Mahabharata · Chapter 7.169

śatānīkaṃ śaraistūrṇaṃ nirdahantaṃ camūṃ tava /
citrasenastava suto vārayāmāsa bhārata //

nākuliścitrasenaṃ tu viddhvā pañcabhirāśugaiḥ /
sa tu taṃ prativivyādha daśabhirniśitaiḥ śaraiḥ //

citraseno mahārāja śatānīkaṃ punaryudhi /
navabhirniśitairbāṇairājaghāna stanāntare //

nākulistasya viśikhairvarma sannataparvabhiḥ /
gātrātsañcāvayāmāsa tadadbhutamivābhavat //

sopetavarmā putraste virarāja bhṛśaṃ nṛpa /
utsṛjya kāle rājendra nirmokamiva pannagaḥ //

tato'sya niśitairbāṇairdhvajaṃ ciccheda nākuliḥ /
dhanuścaiva mahārāja yatamānasya saṃyuge //

sa cchinnadhanvā samare vivarmā ca mahārathaḥ /
dhanuranyanmahārāja jagrāhārividāraṇam //

tatastūrṇaṃ citraseno nākuliṃ navabhiḥ śaraiḥ /
vivyādha samare kruddho bharatānāṃ mahārathaḥ //

śatānīko'tha saṅkruddhaścitrasenasya māriṣa /
jaghāna caturo vāhānsārathiṃ ca narottamaḥ //

avaplutya rathāttasmāccitraseno mahārathaḥ /
nākuliṃ pañcaviṃśatyā śarāṇāmārdayadbalī //

tasya tatkurvataḥ karma nakulasya suto raṇe /
ardhacandreṇa ciccheda cāpaṃ ratnavibhūṣitam //

sa cchinnadhanvā viratho hatāśvo hatasārathiḥ /
āruroha rathaṃ tūrṇaṃ hārdikyasya mahātmanaḥ //

drupadaṃ tu sahānīkaṃ droṇaprepsuṃ mahāratham /
vṛṣaseno'bhyayāttūrṇaṃ kirañśaraśataistadā //

yajñasenastu samare karṇaputraṃ mahāratham /
ṣaṣṭyā śarāṇāṃ vivyādha bāhvorurasi cānagha //

vṛṣasenastu saṅkruddho yajñasenaṃ rathe sthitam /
bahubhiḥ sāyakaistīkṣṇairājaghāna stanāntare //

tāvubhau śaranunnāṅgau śarakaṇṭakitau raṇe /
vyabhrājetāṃ mahārāja śvāvidhau śalalairiva //

rukmapuṅkhaiḥ prasannāgraiḥ śaraiśchinnatanucchadau /
rudhiraughapariklinnau vyabhrājetāṃ mahāmṛdhe //

tapanīyanibhau citrau kalpavṛkṣāvivādbhutau /
kiṃśukāviva cotphullau vyakāśetāṃ raṇājire //

vṛṣasenastato rājandrupadaṃ navabhiḥ śaraiḥ /
viddhvā vivyādha saptatyā punaranyaistribhistribhiḥ //

tataḥ śarasahasrāṇi vimuñcanvibabhau tadā /
karṇaputro mahārāja varṣamāṇa ivāmbudaḥ //

[drupadastu tataḥ kruddho vṛṣasenasya kārmukam /
dvidhā ciccheda bhallena pītena niśitena ca //

so'nyatkārmukamādāya rukmabaddhaṃ navaṃ dṛḍham /
tūṇādākṛṣya vimalaṃ bhallaṃ pītaṃ śitaṃ dṛḍham //

kārmuke yojayitvā taṃ drupadaṃ sannirīkṣya ca /
ākarṇapūrṇaṃ mumuce trāsayansarvasomakān //

hṛdayaṃ tasya bhittvā ca jagāma vasudhātalam /
kaśmalaṃ prāviśadrājā vṛṣasenaśarāhataḥ //

sārathistamapovāha smaransārathiceṣṭitam / tasminprabhagne rājendra pāñcālānāṃ mahārathe // ]

tatastu drupadānīkaṃ śaraiśchinnatanucchadam /
samprādravadraṇādrājanniśīthe bhairave sati //

pradīpairaparityaktairjvaladbhistaiḥ samantataḥ /
vyarājadvasudhā tatra vītābhrā dyauriva grahaiḥ //

tathāṅgadairnipatitairvyarājata vasundharā /
prāvṛṭ्kāle mahārāja vidyudbhiriva toyadaḥ //

tataḥ karṇasutāttrastāḥ somakā vipradudruvuḥ /
yathendrabhayavitrastā dānavāstārakāmaye //

tenārdyamānāḥ samare dravamāṇāśca somakāḥ /
vyarājanta mahārāja pradīpairavabhāsitāḥ //

tāṃstu nirjitya samare karṇaputro vyarocata /
madhyandinamanuprāpto gharmāṃśuriva bhārata //

teṣu rājasahasreṣu tāvakeṣu pareṣu ca /
eka eva jvalaṃstasthau vṛṣasenaḥ pratāpavān / //

sa vijitya raṇe śūrānsomakānāṃ mahārathān /
jagāma tvaritastatra yatra rājā yudhiṣṭhiraḥ //

prativindhyamatha kruddhaṃ pradahantaṃ raṇe ripūn /
duḥśāsanastava sutaḥ pratyagacchanmahārathaḥ //

tayoḥ samāgamo rājaṃścitrarūpo babhūva ha /
vyapetajalade vyomni budhabhāskarayoriva //

prativindhyaṃ tu samare kurvāṇāṃ karma duṣkaram / apūjayanmahārāja tava sainye mahārathāḥ /
duḥśāsanastribhirbāṇairlalāṭe samavidhyata //

so'tividdho balavatā tava putreṇa dhanvinā /
virarāja mahābāhuḥ saśṛṅga iva parvataḥ //

duḥśāsanaṃ tu samare prativindhyo mahārathaḥ /
navabhiḥ sāyakairviddhā punarvivyādha saptabhiḥ //

tatra bhārata putraste kṛtavānkarma duṣkaram /
prativindhyahayānugraiḥ pātayāmāsa sāyakaiḥ //

sārathiṃ cāsya bhallena dhvajaṃ ca samapātayat /
rathaṃ ca tilaśo rājanvyadhamattasya dhanvinaḥ //

patākāśca satūṇīrā raśmīnyokrāṇi ca prabho /
ciccheda tilaśaḥ kruddhaḥśaraiḥ sannataparvabhiḥ //

virathaḥ sa tu dharmātmā dhanuṣpāṇiravasthitaḥ /
ayodhayattava sutaṃ kirañśaraśatānbahūn //

kṣurapreṇa dhanustasya ciccheda tanayastava /
athainaṃ daśabhirbāṇeśchinnadhanvānamārdayat //

taṃ dṛṣṭvā virathaṃ tatra bhrātaro'sya mahārathāḥ /
anvavartanta saṅgrāme mahatyā senayā saha //

āplutaḥ sa tato yānaṃ sutasomasya bhāsvaram /
dhanurgṛhya mahārāja vivyādha tanayaṃ tava //

tatastu tāvakāḥ sarve parivārya sutaṃ tava /
abhyavartanta vegena mahatyā senayā vṛtāḥ //

tataḥ pravavṛte yuddhaṃ tava teṣāṃ ca bhārata /
niśīthe dāruṇe kāle yamarāṣṭravivardhanam //