Mahabharata · Chapter 7.178

tamāgatamabhiprekṣya bhīmakarmāṇamāhave /
harṣamāhārayāñcakruḥ kuravaḥ sarva eva te //

tathaiva tava putrāste duryodhanapurogamāḥ /
apluvāḥ plavamāsādya tartukāmā ivārṇavam //

punarjātamivātmānaṃ manvānāḥ puruṣarṣabhāḥ /
alāyudhaṃ rākṣasendraṃ svāgatenābhyapūjayan //

tasmiṃstvamānuṣe yuddhe vartamāne mahābhaye /
karṇarākṣasayornaktaṃ dāruṇapratidarśane //

na drauṇirna kṛpadroṇau na śalyo na ca mādhavaḥ /
eka eva tu tenāsīdyoddhā karṇo raṇe vṛṣā //

upapraikṣanta pāñcālāḥ smayamānāḥ sarājakāḥ /
vyabhramaṃstāvakāścāpi ghūrṇamānāstatastataḥ //

cukruśurnedamastīti droṇadrauṇikṛpādayaḥ /
tatkarma dṛṣṭvā sambhrāntā haiḍimbasya raṇājire //

sarvamāvignamabhavaddhāhābhūtamacetanam /
tava sainyaṃ mahārāja nirāśaṃ karṇajīvite //

duryodhanastu samprekṣya karṇamārtiṃ parāṃ gatam /
alāyudhaṃ rākṣasendraṃ samāhūyedamabravīt //

eṣa vaikartanaḥ karṇo haiḍimbena samāgataḥ /
kurute karma sumahadyadasyopayikaṃ mṛdhe //

paśyaitānpārthivāñśūrānnihatānbhaimaseninā /
nānāśastrairabhihatānpādapāniva dantinā //

tavaiṣa bhāraḥ samare jñātimadhye mayā kṛtaḥ /
tavaivānumate vīra taṃ vikramya nibarhaya //

purā vaikartanaṃ karṇameṣa pāpo ghaṭotkacaḥ /
māyābalaṃ samāśritya karṣayatyarikarśana //

evamuktaḥ sa rājñā tu rākṣaso bhīmavikramaḥ /
tathetyuktvā mahābāhurghaṭotkacamupādravat //

tataḥ karṇaṃ samutsṛjya bhaimasenirapi prabho /
pratyamitramupāyāntamardayāmāsa mārgaṇaiḥ //

tayoḥ samabhavadyuddhaṃ kruddhayo rākṣasendrayoḥ /
mattayorvāsitāhetordīpayoriva kānane //

rakṣasā vipramuktastu karṇo'pi rathināṃ varaḥ /
abhyadravadbhīmasenaṃ rathenādityavarcasā //

tamāyāntamanādṛtya dṛṣṭvā grastaṃ ghaṭotkacam /
alāyudhena samare siṃheneva gavāṃ patim //

rathenādityavapuṣā bhīmaḥ praharatāṃ varaḥ /
kirañcharaughānprayayāvalāyudharathaṃ prati //

tamāyāntamabhiprekṣya sa tadā'lāyudhaḥ prabho /
ghaṭotkacaṃ samutsṛjya bhīmasenaṃ samāhvayat //

taṃ bhīmaḥ sahasā'bhyetya rākṣasāntakaraḥ prabho /
sagaṇaṃ rākṣasendraṃ taṃ śaravarṣairavākirat //

tathaivālāyudho rājañśilādhautairajihmagaiḥ /
abhyavarṣata kaunteyaṃ punaḥpunararindama //

tathā te rākṣasāḥ sarve bhīmasenamupādravan /
nānāpraharaṇā bhīmāstvatsutānāṃ jayaiṣiṇaḥ //

sa tāḍyamāno bahubhirbhīmaseno mahābalaḥ /
pañcabhiḥ pañcabhiḥ sarvāṃstānavidhyacchitaiḥ śaraiḥ //

te vadhyamānā bhīmena rākṣasāḥ krūrabuddhayaḥ /
vinedustumulānnādāndudruvuste diśo daśa //

tāṃstrāsyamānānbhīmena dṛṣṭvā rakṣo mabahālam /
abhidudrāva vegena śaraiścainamavākirat //

taṃ bhīmasenaḥ samare tīkṣṇāgrairakṣiṇoccharaiḥ //

alāyudhastu tānastānbhīmena viśikhānraṇe /
ciccheda kāṃścitsamare tvarayā kāṃścidagrahīt //

sa taṃ dṛṣṭvā rākṣasendraṃ bhīmo bhīmaparākramaḥ /
gadāṃ cikṣepa vegena vajrapātopamāṃ tadā //

tāmāpatantīṃ vegena gadāṃ jvālākulāṃ tataḥ /
gadayā tāḍayāmāsa sā gadā bhīmamāvrajat //

sa rākṣasendraṃ kaunteyaḥ śaravarṣairavākirat /
tānapyasyākaronmoghānrākṣaso niśitaiḥ śaraiḥ //

te cāpi rākṣasāḥ sarve rajanyāṃ bhīmarūpiṇaḥ /
śāsanādrākṣasendrasya nijaghnū rathakuñjarān //

pāñcālāḥ sṛñjayāścaiva vājinaḥ paramadvipāḥ /
na śāntiṃ lebhire tatra rākṣasairbhṛśapīḍitāḥ //

taṃ tu dṛṣṭvā mahāghoraṃ vartamānaṃ mahāhavam /
abravītpuṇḍarīkākṣo dhanañjayamidaṃ vacaḥ //

paśya bhīmaṃ mahābāhuṃ rākṣasendravaśaṃ gatam /
padamasyānugaccha tvaṃ mā vicāraya pāṇḍava //

dhṛṣṭadyumnaḥ śikhaṇḍī ca yudhāmanyūttamaujasau /
sahitau draupadeyāśca karṇaṃ yāntu mahārathāḥ //

nakulaḥ sahadevaśca yuyudhānaśca vīryavān /
itarānrākṣasānghnantu śāsanāttava pāṇḍava //

tvamapīmāṃ mahābāho camūṃ droṇapuraskṛtām /
mārayasva naravyāghra mahaddhi bhayamāgatam //

evamukte tu kṛṣṇena yathoddiṣṭā mahārathāḥ /
jagmurvaikartanaṃ karṇaṃ rākṣasāṃścaiva tānraṇe //

atha pūrṇāyatotsṛṣṭaiḥ śarairāśīviṣopamaiḥ /
dhanuściccheda bhīmasya rākṣasendraḥ pratāpavān //

hayāṃścāsya śitairbāṇaiḥ sārathiṃ ca mahābalaḥ /
jaghāna miṣataḥ saṅkhye bhīmasenasya rākṣasaḥ //

so'vatīrya rathopasthāddhatāśvo hatasārathiḥ /
tasmai gurvīṃ gadāṃ ghorāṃ vinadannutsasarja ha //

tatastāṃ bhīmanirghoṣāmāpatantīṃ mahāgadām /
gadayā rākṣaso ghoro nijaghāna nanāda ca //

taddṛṣṭvā rākṣasendrasya ghoraṃ karma bhayāvaham /
bhīmasenaḥ prahṛṣṭātmā gadāmāśu parāmṛśat //

tayoḥ samabhavadyuddhaṃ tumulaṃ nararakṣasoḥ /
gadānipātasaṃhādairbhuvaṃ kampayatorbhṛśam //

gadāvimuktau tau bhūyaḥ samāsādyetaretaram /
muṣṭibhirvajrasaṃhādairanyonyamabhijaghnatuḥ //

rathacakrairyugairakṣairadhiṣṭhānairupaskaraiḥ /
yathāsannamupādāya nijaghnaturamarṣaṇau //

tau vikṣarantau rudhiraṃ samāsādyetaretaram /
mattāviva mahānāgau cakṛpāte punaḥ punaḥ //

tāvapaśyadvṛṣīkeśaḥ pāṇḍavānāṃ hite rataḥ /
sa bhīmasenarakṣārthaṃ haiḍimbiṃ paryacodayat //