Mahabharata · Chapter 7.162

tato yudhiṣṭhiraścaiva bhīmasenaśca pāṇḍavaḥ /
droṇaputraṃ mahārāja samantātparyavārayan //

tato duryodhano rājā bhāradvājena saṃvṛtaḥ / abhyayātpāṇḍavānsaṅkhye tato yuddhamavartata /
ghorarūpaṃ mahārāja bhīrūṇāṃ bhayavardhanam //

ambaṣṭhānmālavānvaṅgāñchibīṃstraigartakānapi /
prāhiṇonmṛtyulokāya gaṇānkruddho vṛkodaraḥ //

abhīṣāhāñchūrasenānkṣatriyānyuddhadurmadān /
nikṛttya pṛthivīṃ cakre bhīmaḥ śoṇitakardamām //

yaudheyānadrijānrājanmadrakānmālavānapi /
prāhiṇonmṛtyulokāya kirīṭī niśitaiḥ śaraiḥ //

pragāḍhamañcogatibhirnārācairabhitāḍitāḥ /
nipeturdviradā bhūmau dviśṛṅgā iva parvatāḥ //

nikṛttairhastihastaiśca ceṣṭamānairitastataḥ /
rarāja vasudhā'kīrṇā visarpadbhirivoragaiḥ //

kṣiptaiḥ kanakacitraiśca nṛpacchatraiḥ kṣitirbabhau /
dyaurivādityacandrādyairgrahaiḥ kīrṇā yugakṣaye //

hata praharatābhītā vidhyata vyavakṛntata /
ityāsīttumulaḥ śabdaḥ śoṇāśvasya rathaṃ prati //

droṇastu paramakruddho vāyavyāstreṇa saṃyuge /
vyadhamattānmahavāyurmeghāniva duratyayaḥ //

te hanyamānā droṇena pāñcālāḥ prādravanbhayāt /
paśyato bhīmasenasya pārthasya ca mahātmanaḥ //

tataḥ kirīṭi bhīmaśca sahasā sannyavartatām /
mahatā rathavaṃśena parigṛhya balaṃ mahat //

bībhatsurdakṣiṇaṃ vārśvamuttaraṃ tu vṛkodaraḥ /
bhāradvājaṃ śaraughābhyāṃ mahadbhāmabhyavarṣatām //

tau tathā sṛñjayāścaiva pāñcālāśca mahaujasaḥ /
anvagacchanmahārāja mātsyaiśca saha somakaiḥ //

tathaiva tava putrasya rathodārāḥ prahāriṇaḥ /
mahatyā senayā rājañjagmurdroṇarathaṃ prati //

tataḥ sā bhāratī senā hanyamānā kirīṭinā /
tamasā nidrayā caiva punareva vyadīryata //

droṇena vāryamāṇāste svayaṃ tava sutena ca /
nāśakyanta mahārāja yodhā vārayituṃ tadā //

sā pāṇḍuputrasya śarairdīryamāṇā mahācamūḥ /
tamasā saṃvṛte loke vyadravatsarvatomukhī //

utsṛjya śataśo vāhāṃstatra kecinnarādhipāḥ /
prādravanta mahārāja bhayāviṣṭāḥ samantataḥ //