Mahabharata · Chapter 7.179

sandṛśya samare bhīmaṃ rakṣasā grastamantikāt /
vāsudevo'vravīdrājanghaṭotkacamidaṃ vacaḥ //

paśya bhīmaṃ mahābāho rakṣasā grastamāhave /
paśyatāṃ sarvasainyānāṃ tava caiva mahādyute //

sa karṇaṃ tvaṃ samutsṛjya rākṣasendramalāyudham /
jahi kṣipraṃ mahābāho paścātkarṇaṃ badhiṣyasi //

sa vārṣṇeyavacaḥ śrutvā karṇamutsṛjya vīryavān /
yuyudhe rākṣasendreṇa bakabhrātrā ghaṭotkacaḥ //

tayoḥ sutumulaṃ yuddhaṃ babhūva niśi rakṣasoḥ /
alāyudhasya caivograṃ heḍimbeścāpi bhārata //

alāyudhasya yodhāṃśca rākṣasānbhīmadarśanān /
vegenāpatataḥ śūrānpragṛhītaśarāsanān //

āttāyudhaḥ susaṅkruddho yuyudhāno mahārathaḥ /
nakulaḥ sahadevaśca cicchidurniśitaiḥ śaraiḥ //

sarvāṃśca samare rājankirīṭī kṣatriyarṣabhān /
paricikṣepa bībhatsuḥ sarvataḥ prakirañcharān //

karṇaśca samare rājanvyadrāvayata pārthivān /
dhṛṣṭadyumnaśikhaṇḍyādīnpāñcālānāṃ pahārathān //

tānvadhyamānāndṛṣṭvā'tha bhīmo bhīmaparākramaḥ /
abhyayāttvaritaḥ karṇaṃ viśikhānprakiranraṇe //

tataste'pyāyayurhatvā rākṣasānyatra sūtajaḥ / nakulaḥ sahadevaśca sātyakiśca mahārathaḥ /
te karṇe yodhayāmāsuḥ pāñcālā droṇameva tu //

alāyudhastu saṅkruddho ghaṭotkacamarindamam /
parigheṇātikāyena tāḍayāmāsa mūrdhani //

sa tu tena prahāreṇa bhaimasenirmahābalaḥ /
īṣanmūrchitamātmānamastambhayata vīryavān //

tato dīptāgnisaṅkāśāṃ śataghaṇṭāmalaṅkṛtām /
cikṣepa tasmai samare gadāṃ kāñcanabhūṣitām //

sā hayāṃśca rathaṃ cāsya sārathiṃ ca mahāsvanā /
cūrṇayāmāsa vegena visṛṣṭā bhīmakarmaṇā //

sa bhagnahayacakrākṣādviśīrṇadhvajakūbarāt /
utpapāta rathāttūrṇaṃ māyāmāsthāya rākṣasīm //

sa samāsthāya māyāṃ tu vavarṣa rudhiraṃ bahu /
vidyudvibhrājitaṃ cāsīttumulābhrākulaṃ nabhaḥ //

tato vajranipātāśca sāśanistanayitnavaḥ /
mahāṃścaṭacaṭāśabdastatrāsīcca mahāhave //

tāṃ prekṣya mahatīṃ māyāṃ rākṣaso rākṣasasya ca /
ūrdhvamutpatya haiḍimbistāṃ māyāṃ māyayā'vadhīt //

so'bhivīkṣya hatāṃ māyāṃ māyāvī māyayaiva hi /
aśmavarṣaṃ sutumulaṃ visasarja ghaṭotkace //

aśmavarṣaṃ sa taṃ ghoraṃ śaravarṣeṇa vīryavān /
dikṣu vidhvaṃsayāmāsa tadadbhutamivābhavat //

tato nānāpraharaṇairanyonyamabhivarṣatām /
āyasaiḥ parighaiḥ śūlairgadāmusalamudgaraiḥ //

pinākaiḥ karavālaiśca tomaraprāsakampanaiḥ /
nārācairniśitairbhallaiḥ śaraiścakraiḥ paraśvathaiḥ //

ayoguḍairbhiṇḍipālairgośīrṣolūkhalairapi /
utpāṭitairmahāśākhairvividhairjagatīruhaiḥ //

śamīpīlūkadambaiśca campakaiścaiva bhārata /
iṅgudairbadarībhiśca kovidāraiśca puṣpitaiḥ //

palāśaiścārimedaiśca plukṣanyagrodhapippalaiḥ /
mahadbhiḥ samare tasminnyonyamabhijaghnatuḥ //

vipulaiḥ parvatāgraiśca nānādhātubhirācitaiḥ /
teṣāṃ śabdo mahānāsīdvajrāṇāṃ bhidyatāmiva //

yuddhaṃ samabhavaddhoraṃ bhaimyalāyudhayornṛpa /
harīndrayoryathā rājanvālisugrīvayoḥ purā //

tau yuddhvā vividhairghorairāyudhairviśikhaistathā /
utsṛjya ca śitau khaṅkhāgavanyomabhipetatuḥ //

tāvanyonyamabhidrutya keśeṣu sumahābalau /
bhujābhyāṃ paryagṛhṇītāṃ mahākāyau mahābalau //

tau svinnagātrau prasvedaṃ susruvāte janādhipa /
rudhiraṃ ca mahākāyāvativṛṣṭāvivāmbudau //

athābhipatya vegena samuddhāmya ca rākṣasam /
balenākṣipya haiḍimbiścakartāsya śiro mahat //

so'pahṛtya śirastasya kuṇḍalābhyāṃ vibhūpitam /
tadā sutumulaṃ nādaṃ nanāda sumahābalaḥ //

hataṃ dṛṣṭvā mahākāyaṃ bakajñātimarindamam /
pāñcālāḥ pāṇḍavāścaiva siṃhanādānvinedire //

tato bherīsahasrāṇi śaṅkhānāmayutāni ca /
avādayanpāṇḍaveyā rākṣase nihate yudhi //

atīva sā niśā teṣāṃ babhūva vijayāvahā /
vidyotamānā vibabhau samantāddīpamālinī //

alāyudhasya tu śiro bhaimasenirmahābalaḥ /
duryodhanasya pramukhe cikṣepa gatacetasaḥ //

atha duryodhano rājā dṛṣṭvā hatamalāyudham /
babhūva paramodvignaḥ saha sainyena bhārata //

tena hyasya pratijñātaṃ bhīmasenamahaṃ yudhi /
hanteti svayamāgamya smaratā vairamuttamam //

dhruvaṃ sa tena hantavya ityamanyata pārthivaḥ /
jīvitaṃ cirakālaṃ bhrātṝṇāṃ cāpyamanyata //

sa taṃ dṛṣṭvā vinihataṃ bhīmasenātmajena vai /
pratijñāṃ bhīmasenasya pūrṇāmevābhyamanyata //