Mahabharata · Chapter 7.155

yattadā prāviśatpāṇḍūnācāryaḥ kupito balī /
uktā duryodhanaṃ mandaṃ mama śāstrātigaṃ sutam //

praviśya vicarantaṃ ca rathe śūramavasthitam /
kathaṃ droṇaṃ maheṣvāsaṃ pāṇḍavāḥ paryavārayan //

ke'rakṣandakṣiṇaṃ cakramācāryasya mahāhave /
ke cottaramarakṣanta nighnataḥ śāstravānbahūn //

ke cāsya pṛṣṭhato'nvāsanvīrā vīrasya yodhinaḥ /
ke purastādavartanta rathinastasya śatravaḥ //

manye tānaspṛśacchītamativelamanārtavam /
manye te samavepanta gāvo vai śiśire yathā //

yatprāviśanmaheṣvāsaḥ pāñcālānaparājitaḥ /
nṛtyansa rathamārgeṣu sarvaśastrabhṛtāṃ varaḥ //

nirdahansarvasainyāni pāñcālānāṃ ratharṣabhaḥ /
dhūmaketuriva kruddhaḥ kathaṃ mṛtyumupeyivān //
sañjaya uvāca /

sāyāhne saindhavaṃ hatvā rājñā pārthaḥ sametya ca /
sātyakiśca maheṣvāso droṇamevābhyadhāvatām //

tathā yudhiṣṭhirastūrṇaṃ bhīmasenaśca pāṇḍavaḥ /
pṛthakcamūbhyāṃ saṃyattau droṇamevābhyadhāvatām //

tathaiva nakulo dhīmānsahadevaśca durjayaḥ / dhṛṣṭadyumnaḥ śatānīko virāṭaśca sakekayaḥ / mātsyāḥ sālvāḥ sasenāśca droṇameva yayuryudhi //

drupadaśca tathā rājā pāñcālairabhirakṣitaḥ /
dhṛṣṭadyumnapitā rājandroṇamevābhyavartata //

draupadeyā maheṣvāsā rākṣasaśca ghaṭotkacaḥ /
sasainyāste nyavartanta droṇameva mahādyutim //

prabhadrakāśca pāñcālāḥ ṣaṭ्sahasrāḥ prahāriṇaḥ /
droṇamevābhyavartanta puraskṛtya śikhaṇḍinam //

tathetare naravyāghrāḥ pāṇḍavānāṃ mahārathāḥ /
sahitāḥ sannyavartanta droṇameva dvijarṣabham //

teṣu śūreṣu yuddhāya gateṣu bharatarṣabha /
babhūva rajanī ghorā bhīrūṇāṃ bhayavardhinī //

yodhānāmaśivā raudrā rājannantakagāminī /
kuñjarāśvamanuṣyāṇāṃ prāṇāntakaraṇī tadā //

tasyāṃ rajanyāṃ ghorāyāṃ nadantyaḥ sarvataḥ śivāḥ /
nyavedayanbhayaṃ ghoraṃ sajvālakabalairmukhaiḥ //

ulūkāścāpyadṛśyanta śaṃsanto vipulaṃ bhayam /
viśeṣataḥ kauravāṇāṃ dhvajinyāmatidāruṇāḥ //

tataḥ sainyeṣu rājendra śabdaḥ samabhavanmahān /
bherīśabdena mahatā mṛdaṅgānāṃ svanena ca //

gajānāṃ bṛṃhitaiścāpi turaṅgāṇāṃ ca heṣitaiḥ /
khuraśabdanipātaiśca tumulaḥ sarvato'bhavat //

tataḥ samabhavadyuddhaṃ sandhyāyāmatidāruṇam /
droṇasya ca mahārāja sṛñjayānāṃ ca sarvaśaḥ //

tamasā cāvṛte loke na prājñāyata kiñcana /
sainyena rajasā caiva samantādutthitena ha //

narasyāśvasya nāgasya samasajjata śoṇitam /
nāpaśyāma rajo bhaumaṃ kaśmalenābhisaṃvṛtāḥ //

rātrau vaṃśavanasyeva dahyamānasya parvate /
ghoraścaṭacaṭāśabdaḥ śastrāṇāṃ patatāmabhūt //

mṛdaṅgānakanirhrādairjharjharaiḥ paṭahaistathā /
phetkārairheṣitaiḥ śabdaiḥ sarvamaivākulaṃ babhau //

naiva sve na pare rājanprājñāyanta tamovṛte /
unmattamiva tatsarvaṃ babhūva rajanīmukhe //

bhaumaṃ rajo'tha rājendra śoṇitena praṇāśitam /
śātakaumbhaiśca kavacairbhūṣaṇaiśca tamo'naśat //

tataḥ sā bhāratī senā maṇihemavibhūṣitā /
dyaurivāsītsanakṣatrā rajanyāṃ bharatarṣabha //

gomāyubalasaṅghuṣṭā śaktidhvajasamākulā /
vāraṇābhirutā ghorā kṣveḍitotkruṣṭanāditā //

tatrābhavanmahāśabdastumulo romaharṣaṇaḥ /
samāvṛṇvandiśaḥ sarvā mahendrāśaniniḥsvanaḥ //

sā niśīthe mahārāja senā'dṛśyata bhāratī /
aṅgadaiḥ kuṇḍalairniṣkaiḥ śastraiścaivāvabhāsitā //

tatra nāgā rathāścaiva jāmbūnadavibhūṣitāḥ /
niśāyāṃ pratyadṛśyanta meghā iva savidyutaḥ //

ṛṣṭiśaktigadābāṇamusalaprāsapaṭṭasāḥ /
sampatanto vyadṛśyanta bhrājamānā ivāgnayaḥ //

duryodhanapurovātāṃ rathanāgavalāhakām /
vāditraghoṣastanitāṃ cāpavidyudvvajairvṛtām //

droṇapāṇḍavaparjanyāṃ khaṅgaśaktigadāśanim /
śaradhārāstrapavanāṃ śastrapātoṣmasaṅkulām //

ghorāṃ vismāpanīmugrāṃ jīvitacchidamapluvām /
tāṃ prāviśannatibhayāṃ nadīṃ yuddhacikīrṣavaḥ //

tasminrātrimukhe ghore mahāśabdaninādite /
bhīrūṇāṃ trāsajanane śūrāṇāṃ harṣavardhane //

rātriyuddhe mahāghore vartamāne sudāruṇe /
droṇamabhyadruvankruddhāḥ sahitāḥ pāṇḍusṛñjayāḥ //

ye ye pramukhato rājannāvartanta mahārathāḥ /
tānsarvānvimukhāṃścakre kāṃścinninye yamakṣayam //

tāni nāgasahasrāṇi rathānāmayutāni ca / padātihayasaṅghānāṃ prayutānyarbudāni ca /
droṇenaikena nārācairnirbhinnāni niśāmukhe //