Mahabharata · Chapter 7.156

tasminpraviṣṭe durdharṣe sṛñjayānamitaujasi /
amṛṣyamāṇe saṃrabdhe kā vo'bhūdvai matistadā //

duryodhanaṃ tathā putramuktvā śāstrātigaṃ mama /
yatprāviśadameyātmā kiṃ pārthaḥ pratyapadyata //

nihate saindhave vīre bhūriśravasi caiva ha /
yadā'bhyagānmahātejāḥ pāñcālānaparājitaḥ //

kimamanyata durdharṣe praviṣṭe śatrutāpane /
duryodhanastu kiṃ kṛtyaṃ prāptakālamamanyata //

ke ca taṃ varadaṃ vīramanvayurdvijasattamam / ke cāsya pṛṣṭhato'gacchanvīrāḥ śūrasya yudhyataḥ /
ke purastādavartanta nighnantaḥ śāstravānraṇe //

manye'haṃ pāṇḍavānsarvānbhāradvājaśarārditān /
śiśire kampamānā vai kṛśā gāva iva prabho //

praviśya sa maheṣvāsaḥ pāñcālānarimardanaḥ /
kathaṃ nu puruṣavyāghraḥ pañcatvamupajagmivān //

sarveṣu yodheṣu ca saṅgateṣu rātrau sameteṣu mahāratheṣu /
saṃloḍyamāneṣu pṛthagbaleṣu ke vastadānīṃ matimanta āsan //

hatāṃścaiva viṣaktāṃśca parābhūtāṃśca śaṃsasi / rathino virathāṃścaiva kṛtānyuddheṣu māmakān // 5-156-10 teṣāṃ saṃloḍyamānānāṃ pāṇḍavairhatacetasām / andhe tamasi magnānāmabhavatkā matistadā //

prahṛṣṭāṃścāpyudagrāṃśca santuṣṭāṃścaiva pāṇḍavān /
śaṃsasīhāprahṛṣṭāṃśca vibhraṣṭāṃścaiva māmakān //

kathameṣāṃ tadā tatra pārthānāmapalāyinām /
prakāśamabhavadrātrau kathaṃ kuruṣu sañjaya //
sañjaya uvāca /

rātriyuddhe tadā rājanvartamāne sudāruṇe /
droṇamabhyadravansarve pāṇḍavāḥ saha somakaiḥ //

tato droṇaḥ kekayāṃśca dhṛṣṭadyumnasya cātmajān /
sampraiṣayatpretalokaṃ sarvāniṣubhirāśugaiḥ //

tasya pramukhato rājanye'vartanta mahārathāḥ /
tānsarvānpreṣayāmāsa pitṛlokaṃ sa bhārata //

pramathnantaṃ tadā vīrānbhāradvājaṃ mahāratham /
abhyavartata saṅkruddhaḥ śibī rājā pratāpavān //

tamāpatantaṃ samprekṣya pāṇḍavānāṃ mahāratham /
vivyādha daśabhirdroṇaḥ sarvapāraśavaiḥ śitaiḥ //

taṃ śibiḥ prativivyādha triṃśatā niśitaiḥ śaraiḥ /
sārathiṃ cāsya bhullena smayamāno nyapātayat //

tasya droṇo hayānhatvā sārathiṃ ca mahātmanaḥ /
athā'sya saśirastrāṇaṃ śiraḥ kāyādapāharat //

tato'sya sārathiṃ kṣipramanyaṃ duryodhano'diśat /
sa tena saṅgṛhītāśvaḥ punarabhyadravadripūn //

kaliṅgānāmanīkena kāliṅgasya suto raṇe /
pūrvaṃ pitṛvadhātkruddhau bhīmasenamupādravat //

sa bhīmaṃ pañcabhirviddhvā punarvivyādha saptabhiḥ /
viśokaṃ tribhirānarcchadvajamekena patriṇā //

kaliṅgānāṃ tu taṃ śūraṃ kruddhaṃ kruddho vṛkodaraḥ /
rathādrathamabhidrutya muṣṭinā'bhijaghāna ha //

tasya muṣṭihatasyājau pāṇḍavena balīyasā /
sarvāṇyasthīni sahasā prāpatanvai pṛthakpṛthak //

tasminhate tadā tena siṃhanādo mahānabhūt /
pāñcālānāṃ mahārāja sādhusādhviti pāṇḍavam //

taṃ karṇo bhrātaraścāsya nāmṛṣyanta parantapa /
te bhīmasenaṃ nārācairjaghnurāśīviṣopamaiḥ //

tataḥ śatrurathaṃ tyaktvā bhīmo drumarathaṃ gataḥ /
drumaṃ cāsyantamaniśaṃ muṣṭinā samapothayat //

yathā kācamaṇirnyasto muṣṭinaikena līlayā /
sa hataḥ sarvathā cūrṇo raktamevodapadyata //

tathā cūrṇamabhūttatra karṇabhrātā drumastathā /
sa tadā pāṇ़ḍuputreṇa balinā'bhihato'patat //

taṃ nihatya mahārāja bhīmaseno mahābalaḥ /
jayarātarathaṃ prāpya muhuḥ siṃha ivānadat //

jayarātaṃ tu caraṇe gṛhya bhīmo mahābalaḥ /
sūtaṃ cāsya mahābāhurgṛhya rājaṃstathaiva ca //

pādayorgṛhya tau vīrau bhīmaḥ karṇasya paśyataḥ /
bhūmāvāviddhya jaghne sa tau ca prāṇairvyayujyatām //

karṇastu pāṇḍave śaktiṃ kāñcanīṃ samavāsṛjat /
tatastāmeva jagrāha prahasanpāṇḍunandanaḥ //

karṇāyaiva ca durdharṣaścikṣepājau vṛkodaraḥ /
tāmāpatantīṃ ciccheda śakunistailapāyinā //

etatkṛtvā mahatkarma raṇe'dbhutaparākramaḥ /
punaḥ svarathamāsthāya dudrāva tava vāhinīm //

tamāyāntaṃ jighāṃsantaṃ bhīmaṃ kruddhamivāntakam / nyavārayanmahābāhuṃ tava putrā viśāmpate /
mahatā śaravarṣeṇa cchādayanto mahārathāḥ //

durmadasya tato bhīmaḥ prahasanniva saṃyuge /
sārathiṃ ca hayāṃścaiva śarairninye yamakṣayam //

durmadastu tato yānaṃ duṣkarṇasyāvacakrame / tāvekarathamārūḍhau bhrātarau paratāpanau /

saṅgrāmaśiraso madhye bhīmaṃ dvāvapyadhāvatām /
yathāmbupatimitrau hi tārakaṃ daityasattamam //

tatastu durmadaścaiva duṣkarṇaśca tavātmajau /
rathamekaṃ samāruhya bhīmaṃ bāṇairavidhyatām //

tataḥ karṇasya miṣato drauṇerduryodhanasya ca /
kṛpasya somadattasya bāhlīkasya ca pāṇḍavaḥ //

durmadasya ca vīrasya duṣkarṇasya ca taṃ ratham /
pādaprahāreṇa dharāṃ prāveśayadarindamaḥ //

tataḥ sutau te balinau śūrau duṣkarṇadurmadau /
muṣṭinā'hatya saṅkruddhau mamarda caraṇena ha //

tato hāhākṛte sainye dṛṣṭvā bhīmaṃ nṛpā'bruvan /
rudro'yaṃ bhīmarūpeṇa dhārtarāṣṭreṣu yudhyati //

evamuktvā palāyante sarve bhārata pārthivāḥ /
visañjñā vāhayanvāhānna ca dvau saha dhāvataḥ //

tato bale bhṛśalulite niśāmukhe supūjito nṛpavṛṣabhairvṛkodaraḥ /
mahābalaḥ kamalavibuddhalocano yudhiṣṭhiraṃ nṛpatimapūjayadbalī //

tato yamau drupadavirāṭakekayā yudhiṣṭhiraścāpi parāṃ mudaṃ yayuḥ /
vṛkodaraṃ bhṛśamanupūjayaṃśca te yathāndhake pratinihate haraṃ surāḥ //

tataḥ sutāste varuṇātmajopamā rupānvitāḥ saha guruṇā mahātmanā /
vṛkodaraṃ sarathapadātikuñjarā yuyutsavo bhṛśamabhiparyavārayan //

tato yamau drupadasutāḥ sasainikā yudhiṣṭhiradrupadavirāṭasātvatāḥ /
ghaṭotkaco jayavijayau drumo vṛkaḥ sasṛñjayāstava tanayānavārayan //

tato'bhavattimiraghanairivāvṛte mahābhaye bhayadamatīva dāruṇam /
niśāmukhe vṛkabalagṛdhramodanaṃ mahātmanā nṛpavara yuddhamadbhutam //