Mahabharata · Chapter 7.163

somadattaṃ tu samprekṣya vidhunvānaṃ mahaddhanuḥ /
sātyakiḥ prāha yantāraṃ somadattāya māṃ vaha //

na hyahatvā raṇe śatruṃ somadattaṃ mahābalam /
nivartiṣye raṇātsūta satyametadvaco mama //

tataḥ sampraiṣayadyantā saindhavāṃstānmanojavān /
turaṅgāmāñchaṅkhavarṇānsarvaśabdātigānraṇe //

te'vahanyuyudhānaṃ tu manomārutaraṃhasaḥ /
yathendraṃ harayo rājanpurā daityavadhodyatam //

tamāpatantaṃ samprekṣya sātvataṃ rabhasaṃ raṇe /
somadatto mahābāhurasambhrānto nyavartata //

vimuñcañcharavarṣāṇi parjanya iva vṛṣṭimān /
chādayāmāsa śaineyaṃ jalado bhāskaraṃ yathā //

asambhrāntaśca samare sātyakiḥ kurupuṅgavam /
chādayāmāsa bāṇaughaiḥ samantādbharatarṣabha //

somadattastutaṃ ṣaṣṭyā vivyādhorasi mādhavam /
sātyakiścāpi taṃ rājannavidhyatsāyakaiḥ śitaiḥ //

tāvanyonyaṃ śaraiḥ kṛttau vyarājetāṃ nararṣabhau /
supuṣpau puṣpasamaye puṣpitāviva kiṃśakau //

rudhirokṣitasarvāṅgau kuruvṛṣṇiyaśaskarau /
parasparamavekṣetāṃ dahantāviva locanaiḥ //

rathamaṇḍalamārgeṣu carantāvarimardanau /
ghorarūpau hitāvāstāṃ vṛṣṭimantāvivāmbudau //

śarasambhinnagātrau tu sarvataḥ śakhalīkṛtau /
śvāvidhāviva rājendra dṛśyetāṃ śaravikṣatau //

suvarṇapuṅkhairiṣubhirācitau tau vyarājatām /
khadyotairāvṛtau rājanprāvṛṣīva vanaspatī //

sampradīpitasarvāṅgau sāyakaistairmahārathau /
adṛśyetāṃ raṇe kruddhāvulkābhiriva kuñjarau //

tato yudhi mahāraja somadatto mahārathaḥ /
ardhacandrema ciccheda mādhavasya mahaddhanuḥ //

athainaṃ pañcaviṃśatyā sāyakānāṃ samārpayat /
tvaramāṇastvarākāle punaśca daśabhiḥ śaraiḥ //

athānyaddhanurādāya sātyakirvegavattaram /
pañcabhiḥ sāyakaistūrṇaṃ somadattamavidhyata //

tato'pareṇa bhallena dhvajaṃ ciccheda kāñcanam /
bāhlīkasya raṇe rājansātyakiḥ prahasanniva //

somadattastvasambhrānto dṛṣṭvā ketuṃ nipātitam /
śaineyaṃ pañcaviṃśatyā sāyakānāṃ samācinot //

sātvato'pi raṇe kruddhaḥ somadattasya dhanvinaḥ /
dhanuśchiccheda bhallena kṣurapreṇa śitena ha //

athainaṃ rukmapuṅkhānāṃ śatena nataparvaṇām /
ācinodbahudhā rājanbhagnadaṃṣṭramiva dvipam //

athānyaddhanurādāya somadatto mahārathaḥ /
sātyakiṃ chādayāmāsa śaravṛṣṭyā mahābalaḥ //

somadattaṃ tu saṅkruddho raṇe vivyādha sātyakiḥ /
sātyakiṃ śarajālena somadatto'pyapīḍayat //

daśabhiḥ sātvatasyārthe bhīmo'hanbāhlikātmajam /
somadattopyasambhrānto bhīmamārcchacchitaiḥ śaraiḥ //

tatastu sātvatasyārthe bhīmaseno navaṃ dṛḍham /
mumoca parighaṃ ghoraṃ somadattasya vakṣasi //

tamāpatantaṃ vegena parighaṃ ghoradarśanam /
dvidhā ciccheda samare prahasanniva kauravaḥ //

sa papāta dvidhā cchinna āyasaḥ parigho mahān /
mahīdharasyeva mahacchikharaṃ vajradāritam //

tatastu sātyakī rājansomadattasya saṃyuge /
dhanuściccheda bhallena hastāvāpaṃ ca pañcabhiḥ //

tataścaturbhiśca śaraistūrṇaṃ tāṃsturagottamān /
samīpaṃ preṣayāmāsa pretarājasya bhārata //

sāratheśca śiraḥ kāyādbhallena nataparvaṇā /
jahāra naraśārdūlaḥ prahasañchinipuṅgavaḥ //

tataḥ śaraṃ mahāghoraṃ jvalantamiva pāvakam /
mumoca sātvato rājansvarṇapuṅgaṃ śilāśitam //

sa vimukto balavatā śaineyena śarottamaḥ /
ghorastasyorasi vibho nipapātāśu bhārata //

so'tividdho mahārāja sātvatena mahārathaḥ /
somadatto mahābāhurnipapāta mamāra ca //

taṃ dṛṣṭvā nihataṃ tatra somadattaṃ mahārathāḥ /
mahatā śaravarṣeṇa yuyudhānamupādravan //

chādyamānaṃ śarairdṛṣṭvā yuyudhānaṃ yudhiṣṭhiraḥ / pāṇḍavāśca mahārāja saha sarvaiḥ prabhadrakaiḥ /
mahatyā senayā sārdhaṃ droṇānīkamupādravan //

tato yudhiṣṭhiraḥ kruddhastāvakānāṃ mahābalam /
śarairvidrāvayāmāsa bhāradvājasya paśyataḥ //

sainyāni drāvayantaṃ tu droṇo dṛṣṭvā yudhiṣṭhiram /
abhidudrāva vegena krodhasaṃraktalocanaḥ //

tataḥ suniśitairbāṇaiḥ pārthaṃ vivyādha saptabhiḥ /
yudhiṣṭhiro'pi saṅkruddhaḥ prativivyādha pañcabhiḥ //

so'tividdho mahābāhuḥ sṛkviṇī parisaṃlihan /
yudhiṣṭhirasya ciccheda dhvajaṃ kārmukameva ca //

sa cchinnadhanvā tvaritastvarākāle nṛpottamaḥ /
anyadādatta vegena kārmukaṃ samare dṛḍham //

tataḥ śarasahasreṇa droṇaṃ vivyādha pārthivaḥ /
sāśvasūtadhvajarathaṃ tadadbhutamivābhavat //

tato muhūrtaṃ vyathitaḥ śarapātaprapīḍitaḥ /
niṣasāda rathopasthe droṇo bharatasattama //

pratilabhya tataḥ sañjñāṃ muhūrtāddvijasattamaḥ /
krodhena mahatā'viṣṭo vāyavyāstramavāsṛjat //

asambhrāntastataḥ pārtho vāyavyenaiva vīryavān /
tadastramastreṇa raṇe stambhayāmāsa bhārata //

ciccheda ca dhanurdīrghaṃ brāhmaṇasya ca pāṇḍavaḥ / tato'nyaddhanurādatta droṇaḥ kṣatriyamardanaḥ /
tadapyasya śitairbhallaiściccheda kurupuṅgavaḥ //

tato'bravīdvāsudevaḥ kuntīputraṃ yudhiṣṭhiram //

yudhiṣṭhira mahābāho yattvāṃ vakṣyāmi tacchraṇu /
upāramasva yuddhe tvaṃ droṇādbharatasattama //

yatate hi sadā droṇo grahaṇe tava saṃyuge /
nānurūpamahaṃ manye yuddhamasya tvayā saha //

yo'sya sṛṣṭo vināśāya sa evainaṃ haniṣyati /
parivarjya guruṃ yāhi yatra rājā suyodhanaḥ //

rājā rājñā hi yoddhavyo nārājñā yuddhamiṣyate /
tatra tvaṃ gaccha kaunteya hastyaśvarathasaṃvṛtaḥ //

yāvanmātreṇa ca mayā sahāyena dhanañjayaḥ /
bhīmaśca rathaśārdūlo yudhyate kauravaiḥ saha //

vāsudevavacaḥ śrutvā dharmarājo yudhiṣṭhiraḥ /
muhūrtaṃ cintayitvā tu tato dāruṇamāhavam //

prāyāddrutamamitraghno yatra bhīmo vyavasthitaḥ /
vinighnaṃstāvakānyodhānvyāditāsya ivāntakaḥ //

rathaghoṣeṇa mahatā nādayanvasudhātalam / parjanya iva dharmānte nādayanvai diśo daśa /
bhīmasya nighnataḥ śatrūnpārṣṇiṃ jāgraha pāṇḍavaḥ //

droṇo'pi pāṇḍupāñcālānvyadhamadrajanīmukhe /
nādayaṃstalaghoṣeṇa tava sainyāni māriṣa //