Mahabharata · Chapter 7.170

nakulaṃ rabhasaṃ yuddhe nighnantaṃ vāhinīṃ tava /
abhyayātsaubalaḥ kruddhastiṣṭhatiṣṭheti cābravīt //

kṛtavairau tu tau vīrāvanyonyavadhakāṅkṣiṇau /
śaraiḥ pūrṇāyatotsṛṣṭairanyonyamabhijaghnatuḥ //

yathaiva nakulo rājañśaravarṣāṇyamuñcata /
tathaiva saubalaścāpi śikṣāṃ sandarśayanyudhi //

tāvubhau samare śūrau śarakaṇṭakinau tadā /
vyarājetāṃ mahārāja śvāvidhau śalalairiva //

rukmapuṅkhairajihmāgraiḥ śaraiśchinnatanucchadau /
rudhiraughapariklinnau vyabhrājetāṃ mahāmṛdhe //

tapanīyanibhau citro kalpavṛkṣāviva drumau /
kiṃśukāviva cotphullau prakāśete raṇājire //

tāvubhau samare śūrau śarakaṇṭakinau tadā /
vyarājetāṃ mahārānkaṇṭakairiva śālmalī //

sujihmaṃ prekṣamāṇau ca rājanvivṛtalocanau /
krodhasaṃraktanayanau nirdahantau parasparam //

śyālastu tava saṅkruddho mādrīputraṃ hasanniva /
karṇinaikena vivyādha hṛdaye niśitena ha //

nakulastu bhṛśaṃ vidvaḥ śyālena tava dhanvinā /
niṣasāda rathopasthe kaśmalaṃ cāviśanmahat //

atyantavairiṇāṃ dṛptaṃ dṛṣṭvā śatruṃ tathā'gatam /
nanāda śakunī rājaṃstapānte jalado yathā //

pratilabhya tataḥ sañjñāṃ nakulaḥ pāṇḍunandanaḥ /
abhyayātsaubalaṃ bhūyo vyāttānana ivāntakaḥ //

saṅkruddhaḥ śakuniṃ ṣaṣṭyā vivyādha bharatarṣabha /
punaścainaṃ śatenaiva nārācānāṃ stanāntare //

athāsya saśaraṃ cāpaṃ mṛṣṭideśe'cchinattadā /
dhvajaṃ ca tvaritaṃ chittvā rathādbhūmāvapātayat //

viśikhena ca tīkṣṇena pītena niśitena ca / ūrū nirbhidya caikena nakulaḥ pāṇḍunandanaḥ /
śyenaṃ sapakṣaṃ vyādhena pātayāmāsa taṃ tadā //

so'tividdho mahārāja rathopastha upāviśat /
dhvajayaṣṭiṃ parikliśya kāmukaḥ kāminīṃ yathā //

taṃ visañjñaṃ nipatitaṃ dṛṣṭvā śyālaṃ tavānagha /
apovāha rathenāśu sārathirdhvajinīmukhāt //

tataḥ sañcukruśuḥ pārthā ye ca teṣāṃ padānugāḥ //

nirjitya ca raṇe śatruṃ nakulaḥ śatrutāpanaḥ /
abravītsārathiṃ kruddho droṇānīkāyaṃ māṃ vaha //

tasya tadvacanaṃ śrutvā mādrīputrasya sārathiḥ /
prāyāttena tadā rājanyatra droṇo vyavasthitaḥ //

śikhaṇḍinaṃ tu samare droṇaprepsuṃ viśāmpate /
kṛpaḥ śāradvato yattaḥ pratyagacchatsa vegitaḥ //

gautamaṃ drutamāyāntaṃ droṇānīkamarindamam /
vivyādha navabhirbhallaiḥ śikhaṇḍī prahasanniva //

tamācāryo mahārāja viddhā pañcabhirāśugaiḥ //
punarvivyādha viṃśatyā putrāṇāṃ priyakṛttava //

mahadyuddhaṃ tayorāsīddhorarūpaṃ bhayānakam //
yathā devāsure yuddhe śambarāmararājayoḥ //

śarajālāvṛtaṃ vyoma cakratustau mahārathau / meghāviva tapāpāye vīrau samaradurmadau /
prakṛtyā ghorarūpaṃ tadāsīddhorataraṃ punaḥ //

rātriśca bharataśreṣṭha yodhānāṃ yuddhaśālinām /
kālarātrinibhā hyāsīddhorarūpā bhayānakā //

śikhaṇḍī tu mahārāja gautamasya mahaddhanuḥ /
ardhacandreṇa ciccheda sajyaṃ saviśikhaṃ tadā //

tasya kruddhaḥ kṛpo rājañśaktiṃ cikṣepa dāruṇām /
svarṇadaṇḍāmakuṇṭhāgrāṃ karmāraparimārjitām //

tāmāpatantīṃ ciccheda śikhaṇḍī bahubhiḥ śaraiḥ /
sāpatanmedinīṃ kṛttā bhāsayantī mahāprabhā //

athānyaddhanurādāya gautamo rathināṃ vāraḥ /
prācchādayacchitairbāṇairmahārāja śikhaṇḍinam //

sa cchādyamānaḥ samare gautamena yaśasvinā /
nyaṣīdata rathopasthe śikhaṇḍī rathināṃ varaḥ //

sīdantaṃ cainamālokya kṛpaḥ śāradvato yudhi /
ājaghne bahubhirbāṇairjighāṃsanniva bhārata //

vimukhaṃ tu raṇe dṛṣṭvā yājñaseniṃ mahāratham /
pāñcālāḥ somakāścaiva parivavruḥ samantataḥ //

tathaiva tava putrāśca parivavrurdvijottamam /
mahatyā senayā sārdhaṃ tato yuddhamavartata //

rathānāṃ ca raṇe rājannanyonyamabhidhāvatām /
babhūva tumulaḥ śabdo meghānāṃ garjatāmiva //

dravatāṃ sādināṃ caiva gajānāṃ ca viśāmpate /
anyonyamabhito rājankrūramāyodhanaṃ babhau //

pattīnāṃ dravatāṃ caiva pādaśabdena medinī /
akampata mahārāja bhayatrasteva cāṅganā //

rathino rathamāruhya pradrutā vegavattaram /
agṛhṇanbahavo rājañśalabhānvāyasā iva //

tathā gajānprabhinnāṃśca samprabhinnā mahāgajāḥ /
tasminneva pade yattā nigṛhṇanti sma bhārata //

sādī sādinamāsādya pattayaśca padātinam /
samāsādya raṇe'nyonyaṃ saṃrabdhā nāticakramuḥ //

dhāvatāṃ dravatāṃ caiva punarāvartatāmapi /
babhūva tatra sainyānāṃ śabdaḥ suvipulo niśi //

dīpyamānāḥ pradīpāśca rathavāraṇavājiṣu /
adṛśyanta mahārāja maholkā iva khāccyutāḥ //

sā niśā bharataśreṣṭha pradīpairavabhāsitā /
divasapratimā rājanbabhūva raṇamūrdhani //

ādityena yathā vyāptaṃ tamo loke praṇaśyati /
tathā naṣṭaṃ tamo ghoraṃ dīpairdīptairitastataḥ //

divaṃ ca pṛthivīṃ caiva diśaśca pradiśastathā /
rajasā tamasā vyāptā dyotitāḥ prabhayā punaḥ //

astrāṇāṃ kavacanānāṃ ca maṇīnāṃ ca mahātmanām /
antardadhuḥ prabhāḥ sarvā dīpaistairavabhāsitāḥ //

tasminkolāhale yuddhe vartamāne niśāmukhe /
na kiñcidvidurātmānamayamasmīti bhārata //

avadhītsamare putraṃ pitā bharatasattama / putraśca pitaraṃ mohātsakhāyaṃ ca sakhā tathā /
svasrīyaṃ mātulaścāpi svasrīyaścāpi mātulam //

sve svānpare parāṃścāpi nijaghnuritaretaram /
nirmaryādamabhūdyuddhaṃ rātrau bhīrubhayānakam //