Mahabharata · Chapter 7.171

tasminsutumule yuddhe vartamāne bhayāvahe /
dhṛṣṭadyumno mahārāja droṇamevābhyavartata //

sandadhāno dhanuḥśreṣṭhaṃ jyāṃ vikurṣanpunaḥ punaḥ /
abhyadravata droṇasya rathaṃ rukmavibhūṣitam //

dhṛṣṭadyumnamathāyāntaṃ droṇasyāntacikīrṣayā /
parivavrurmahārāja pāñcālāḥ pāṇḍavaiḥ saha //

tathā parivṛtaṃ dṛṣṭvā droṇamācāryasattamam /
putrāste sarvato yattā rarakṣurdroṇamāhave //

balārṇavau tatastau tu sameyātāṃ niśāmukhe /
gātoddhūtau kṣubdhasatvau bhairavau sāgarāviva //

tato droṇaṃ mahārāja pāñcālyaḥ pañcabhiḥ śaraiḥ /
vivyādha hṛdaye tūrṇaṃ siṃhanādaṃ nanāda ca //

taṃ droṇaḥ pañcaviṃśatyā viddhā bhārata saṃyuge /
cicchedānyena bhallena dhanurasya mahāsvanam //

dhṛṣṭadyumnastu nirviddho droṇena bharatarṣabha /
utsasarja dhanustūrṇaṃ sandaśya daśanacchadam //

tataḥ kruddho mahārāja dhṛṣṭadyumnaḥ pratāpavān /
ādade'nyaddhanuḥśreṣṭhaṃ droṇasyāntacikīrṣayā //

vikṛṣya ca dhanuścitramākarṇātparavīrahā /
droṇasyānatkaraṃ ghoraṃ vyasṛjatsāyakaṃ tataḥ //

sa visṛṣṭo balavatā śaro ghoro mahāmṛdhe /
bhāsayāmāsa tatsainyaṃ divākara ivoditaḥ //

taṃ tu dṛṣṭvā śaraṃ ghoraṃ devagandharvamānavāḥ /
svastyastu samare rājandroṇāyetyabruvanvacaḥ //

taṃ tu sāyakamāyāntamācāryasya rathaṃ prati /
karṇo dvādaśadhaā rājaṃściccheda kṛtahastavat //

sa cchinno bahudhā rājansūtaputreṇa dhanvinā /
nipapāta śarastūrṇaṃ nirviṣo bhujago yathā //

chittvā tu samare bāṇaṃ śaraiḥ sannataparvabhiḥ /
dhṛṣṭadyumnaṃ tataḥ karṇo vivyādha daśabhiḥ śaraiḥ //

pañcabhirdroṇaputrastu svayaṃ droṇastu saptabhiḥ /
śalyaśca daśabhirbāṇaistribhirduḥśāsanastathā //

duryodhanastu viṃśatyā śakuniścāpi pañcabhiḥ /
pāñcālyaṃ tvarayā'vidhyansarva eva mahārathāḥ //

sa viddhaḥ saptabhirghorairdroṇasyārthe mahāhave / sarvānasambhramādrāja pratyaviddhyattribhistribhiḥ /
droṇaṃ drauṇiṃ ca karṇaṃ ca vivyādha ca tavātmajam //

te bhinnā dhanvinā tena dhṛṣṭadyumnaṃ punarmṛdhe /
vivyadhuḥ pañcabhistūrṇamekaiko rathināṃ varaḥ //

drumasenastu saṅkruddho rājanvivyādha patriṇā /
tribhiścānyaiḥ śaraistūrṇaṃ tiṣṭha tiṣṭheti cābravīt //

sa tu taṃ prativivyādha tribhistīkṣṇairajihmagaiḥ /
svarṇapuṅkhaiḥ śilādhautaiḥ prāṇāntakaramairyudhi //

bhallenānyena tu punaḥ suvarṇojjvalakuṇḍalam /
nicakarta śiraḥ kāyāddrumasenasya vīryavān //

tacchiro nyapatadbhūmau sandaṣṭauṣṭhapuṭaṃ raṇe /
mahāvātasamuddhūtaṃ pakvaṃ tālaphalaṃ yathā //

tānsa viddhā punaryodhānvīraḥ suniśitaiḥ śaraiḥ /
rādheyasyācchinadbhallaiḥ kārmukaṃ citrayodhinaḥ //

na tu tanmamṛṣe karṇo dhanuṣaśchedanaṃ tathā /
nikartanamivātyugraṃ lāṅgūlasya mahāhariḥ //

so'nyaddhanuḥ samādāya krodharaktekṣaṇaḥ śvasan /
abhyadravaccharaughaistaṃ dhṛṣṭadyumnaṃ mahābalam //

dṛṣṭvā karṇaṃ tu saṃrabdhaṃ te vīrāḥ ṣaḍratharṣabhāḥ /
pāñcālyaputraṃ tvaritāḥ parivavrurjighāṃsayā //

ṣaṇṇāṃ yodhapravīrāṇāṃ tāvakānāṃ puraskṛtam /
mṛtyorāsyamanuprāptaṃ dhṛṣṭadyumnamamamaṃsmahi //

patasminneva kāle tu dāśārho vikirañcharān /
dhṛṣṭadyumnaṃ parākrāntaṃ sātyakiḥ pratyapadyata //

tamāyāntaṃ maheṣvāsaṃ sātyakiṃ yuddhadurmadam /
rādheyo daśabhirbāṇaiḥ pratyavidhyadajihmagaiḥ //

taṃ sātyakirmahārāja vivyādha daśabhiḥ śaraiḥ /
paśyatāṃ sarvavīrāṇāṃ mā gāstiṣṭheti cābravīt //

sa sātyakestu balinaḥ karṇasya ca mahātmanaḥ /
āsītsamāgamo rājanbalivāsavayoriva //

trāsayanrathaghoṣeṇa kṣatriyānkṣatriyarṣabhaḥ /
rājīvalocanaṃ karṇaṃ sātyakiḥ pratyavidhyata //

kampayanniva ghoṣeṇa dhanuṣo vasudhāṃ balī /
sūtaputro mahārāja sātyakiṃ pratyayodhayat //

vipāṭhakarṇinārācairvatsadantaiḥ kṣurairapi /
karṇaḥ śaraśataiścāpi śaineyaṃ pratyanidvyata //

tathaiva yudhyamāno'pi vṛṣṇīnāṃ pravaro yudhi /
abhyavarṣaccharaiḥ karṇaṃ tadyuddhamabhavatsamam //

tāvakāśca mahārāja karṇaputraśca daṃśitaḥ /
sātyakiṃ vivyadhustūrṇa samantānniśitaiḥ śaraiḥ //

astrairastrāṇi saṃvārya teṣāṃ karṇasya vā vibho /
avidvyatsātyakiḥ kruddho vṛṣasenaṃ stanāntare //

tena bāṇena nirviddho vṛṣaseno viśāmpate /
nyapatatsa rathe mūḍho dhanurutsṛjya vīryavān //

tataḥ karṇo hataṃ matvā vṛṣasenaṃ mahāratham /
putraśokābhisantaptaḥ sātyakiṃ pratyapīḍayat //

pīḍyamānastu karṇena yuyudhāno mahārathaḥ /
vivyādha bahubhiḥ karṇaṃ tvaramāṇaḥ punaḥpunaḥ //

sa karṇaṃ daśabhirviddhvā vṛṣasenaṃ ca saptabhiḥ /
sa hastāvāpadhanuṣī tayościccheda sātvataḥ //

tāvanye dhanuṣī sajje kṛtvā śatrubhayaṅkare //
yuyudhānamāvidhyetāṃ samantānniśitaiḥ śaraiḥ //

vartamāne tu saṅgrame tasminvīravarakṣaye /
atīva śuśruve rājangāṇḍīvasya mahāsvanaḥ //

śrutvā tu rathanirghoṣaṃ gāṇḍīvasya ca niḥsvanam /
sūtaputro'bravīdrājanduryodhanamidaṃ vacaḥ //

eṣa sarvāṃ camūṃ hatvā mukhyāṃścaiva nararṣabhān /
pauravāṃśca maheṣvāso vikṣipannuttamaṃ dhanuḥ //

pārtho vijayate tatra gāṇḍīvaninado mahān /
śrūyate rathaghoṣaśca vāsavasyeva nardataḥ //

karoti pāṇḍavo vyaktaṃ karmaupayikamātmanaḥ /
eṣā vidāryate rājanbahudhā bhāratī camūḥ //

viprakīrṇānyanīkāni na hi tiṣṭhanti karhicit /
vāteneva samuddhūtamabhrajālaṃ vidīryate //

savyasācinamāsādya bhinnā nauriva sāgare //

dravatāṃ yodhamukhyānāṃ gāṇḍīvapreṣitaiḥ śaraiḥ /
viddhānāṃ śataśo rājañśrūyate niḥsvano mahān //

śṛṇu dundubhinirghoṣamarjunasya rathaṃ prati /
niśīthe rājaśārdūla stanayitnorivāmbare //

hāhākāraravāṃścaiva siṃhanādāṃśca puṣkalān /
śṛṇu śabdānbahuvidhānarjunasya rathaṃ prati //

ayaṃ madhye sthito'smākaṃ sātyakiḥ sātvatāṃ varaḥ /
iha cellabhyate lakṣyaṃ kṛtsnāñjeṣyāmahe parān //

eṣa pāñcālarājasya putro droṇena saṅgataḥ /
sarvataḥ saṃvṛto yodhaiḥ śūraiśca rathasattamaiḥ //

sātyakiṃ yadi hanyāma dhṛṣṭadyumnaṃ ca pārṣatam /
asaṃśayaṃ mahārāja dhruvo no vijayo bhavet //

saubhadravadimau vīrau parivārya mahārathau /
prayatāyo mahārāja nihantuṃ vṛṣṇipārṣatau //

savyasācī puro'bhyeti droṇānīkāya bhārata /
saṃsaktaṃ sātyakiṃ jñātvā bahubhiḥ kurupuṅgavaiḥ //

tatra gacchantu bahavaḥ pravarā rathasattamāḥ /
yāvatpārtho na jānāti sātyakiṃ bahubhirvṛtam //

te tvaradhvaṃ tathā śūrāḥ śarāṇāṃ mokṣaṇe bhṛśam / yathā tviha vrajatyeṣa paralokāya mādhavaḥ /
tathā kuru mahārāja sunītyā suprayuktayā //

karṇasya matamāsthāya putraste prāha saubalam /
yathendraḥ samare rājanprāha viṣṇuṃ yaśasvinam //

vṛtaḥ sahasrairdaśabhirgajānāmanivartinām / rathaiśca daśasāhasraistūrṇaṃ yāhi dhanañjayam /

duḥśāsano durviṣahaḥ subāhurduḥ pradharṣaṇaḥ /
ete tvāmanuyāsyanti pattibhirbahubhirvṛtāḥ //

jahi kṛṣṇau mahābāho dharmarājaṃ ca mātula /
nakulaṃ sahadevaṃ ca bhīmasenaṃ tathaiva ca //

devānāmiva devendre jayāśā tvayi me sthitā /
jahi mātula kaunteyānasurāniva pāvakiḥ //

evamukto yayau pārthānputreṇa tava saubalaḥ /
mahatyā senayā sārdhaṃ saha putraiśca te vibho //

priyārthaṃ tava putrāṇāṃ didhakṣuḥ pāṇḍunandanān /
tataḥ pravavṛte yuddhaṃ tāvakānāṃ paraiḥ saha //

prayāte saubale rājanpāṇḍavānāmanīkinīm /
balena mahatā yuktāḥ sūtaputrastu sātvatam //

abhyayāttvarito yuddhe kirañśaraśatānbahūn /
tathaiva pārthivāḥ sarve sātyakiṃ paryavārayan //

bhāradvājastato gatvā dhṛṣṭadyumnarathaṃ prati / mahadyuddhaṃ tadāsīttuṃ droṇasya niśi bhārata /
dhṛṣṭadyumnena vīreṇa pāñcālaiśca sahādbhutam //