Mahabharata · Chapter 7.158

drupadasyātmajāndṛṣṭvā kuntibhojasutāṃstathā /
droṇaputreṇa nihatānrākṣasāṃśca sahasraśaḥ //

yudhiṣṭhiro bhīmaseno dhṛṣṭadyumnaśca pārṣataḥ /
yuyudhānaśca saṃyattā yuddhāyaiva mano dadhuḥ //

somadattaḥ punaḥ kruddho dṛṣṭvā sātyakimāhave /
mahatā śaravarṣeṇa cchādayāmāsa bhārata //

tataḥ samabhavadyuddhamatīva bhayavardhanam /
tvadīyānāṃ pareṣāṃ ca ghoraṃ vijayakāṅkṣiṇām //

taṃ dṛṣṭvā samupāyāntaṃ rukmapuṅkhaiḥ śilāśitaiḥ /
daśabhiḥ sātvatasyārthe bhīmo vivyādha sāyakaiḥ //

somadatto'pi taṃ vīraṃ śatena pratyavidhyata /
sātvatastvabhisankruddhaḥ putrādhibhirabhiplutam //

vṛddhaṃ vṛddhaguṇairyuktaṃ yayātimiva nāhuṣam / vivyādha daśabhistīkṣṇaiḥ śarairvajranipātanaiḥ /
śaktyā cainaṃ vinirbhidya punarvivyādha saptabhiḥ //

tatastu sātyakerarthe bhīmaseno navaṃ dṛḍham /
mumoca parighaṃ ghoraṃ somadattasya mūrdhani //

sātvato'pyagnisaṅkāśaṃ mumoca śaramuttamam /
somadattorasi kruddhaḥ supatraṃ niśitaṃ yudhi //

yugapatpetaturvīra ghorau parighamārgaṇau /
śarīre somadattasya sa papāta mahārathaḥ //

vyāmohite tunaye bāhlīkastamupādravat /
visṛjañcharavarṣāṇi kālavarṣīva toyadaḥ //

bhīmo'tha sātvatasyārthe bāhlīkaṃ navabhiḥ śaraiḥ /
prātipeyaṃ mahātmānaṃ vivyādha raṇamūrdhani //

prātipeyastu saṅkruddhaḥ śaktiṃ bhīmasya vakṣasi /
nicakhāna mahābāhuḥ purandara ivāśanim //

sa tathā'bhihato bhīmaścakampe ca mumoha ca /
prāpya cetaśca balavāngadāmasmai sasarja ha //

sā pāṇḍavena prahitā bāhlīkasya śiro'harat /
sa papāta hataḥ pṛthvyāṃ vajrāhata ivādrirāṭ //

tasminvinihate vīre bāhlīke puruṣarṣabha /
putrāste'bhyardayanbhīmaṃ daśa dāśaratheḥ samāḥ //

nāgadatto dṛḍharatho mahābāhurayobhujaḥ /
dṛḍhaḥ suhasto virajāḥ pramāthyugro'nuyāyyapi //

tāndṛṣṭvā cukrudhe bhīmo jagṛhe bhārasādhanān /
ekamekaṃ samuddiśya pātayāmāsa marmasu //

te viddhā vyasavaḥ petuḥ syandanebhyo hataujasaḥ /
caṇḍavātaprabhagnāstu parvatāgrānmahīruhāḥ //

nārācairdaśabhirbhīmastānnihatya tavātmajān /
karṇasya dayitaṃ putraṃ vṛṣasenamavākirat //

tato vṛkaratho nāma bhrātā karṇasya viśrutaḥ /
jaghāna bhīmaṃ nārācaistamapyabhyadravadbalī //

tataḥ saptarathānvīraḥ śyālānāṃ tava bhārata /
nihatya bhīmo nārācaiḥ śatacandramapothayat //

amarṣayanto nihataṃ śatacandraṃ mahāratham /
śakunerbhrātaro vīrā gavākṣaḥ śarabho vibhuḥ //

subhago bhānudattaśca śūrāḥ pañca mahārathāḥ /
abhidrutya śaraistīkṣṇairbhīmasenamatāḍayan //

sa tāḍyamāno nārācairvṛṣṭivegairivācalaḥ /
jaghāna pañcabhirbāṇaiḥ pañcaivātirathānbalī //

tāndṛṣṭvā nihatānvīrānvicelurnṛpasattamāḥ //

tato yudhiṣṭhiraḥ kruddhastavānīkamaśātayat //
miṣataḥ kumbhayonestu putrāṇāṃ tava cānagha //

ambaṣṭhānmālavāñchūrāṃstrigartānsaśibīnapi /
prāhiṇonmṛtyulokāya kruddho yuddhe yudhiṣṭhiraḥ //

abhīṣāhāñchūrasenānbāhlīkānsavasātikān /
nihatya pṛthivīṃ rājā cakre śoṇitakardamām //

yaudheyānmālavānrājanmadrakāṇāṃ gaṇānyudhi /
prāhiṇonmṛtyulokāya śūrānbāṇairyudhiṣṭhiraḥ //

hatāharata gṛhṇīta vidhyata vyavakṛntata /
ityāsīttumulaḥ śabdo yudhiṣṭhirarathaṃ prati //

sainyāni drāvayantaṃ taṃ droṇo dṛṣṭvā yudhiṣṭhiram /
coditastava putreṇa sāyakairabhyavākirat //

droṇastu paramakruddho vāyavyāstreṇa pārthivam /
vivyādha so'pi taddivyamastramastreṇa jaghnivān //

tasminvinihate cāstre bhāradvājo yudhiṣṭhire / vāruṇaṃ yāmyamāgneyaṃ tvāṣṭraṃ sāvitrameva ca /
cikṣepa paramakruddho jighāṃsuḥ pāṇḍunandanam //

kṣiptāni kṣipyamāṇāni tāni cāstrāṇi dharmajaḥ /
jaghānāstrairmahābāhuḥ kumbhayoneravitrasan //

satyāṃ cikīrṣamāṇastu pratijñāṃ kumbhasambhavaḥ //

prāduścakre'stramaindraṃ vai prājāpatyaṃ ca bhārata /
jighāṃsurdharmatanayaṃ tava putrahite rataḥ //

patiḥ kurūṇāṃ gajasiṃhagāmī viśālavakṣāḥ pṛthulohitākṣaḥ /
prāduścakārāstramahīnatejā māhendramastraṃ sa jaghāna tena //

vihanyamāneṣvastreṣu droṇaḥ krodhasamanvitaḥ /
yudhiṣṭhiravadhaṃ prepsurbrāhmamastramudairayat //

tato nājñāsiṣaṃ kiñciddhoreṇa tamasā'vṛte /
sarvabhūtāni ca paraṃ trāsaṃ jagmurmahīpate //

brahmāstramudyataṃ dṛṣṭvā kuntīputro yudhiṣṭhiraḥ /
brahmāstreṇaiva rājendra tadastraṃ pratyavārayat //

tataḥ sainikamukhyāste praśaśaṃsurnararṣabhau /
droṇapārthau maheṣvāsau sarvayuddhaviśāradau //

tataḥ pramucya kaunteyaṃ droṇo drupadavāhinīm /
vyadhamatkrodhatāmrākṣo vāyavyāstreṇa bhārata //

te hanyamānā droṇena pāñcālāḥ prādravanbhayāt /
paśyato bhīmasenasya pārthasya ca mahātmanaḥ //

tataḥ kirīṭī bhīmaśca sahasā sannyavartatām /
mahaddhyāṃ rathavaṃśābhyāṃ parigṛhya balaṃ tadā //

bībhatsurdakṣiṇaṃ pārśvamuttaraṃ ca vṛkodaraḥ /
bhāradvājaṃ śaraughābhyāṃ mahadbhyāmabhyavarṣatām //

kekayāḥ sṛñjayāścaiva pāñcālāśca mahaujasaḥ /
anvagacchanmahārāja mātsyāśca saha sātvataiḥ //

tataḥ sā bhāratī senā vadhyamānā kirīṭinā /
tamasā nidrayā caiva punareva vyadīryata //

droṇena vāryamāṇāste svayaṃ tava sutena ca /
nāśakyanta mahārāja yodhā vārayituṃ tadā //