન્દધે સા હિ સઞ્જાતં જરાસન્ધમરિન્દમમ્ ॥

દ્વાભ્યાં જાતો હિ માતૃભ્યામર્ધદેહઃ પૃથક્પૃથક્ ।
જરયા સન્ધિતો યસ્માજ્જરાસન્ધસ્તતોઽભવત્ ॥

સા તુ ભૂમિં ગતા પાર્થ હતા સસુતબાન્દવા ।
ગદયા તેન ચાસ્ત્રેણ સ્થૂણાકર્ણેન રાક્ષસી ॥

વિનાભૂતઃ સ ગદયા જરાસન્ધો મહામૃધે ।
નિહતો ભીમસેનેન પશ્યતસ્તે ધનઞ્જય ॥

યદિ હિ સ્યાદ્ગદાપાણિર્જરાસન્ધઃ પ્રતાપવાન્ ।
સેન્દ્રા દેવા ન તં હન્તું રણે શક્તા નરોત્તમ ॥

ત્વદ્ધિતાર્થં ચ નૈષાદિરઙ્ગુષ્ઠેન વિયોજિતઃ ।
દ્રોણેનાચાર્યકં કૃત્વા છદ્મના સત્યવિક્રમઃ ॥

સ તુ બદ્ધાઙ્ગુલિત્રાણો નૈષાદિર્દૃઢવિક્રમઃ ।
અતિમાની વચનરો બભૌ રામ ઇવાપરઃ ॥

એકલવ્યં હિ સાઙ્ગુષ્ઠમશક્તા દેવદાનવાઃ ।
સરાક્ષસોરગાઃ પાર્થ વિજેતું યુધિ કર્હિચિત્ ॥

કિમુ માનુષમાત્રેણ શક્યઃ સ્યાત્પ્રતિવીક્ષિતુમ્ ।
દૃઢમુષ્ટિઃ કૃતી નિત્યમસ્યમાનો દિવાનિશમ્ ॥

ત્વદ્ધિતાર્થં તુ સ મયા હતઃ સઙ્ગ્રામમૂર્ધનિ ॥

ચેદિરાજશ્ચ વિક્રાન્તઃ પ્રત્યક્ષં નિહતસ્તવ ।
સ ચાપ્યશક્યઃ સઙ્ગ્રામે જેતું સર્વસુરાસુરૈઃ ॥

વધાર્થં તસ્ય જાતોઽહમન્યેષાં ચ સુરદ્વિષામ્ ।
ત્વત્સહાયો નરવ્યાઘ્ર લોકાનાં હિતકામ્યયા ॥

હિડિમ્બબકકિર્મીરા ભીમસેનેન પાતિતાઃ ।
રાવણેન સમપ્રાણા બ્રહ્મયજ્ઞવિનાશનાઃ ॥

હતસ્તથૈવ માયાવી હૈડિમ્બેનાપ્યલાયુધઃ ।
હૈડિમ્બશ્ચાપ્યુપાયેન શક્ત્યા કર્ણેન ઘાતિતઃ ॥

યદિ હ્યેનં નાહનિષ્યત્કર્ણઃ શક્ત્યા મહામૃધે । મયાં વધ્યોઽભવિષ્યત્સ ભૈમસેનિર્ઘટોત્કચઃ ।
મયા ન નિહતઃ પૂર્વમેષ યુષ્મત્પ્રિયેપ્સયા ॥

એષ હિ બ્રાહ્મણદ્વેષી યજ્ઞદ્વેષી ચ રાક્ષસઃ । ધર્મસ્ય લોપ્તા પાપાત્મા તસ્માદેવ નિપાતિતઃ ।
વ્યંસિતા ચાપ્યૂપાયેન શક્રદત્તા મયાઽનઘ ॥

યેહિ ધર્મસ્ય લોપ્તારો વધ્યાસ્તે મમ પાણ્ડવ ।
ધર્મસંસ્થાપનાર્થં હિ પ્રતિજ્ઞૈષા મમાવ્યયા ॥

બ્રહ્મ સત્યં દમઃ શૌચં ધર્મો હીઃ શ્રીર્ધૃતિઃ ક્ષમા ।
યત્ર તત્ર રમે નિત્યમહં સત્યેન તે શપે ॥

ન વિષાદસ્ત્વયા કાર્યઃ કર્ણં વૈકર્તનં પ્રતિ ।
ઉપદેક્ષ્યામ્યુપાયં તે યેન તં પ્રસહિષ્યસિ ॥

સુયોધનં ચાપિ રણે હનિષ્યતિ વૃકોદરઃ ।
તસ્યાપિ ચ વધોપાયં વક્ષ્યામિ તવ પાણ્ડવ ॥

વર્ધતે તુમુલસ્ત્વેષ શબ્દઃ પચરમૂં પ્રતિ ।
વિદ્રવન્તિ ચ સૈન્યાનિ ત્વદીયાનિ દિશો દશ ॥

લબ્ધલક્ષ્યા હિ કૌરવ્યા વિધમન્તિ ચમૂં તવ ।
દહત્યેષ ચ વઃ સૈન્યં દ્રોણઃ પ્રહરતાં વરઃ ॥