Mahabharata · Chapter 7.177
tasmiṃstathā vartamāne karṇarākṣasayormṛdhe /
alāyudho rākṣasendro vīryavānabhyavartata //
mahatyā senayā yukto duryodhanamupāgamat / rākṣasānāṃ virūpāṇāṃ sahasraiḥ parivāritaḥ /
nānārūpadharairvīraiḥ pūrvavairamanusmaran //
tasya jñātirhi vikrānto brāhmaṇādo bako hataḥ /
kirṇīraśca mahātejā hiḍimbaśca sakhā tadā //
sa dīrghakālādhyupitaṃ pūrvavairamanusmaran /
vijñāyaitanniśāyuddhaṃ jighāṃsurbhīmamāhave //
sa matta iva mātaṅgaḥ saṅkrudva iva coragaḥ /
duryodhanamidaṃ vākyamabravīdyudvalālasaḥ //
viditaṃ te mahārāja yathā bhīmena rākṣasāḥ /
hiḍimbabakakirmīrā nihatā mama bāndhavāḥ //
parāmarśaśca kanyāyā hiḍimbāyāḥ kṛtaḥ purā /
kimanyadrākṣasānanyānasmāṃśca paribhūya ha //
tamahaṃ sagaṇaṃ rājansavājirathakuñjaram /
haiḍimbiṃ ca sahāmātyaṃ hantumabhyāgataḥ svayam //
adya kuntīsutānsarvānvāsudevapurogamān /
hatvā sambhakṣayiṣyāmi sarvairanucaraiḥ saha //
nivāraya balaṃ sarvaṃ vayaṃ yotsyāma pāṇḍavān //
tasyaitadvacanaṃ śrutvā hṛṣṭo duryodhanastadā /
pratipūjyābravīdvākyaṃ bhrātṛbhiḥ parivāritaḥ //
tvāṃ puraskṛtya sagaṇaṃ vayaṃ yotsyāmahe parān /
na hi vairāntamanasaḥ sthāsyanti mama sainikāḥ //
evamastviti rājānamuktvā rākṣasapuṅgavaḥ /
abhyayāttvarito bhaimiṃ sahitaḥ puruṣādakaiḥ //
dīpyamānena vapuṣā rathenādityavarcasā /
tādṛśenaiva rājendra yādṛśena ghaṭotkacaḥ //
tasyāpyatulanirghopo bahutoraṇacitritaḥ /
ṛkṣacarmāvanadvāṅgo nalvamātro mahārathaḥ //
tasyāpi turagāḥ śīghrā hastikāyāḥ kharasvanāḥ /
śataṃ yuktā mahākāyā māṃsaśoṇitabhojanāḥ //
tasyāpi rathanirghopo mahāmegharavopamaḥ /
syāpi sumahaccāpaṃ dṛḍhajyaṃ kanakojjvalam //
tasyāpyakṣasamā bāṇā rukma puṅkhāḥ śilāśitāḥ / so'pi vīro mahābāhuryathaiva sa ghaṭotkacaḥ //
tasyāpi gomāyubalābhigupto babhūva keturjvalanārkatulyaḥ /
sa cāpi rūpeṇa ghaṭotkacasya śrīmattamo hyantakasannikāśaḥ //
dīptāṅgado dīptakirīṭamālī baddhasraguṣṇīṣanibaddhakhaṅgaḥ /
gadī bhuśuṇḍī musalī halī ca śarāsanī vāraṇatulyavarṣmā //
rathena tenānalavarcasā tadā vidrāvayanpāṇḍavavāhinīṃ tām /
rarāja sahkhye parivartamāno vidyunmālī megha ivāntarikṣe //
te cāpi sarvapravarā narendrā mahābalā varmimaścarmiṇaśca /
harṣānvitā yuyudhustasya rājan samantataḥ pāṇḍavayodhavīrāḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0