Mahabharata · Chapter 7.159

udīryamāṇaṃ taddṛṣṭvā pāṇḍavānāṃ mahadbalam /
aviṣahyaṃ ca manvānaḥ karṇaṃ duryodhano'bravīt //

ayaṃ sa kālaḥ samprāpto mitrāṇāṃ mitravatsala /
trāyasva samare karṇa sarvānyodhānmahārathān //

pāñcālairmatsyakaikeyaiḥ pāṇḍavaiśca mahārathaiḥ /
vṛtānsamantātsahkruddhairniḥ śvasadbhirivoragaiḥ //

ete nadanti saṃhṛṣṭāḥ pāṇḍavā jitakāśinaḥ /
śakropamāśca bahavaḥ pāñcālānāṃ rathavrajāḥ //
karṇa uvāca /

paritrātumiha prāpto yadi pārthaṃ purandaraḥ /
tamapyāśu parājitya tato hantā'smi pāṇḍavam //

satyaṃ te pratijānāmi samāśvasihi bhārata /
hantāsmi pāṇḍutanayānpāñcālāṃśca samāgatān //

jayaṃ te pratidāsyāmi vāsavasyeva pāvakiḥ /
priyaṃ tava mayā kāryamiti jīvāmi pārthiva //

sarveṣāmeva pārthānāṃ phalguno balavattaraḥ /
tasyāmoghāṃ vimokṣyāmiśaktiṃ śakravinirmitāṃ //

tasminhate maheṣvāse bhrātarastasya mānada /
tava vaśyā bhaviṣyanti vanaṃ yāsyanti vā punaḥ //

mayi jīvati kauravya viṣādaṃ mā kṛthāḥ kvacit /
ahaṃ jeṣyāmi samare sahitānsarvapāṇḍavān //

pāñcālānkekayāṃścaiva vṛṣṇīṃścāpi samāgatān /
bāṇaughaiḥ śakalīkṛtya tava dāsyāmi medinīm //
sañjaya uvāca /

evaṃ bruvāṇaṃ karṇaṃ tu kṛpaḥ śāradvato'bravīt /
smayanniva mahābāhuḥ sūtaputramidaṃ vacaḥ //

śobhanaṃ śobhanaṃ karṇa sanāthaḥ kurupuṅgavaḥ /
tvayā nāthena rādheya vacasā yadi sidhyati //

bahuśaḥ katthase karṇa kauravasya samīpataḥ /
na tu te vikramaḥ kaściddṛśyate phalameva vā //

samāgamaḥ pāṇḍusutairdṛṣṭaste bahuśo yudhi /
sarvatra nirjitaścāsi pāṇḍavaiḥ sūtanandana //

hiyamāṇe tadā karṇa gandharvairdhṛtarāṣṭraje /
tadā'yudhyanta sainyāni tvameko'gre'palāyithāḥ //

virāṭanagare cāpi sametāḥ sarvakauravāḥ /
pārthena nirjitā yuddhe tvaṃ ca karṇa sahānujaḥ //

ekasyāpyasamarthastvaṃ phalgunasya raṇājire /
kathamutsahase jetuṃ sakṛṣṇānsarvapāṇḍavān //

abruvankarṇa yudhyasva katthase bahu sūtaja /
anuktvā vikramedyastu tadvai satpuruṣavratam //

garjitvā sūtaputra tvaṃ śāradābhra ivājalaḥ /
niṣphalo dṛśyase karṇa tacca rājā na budhyate //

tāvadgarjasva rādheya yāvatpārthaṃ na paśyasi /
ārātpārthaṃ hi te dṛṣṭvā durlabhaṃ garjitaṃ punaḥ //

tvamanāsādya tānbāṇānphalgunasya vigarjasi /
pārthasāyakavinddhasya durlabhaṃ garjitaṃ tava //

bāhubhiḥ kṣatriyāḥ śūrā vāgbhiḥ śūrā dvijātayaḥ / dhanuṣā phalgunaḥ śūraḥ karṇaḥ śūro manorathaiḥ /
toṣito yena rudro'pi kaḥ pārthaṃ pratighātayet //

evaṃ saṃruṣitastena tadā śāradvatena ha /
karṇaḥ praharatāṃ śreṣṭhaḥ kṛpaṃ vākyamathābravīt //

śūrā garjanti satataṃ prāvṛṣīva valāhakāḥ /
phalaṃ cāśu prayacchanti bījamuptamanūṣare //

doṣamatra na paśyāmi śūrāṇāṃ raṇamūrdhani /
tattadvikatthamānānāṃ bhāraṃ codvahatāṃ mṛdhe //

yaṃ bhāraṃ puruṣo voḍhuṃ manasā hi vyavasyati /
daivamasya dhruvaṃ tatra sāhāyyāyopapadyate //

vyavasāyadvitīyo'haṃ manasā bhāramudvahan / hatvā pāṇḍusutānājau sakṛṣṇānsahasātvatān /
garjāmi yadyahaṃ vipra tava kiṃ tatra naśyati //

vṛthā śūrā na garjanti sajalā iva toyadāḥ /
sāmarthyamātmano jñātvā tato garjanti paṇḍitāḥ //

so'hamadya raṇe yattau sahitau kṛṣmapāṇḍavau /
utsahāmi raṇe jetuṃ tato garjāmi gautama //

paśya tvaṃ garjitasyāsya phalaṃ me vipra sānugān / hatvā pāṇḍusutānājau sahakṛṣṇānsasātvatān /
duryodhanāya dāsyāmi pṛthivīṃ hatakaṇṭakām //
kṛpa uvāca /

manorathapralāpā me na grāhyāstava sūtaja //

sadā kṣipasi vai kṛṣṇau dharmarājaṃ ca pāṇḍavam /
dhruvastatra jayaḥ karṇa yatra yuddhaviśāradau //

devagandharvayakṣāṇāṃ manuṣyoragarakṣasām /
daṃśitānāmapi raṇe ajeyau kṛṣṇapāṇḍavau //

brahmaṇyaḥ satyavāgdānto gurudaivatapūjakaḥ /
nityaṃ dharmarataścaiva kṛtāstraśca viśeṣataḥ //

dhṛtimāṃśca kṛtajñaśca dharmaputro yudhiṣṭhiraḥ /
bhrātaraścāsya balinaḥ sarvāstreṣu kṛtaśramāḥ //

guruvṛttiratāḥ prājñā dharmanityā yaśasvinaḥ /
sambandhinaścendravīryāḥ svanurtāḥ prahāriṇaḥ //

dhṛṣṭadyumnaḥ śikhaṇḍī ca daurmukhirjanamejayaḥ /
candraseno rudrasenaḥ kīrtidharmā dhruvo dharaḥ //

vasucandro dāmacandraḥ siṃhacandraḥ sutejanaḥ /
drupadasya tathā putrā drupadaśca mahāstravit //

yeṣāmarthāya saṃyatto matsyarājaḥ sahānujaḥ /
śatānīkaḥ sūryadattaḥ śrutānīkaḥ śrutadhvajaḥ //

balānīko jayānīko jayāśvo rathavāhanaḥ /
candrodayaḥ samaratho virāṭabhrātaraḥ śubhāḥ //

yamau ca draupadeyāśca rākṣasaśca ghaṭotkacaḥ /
yeṣāmarthāya yudhyante na teṣāṃ vidyate kṣayaḥ //

ete cānye ca bahavo gaṇāḥ pāṇḍusutasya vai //

kāmaṃ khalu jagatsarvaṃ sadevāsuramānuṣam / sayakṣarākṣasagaṇaṃ sabhūtabhujagadvipam /
niḥśeṣamastravīryeṇa kurvāte bhīmaphalgunau //

yudhiṣṭhiraśca pṛthivīṃ nirdaheddhoracakṣuṣā //

aprameyabalaḥ śauriryeṣāmarthe ca daṃśitaḥ /
kathaṃ tānsaṃyuge karṇa jetumutsahase parān //

mahānapanayastveṣa nityaṃ hi tava sūtaja /
yastvamutsahase yoddhuṃ samare śauriṇā saha //
sañjaya uvāca /

evamuktastu rādheyaḥ prahasanbharatarṣabha /
abravīcca tadā karṇo guraṃ śāradvataṃ kṛpam //

satyamuktaṃ tvayā brahmanpāṇḍavānprati yadvacaḥ /
ete cānye ca bahavo guṇāḥ pāṇḍusuteṣu vai //

ajayyāśca raṇe pārthā devairapi savāsavaiḥ /
sadaityayakṣagandharvaiḥ piśācoragarākṣasaiḥ //

tathāpi pārthāñjeṣyāmi śaktyā vāsavadattayā / mama hyamoghā datteyaṃ śaktiḥ śakreṇa vai dvija /
etayā nihaniṣyāmi savyasācinamāhave //

hate tu pāṇḍave kṛṣṇe bhrātaraścāsya sodarāḥ /
anarjunā na śakṣyanti mahīṃ bhoktuṃ kathañcana //

teṣu naṣṭeṣu sarveṣu pṛthivīyaṃ sasāgarā /
ayatnātkauravendrasya vaśe sthāsyati gautam //

sunītairiha sarvārthāḥ sidhyante nātra saṃśayaḥ /
etamarthamahaṃ jñātvā tato garjāmi gautama //

tvaṃ tu vipraśca vṛddhaśca aśaktaścāpi saṃyuge /
kṛtasnehaśca pārtheṣu mohānmāmavamanyase //

yadyevaṃ vakṣyase bhūyo mamāpriyamiha dvija /
tataste khaṅgamudyamya jihvāṃ chetsyāmi durmate //

yaccāpi pāṇḍavānvipra stotumicchasi saṃyuge /
bhīṣayansarvasainyāni kauraveyāṃśca durmate //

atrāpi śṛṇu me vākyaṃ yathāvadbruvato dvija /
duryodhanaśca droṇaśca śakunirdurmukho jayaḥ //

duḥśāsano vṛṣaseno madrājastvameva ca /
somadattaśca bhūriśca tathā drauṇirviviṃśatiḥ //

tiṣṭheyurdaṃśitā yatrā sarve yuddhaviśāradāḥ /
jayedetānnaraḥ ko nu śakratulyabalo'pyariḥ //

śūrāśca hi kṛtāstrāśca balinaḥ svargalipsavaḥ /
dharmajñā yuddhakuśalā hanyuryuddhe surānapi //

ete sthāsyanti saṅgrāme pāṇḍavānāṃ vadhārthinaḥ /
jayamākāṅkṣamāṇā hi kauraveyasya daṃśitāḥ //

daivāyattamahaṃ manye jayaṃ subalināmapi /
yatra bhīṣmo mahābāhuḥ śete śaraśatācitaḥ //

vikarṇaścitrasenaśca bāhlīko'tha jayadrathaḥ /
bhūriśravā jayaścaiva jalasandhaḥ sudakṣiṇaḥ //

śalaśca rathināṃ śreṣṭho bhagadattaśca vīryavān /
ete cānye ca rājāno devairapi sudurjayāḥ //

nihatāḥ samare śūrāḥ pāṇḍavairbalavattarāḥ /
kimanyaddaivasaṃyogānmanyase puruṣādhama //

yāṃśca tāṃstauṣi satataṃ duryodhanaripūndvija /
teṣāmapi hatāḥ śūrāḥ śataśo'tha sahasraśaḥ //

kṣīyante sarvasainyāni kurūṇāṃ pāṇḍavaiḥ saha /
prabhāvaṃ nātra pāśyāmi pāṇḍavānāṃ kathañcana //

yastānbalavato nityaṃ manyase tvaṃ dvijādhama / yatiṣye'haṃ yathāśakti yoddhuṃ taiḥ saha saṃyuge /
duryodhanahitārthāya jayo daive pratiṣṭhitaḥ //